Salmos 108 - Chuya Qellqa 1992

Diospa yanapakuyninta mañakusqanmanta

Diosman Davidpa takisqan

¹ Dios Taytalláy, sonqollaymi takinanpaq chayllaña kachkan, salmokunatawan takikunatam kusikuywan takisaq.

² Arpa rikchariy, salterio rikchariy; pacha achikyaytam rikcharisaq.

³ Dios Taytalláy, llaqtakunapa qayllanpim hatunchasqayki, nacionkunapa chawpinpim takipusqayki.

⁴ Kuyapayakuynikiqa cielokunamantapas aswan hatunmi cheqap kaynikiqa cielokamaraqmi haypan.

⁵ Diosnilláy, cielokunapa hawanpim kachkanki, atiynikipas kay pachatam huntaykun.

⁶ Kuyasqaykikuna librasqa kanankupaq atiynikiwan salvaykuwayku. ¡Uyariykuwayku!

⁷ Chuya wasinpim Tayta Dios nirqa: ¡Mayna kusikuywanmi Siquem llaqtatawan Sucot qechwapi allpakunata rakinasaq!

⁸ Manaseswan Galaadqa ñoqapam; Efrainpas casco hina uma harkachikunaymi, Judañataqmi kamachikunay vara.

⁹ Moabqa mayllakunay lavatoriom, Edompas usutayta wikapanaymi, filisteokunañataqmi venceruspay kusikunay, nispa.

¹⁰ ¿Pitaq murallasqa llaqtakama pusawanqa? ¿Pitaq Edom nacionkama pusawanqa?

¹¹ Dios Taytallayku, wischuruwaspaykikum qonqaruwarqankiku, tropaykuwanpas manañam lloqsirqankiñachu.

¹² Enemigoykupa contranpi yanapaykuwayku, runakunapa yanapakuyninqa yanqapaqmi.

¹³ Diospa yanapakuyninwanqa hatun kaqkunatam ruwasun, paymi enemigonchikunata sarupanqa.