Proverbios 1 - Chuya Qellqa 1992

Yachaywan rimaykuna imapaqmi kasqanmanta

¹ Kaykunam Israel nacionpa reynin Davidpa churin Salomonpa yachaywan rimarisqan simikuna.

² Kaykunaqa qellqasqa karqa, yachaytawan yachachikuyta haypanapaqmi, sumaq rimaykunata entiendenapaqmi;

³ chaynapi corregisqa kanapaq, yachaywan imatapas ruwanapaq, allin ruwaq kanapaq, allin tanteoyuq kanapaq, hinaspa mana pimanpas sayapakunapaq.

⁴ Mana yachayniyuqkunata yachayniyuqtaña ruwananpaq, jovenkunatapas allin tanteakuqta, allin yachayniyuqtaña ruwananpaq.

⁵ Yachayniyuq runapas chayta uyarispanmi yachayninta huntachin, yachayniyuq runapas aswanraqmi yachayta chaskinqa,

⁶ yachaywan rimaykunapa nisqanta entiendenanpaq, yachayniyuqkunapa rimasqanta entiendenanpaq.

⁷ Yachaypa qallariyninqa Tayta Diosta kasukuymi; mana yachayniyuq runaqa yachaytawan yachachikuytam wischupakun.

Jovenkunapaq yachachikuykuna

⁸ Churilláy, taytaykipa rimapayasusqaykitayá uyariy, mamaykipa yachachisusqaykitaqa amayá qonqaychu.

⁹ Chay nisusqaykikunaqa umaykipaq kuyayllapaq corona hinam kanqa, kunkaykipaqpas kuyayllapaq collar hinam kanqa.

¹⁰ Churilláy, huchasapakuna engañayta munasuptikiqa ama kasuychu.

¹¹ Sichum nisunki: “Hakuchik runata wateqamusun, inocente runata wañuchimusun,

¹² sepultura hinaraq kawsachkaqllata mikuramusun, imaynam ayata sepultura millpun, chaynam millpuramusun.

¹³ Hinaspanchikmi tukuy ima kapuqniyuq kasun, wasinchiktapas suwakusqanchikwanmi huntachikusun.

¹⁴ Hamuy, ñoqaykuwan hukllawakuy partekitaqa chaskinkim, hukllaman huñuruspam rakinakusun”, nisuptikiqa,

¹⁵ churilláy ama munaychu paykunawan riytaqa, aswanqa paykunapa ñanninmanta asurikuy;

¹⁶ paykunaqa mana allinkuna ruwaqmi chaylla kallpanku, runa wañuchiqpas utqaymanmi kallpanku.

¹⁷ Pawaq animalkunapa rikusqanta toqlla churayqa yanqapaqmi.

¹⁸ Chay runakunaqa kikillankum wañuyman qarakuchkanku, kikillankupaqmi toqllatapas churakuchkanku.

¹⁹ Chaynam tukuy imayuq karuyta munaq runaqa, chay munaynillanmi wañuymanpas apanqa.

Yachaymi jovenkunata maskachkan

²⁰ Yachaymi callekunapi qayakun, plazakunapim hatunmanta qaparin.

²¹ Runakunapa huñunakunan esquinakunapim qaparin, llaqtapa punkunkunapim kaynata nin:

²² Mana yachayniyuq jovenkuna, ¿haykapikamataq mana yachayniyuq kankichik? ¿haykapikamataq burlakuynikichikpi kusikuspa yachayta cheqninkichik?

²³ Rimapayasqaykunata uyariychik, hinaptinqa espirituywan huntachispaymi imam piensasqaykunata reqsichisqaykichik.

²⁴ Qamkunaqa qayachkaptiypas manam uyarirqankichikchu, makiyta haywarimuchkaptiypas manam kaqpaqpas hapirqankichikchu.

²⁵ Aswanraqmi consejasqaykunatapas wischupakurqankichik, rimapayasqaykunatapas manam kasukurqankichikchu.

²⁶ Chayraykum ñoqapas ñakariypi kaptikichik, manchakuy hamusuptikichik burlakusaq;

²⁷ manchakusqaykichik wayra-para hina hamuptinmi, sasachakuy sinchi viento hina hamuptinmi, llakipi kaptikichikmi, ñakarichisqa kaptikichikmi asikusaq.

²⁸ Chay punchawpim qayakamuwankichik, ichaqa manam uyarisqaykichikchu, tutapaymanta maskawaspaykichikpas manam tariwankichikchu.

²⁹ Yachayta wischupakuspa Tayta Diosta mana kasukusqaykichikraykum,

³⁰ rimapayasqaykunata mana uyarispa, yachachikuyniykunata wischupakusqaykichikraykum,

³¹ mana allin ruwaynikichikpa rurunta mikunkichik, mana allin munaynikichiktam saksankichik.

³² Mana yachayniyuqkunataqa mana yachayniyuq kayninmi wañurachinqa. Mana tanteakuy yachaq runataqa, mana tanteakuy yachaq kayninmi chinkarachinqa.

³³ Pipas uyariwaqniymi ichaqa hawkalla kawsakunqa, ima sasachakuytapas mana manchakuspam hawkalla kawsakunqa.