Oseas 3 - Chuya Qellqa 1992

Oseaspa warmin waqllikusqanmanta

¹ Tayta Diosmi yapamanta niwarqa: Hukwan waqllikuruq kachkaptinpas warmikita yapamanta kuyamuy. Chaynatam Tayta Diospas Israelpa mirayninkunata kuyan, idolokunata qatispanku chaykunaman uvas pasaskunata, tortilla ofrendakunata ofrecechkaptinkupas, nispa.

² Chaymi warmiy kananpaq soqta onza qollqewan hinaspa carga parten cebadawan rantirurqani.

³ Hinaspaymi nirqani: Qamqa unaypaqmi warmiy kanki; chaynaqa amam huchapakunkiñachu nitaqmi qarikunawanpas kakunkiñachu, ñoqapas manam qanwanqa puñusaqchu, nispay.

⁴ Israelpa mirayninkunapas unay watakunam mana reyniyuq, mana kamachiqniyuq kanqaku; sacrificiopas, sacerdotekunapas, idolokunapas manam kanqañachu.

⁵ Chaymantam Israelpa mirayninkuna kutirimuspanku Tayta Diosninkuta chaynataq reyninku Davidtapas maskanqaku. Tukupay punchawkunapiqa Tayta Diostam manchakunqaku, bendicionninkunatapas kuyakuywanmi chaskikunqaku.