Salmos 101 - Chuya Qellqa 1992

Tayta Diosman reypa prometesqanmanta

Diosman Davidpa takisqan

¹ Dios Taytalláy, kuyapayakuynikimantam takisaq, allin ruwaq kasqaykimantam takisaq, sumaq takikunatam takisaq.

² ¿Haykapitaq ñoqaman hamunki? Allin kawsakuytam munani, palacioypipas mana huchallikuspam kawsasaq.

³ Mana allin kaqkunatam qepanchasaq, Diosmanta rakikuqkunapa ruwasqantaqa cheqninim, paykunapa ruwasqantaqa manam kaqpaqpas hapisaqchu.

⁴ Mana allin yuyaymanaytam ñoqamanta wischusaq, mana allin kaqkunataqa manam ruwasaqchu.

⁵ Runamasinta urmachinanpaq qepanpi rimaqtaqa upallachisaqmi; hatun tukuspa machu tukuq runataqa qarqorusaqmi.

⁶ Ñoqawan kawsananpaqqa kay pachapi kasukuq runakunallatam akllasaq, allin kawsakuq runakunallam ñoqataqa serviwanqa.

⁷ Engañaq runaqa manam wasiypiqa yachanqachu, llulla runaqa manam qayllaypiqa takyanqachu.

⁸ Nacionpi millakuypaq ruwaqkunataqa sapa punchawmi chinkarachisaq; mana allin ruwaqkunataqa Tayta Diospa llaqtanmantam qarqorusaq.