Salmos 10 - Chuya Qellqa 1992

Diospa yanapakuyninta David mañakusqanmanta Lámed

Lámed

¹ Dios Taytalláy, ¿imanasqataq karunchakurunki? ¿imanasqataq sasachakuy tiempopi pakakurunki?

² Mana allin runam hatun tukuspa piñasqallaña wakchakunata qatikachan, ichaqa kikinpa toqlla churasqallanwanmi hapirachikun.

Mem

Mem

³ Mana allin runaqa mana allinkuna munapayasqanmantam alabakun; kikillanpaq munaq runaqa Tayta Diostapas ñakaspam mana kaqpaq hapin.

Nun

Nun

⁴ Mana allin runaqa, qari tukuspam Tayta Diosta mana maskanchu, manataqmi Diosmantaqa yuyaymananchu.

⁵ Paypaqqa ima ruwasqanpas allinpaqmi rikchakapun, Diospa kamachikuyninkunapas paymantaqa karupim tarikun, llapa enemigonmantapas burlakunmi.

⁶ Chayna runaqa sonqonpipas ninraqmi: “Manapunim haykapipas ñoqaqa wichisaqchu, manam haykapipas sasachakuyqa haypamuwanqachu”, nisparaq.

Sámek

Sámek

⁷ Siminpas ñakaywan huntasqam kachkan, siminpas llullakuywan, engañowan huntasqam kachkan, qallunpipas mana allin rimaykunallam tarikun.

Pe

Pe

⁸ Llaqtakunapim pitañapas wateqan, mana huchayuqtam pakapallapi wañuchin; mana piniyuqtam pakakuspalla wateqan,

Ayin

Ayin

⁹ machaypi pakakuq león hinaraqmi wakcha runata hapirunanpaq wateqan, hapiruspanmi mallanpi qatatyan.

Tsade

Tsade

¹⁰ Kurkuykuspa chintiparikuptinmi makinman mana piniyuqkuna wichiykunku;

¹¹ payqa sonqonpipas ninraqmi: “Kaytaqa Diosqa qonqarunmi, uyanta taparuspanmi mana imatapas rikunchu”, nisparaq.

Qof

Qof

¹² Dios Taytalláy, ¡hatariy! Hatarispa makikita hoqariy, wakchakunata ama qonqaychu.

¹³ Diosnilláy, ¿imanasqataq mana allin runakuna despreciasunki? Paykunaqa sonqonkupim ninku: “Diosqa manapunim juzgawasunchu”, nispanku.

Resh

Resh

¹⁴ Qampunim rikurqanki ñakarichispa mana allin ruwasqanta, chay ruwasqanman hina pagaykapuy; mana piniyuqkunaqa qamllamanmi hapipakusunki, qamllam mana tayta-mamayuqkunata waqaychanki.

Shin

Shin

¹⁵ Mana allin runapa makinta pakiy, mana allin ruwayninkunamanta cuentata mañaspa pasaypaqta chinkarachiy.

¹⁶ Tayta Diosqa wiña-wiñaypaq munaychakuqmi, mana allin runakunaqa allpankumanta qarqosqam kanqaku.

Tav

Tav

¹⁷ Dios Taytalláy, qamqa uchuychakuqkunapa mañakuynintam uyarinki, uyariykuspam paykunata kallpanchanki.

¹⁸ Qamqa mana piniyuqkunatawan ñakarichisqakunatam allin arreglota ruwanki, chaynapi allpamanta ruwasqa runaqa pitapas amaña manchachinanpaq.