Salmos 102 - Chuya Qellqa 1992

Llakisqa runapa mañakuyninmanta

Ñakariqpa mañakusqan

¹ Dios Taytalláy, mañakamullasqayta uyariykullaway, qayakamullasqayta chaskiykullaway.

² Llakikuypi kallaptiypas amayá uyallaykita pakaykuwaychu, aswanqa uyariykullaway; qayakamullasqay punchawpi chaylla uyariykamullaway.

³ Kawsakuyllaymi qosni hinaraq tukuchkan, tullullaykunam sansa hinaraq rupachkan.

⁴ Sonqollaymi llakisqa kachkan, qawisqa qora hinañam kachkan, mikuypas manam chayawanchu.

⁵ Waqasqayraykum tullunwan qarallanña kachkani.

⁶ Ñoqaqa chunniqpi chuseq hinañam kachkani, purmasqa wasikunapi tuku hinañam kachkani.

⁷ Manañam puñuypas chayawanchu, wasipa hawanpi sapallan urpi hinañam kallachkani.

⁸ Sapa punchawmi cheqniwaqniykuna kamiwanku, sutiyta rimaspam ñakawanku.

⁹ Tantapa rantinpim uchpallataña mikuni, tomaspaypas weqeytawanmi tomani.

¹⁰ Chaytaqa ruwani piñakurusqaykiraykum. Qanmi ñoqataqa hatunchawarqanki, hina qamllataqmi wikaparuwankipas.

¹¹ Wataykunapas llantuy hinallam pasarun, ñoqaqa qora hinam chakiruchkaniña.

¹² Dios Taytalláy, qamqa wiñaypaqmi munaychakunki, sutikiqa wiña-wiñaypaq yuyasqam kanqa.

¹³ Hatarispayki Sión llaqtamanta llakipayarikuy, llakipayarinayki tiempom chayaramunña, pampachaykunayki punchawmi chayaramunña.

¹⁴ Serviqnikikunaqa Sión llaqtapa ruminkunatapas kuyanmi, tuñisqa perqankunamantapas llakikunmi.

¹⁵ Llapallan nacionkunam Tayta Diospa sutinta hatunchanqaku, kay pachapi llapallan reykunapas Tayta Diostam yupaychanqaku,

¹⁶ yupaychanqakuqa Sión llaqtata hatarichiptinmi, hinaspa kanchariyninpi rikurimuptinmi.

¹⁷ Qamqa mana piniyuqkunapa mañakuynintam uyarinki, paykunapa mañakusqantam chaskiykunki.

¹⁸ Chaykunam hamuq miraykunapaq qellqasqa kanqa, hamuq punchawkunapi nacemuqkuna Tayta Diosta hatunchanankupaq.

¹⁹ Altopi santuarionmantam Tayta Dios qawamuchkan, hanaq pachamantam kay pachata qawamuchkan.

²⁰ Presokunapa waqasqanta uyarinanpaqmi qawamuchkan, wañunanpaq sentenciasqakunata kacharinanpaqmi qawamuchkan.

²¹ Chaynapim Tayta Diosmanta Sión llaqtapi willakunqaku, payllatañam Jerusalén llaqtapi yupaychanqaku.

²² Chaynataqa ruwanqaku Tayta Diosta yupaychanankupaq llaqtakunapas nacionkunapas huñunakuptinkum.

²³ Warma tiempollaypiraqmi kallpayta qechuruwarqa, wataykunatam menosyarachirqa.

²⁴ Chaymi Tayta Diosta nirqani: Amayá manaraq wañunaypiqa wañurachillawaychu, qamqa wiña-wiñaypaq kawsakuqmi kanki, nispay.

²⁵ Qallariyninpim kay pachata cimientarqanki, hanaq pachatapas atiynikiwanmi unancharqanki.

²⁶ Chaykuna puchukaruptinpas qamqa hina kaqllam kanki. Pacha hina mawkayaruptinpas, pachata mudachichkaq hinam qamqa mudarachinki.

²⁷ Qanmi ichaqa hina kaqlla kanki, wataykikunapas manam tukunqachu.

²⁸ Serviqnikipa mirayninkunapas hawkam kawsakunqaku, qayllaykipim mana kuyuchisqa kanqaku.