Oseas 1 - Chuya Qellqa 1992

Oseaspa warminmantawan churinkunamanta

¹ Judá nacionpi Uzías, Jotam, Acaz hinaspa Ezequías rey kachkaptinkum; chaynallataq Joaspa churin Jeroboampas Israelpi rey kachkaptinmi, Beeripa churin Oseasta Tayta Dios rimapayarqa.

² Kaymi Oseasman Tayta Diospa rimarisqan simikuna. Tayta Diosmi Oseasta nirqa: Rispayki chuchumika warmiwan casarakamuy hinaspa chay warmipi churyamuy, “huchapakuy wawakuna”, nisqa kanankupaq. Israelmi Tayta Diosmanta sapaqchakuruspan chuchumika warmi hinaña rikurirun, nispa.

³ Chaymi Diblaimpa churin Gomerta Oseas casararqa, hinaptinmi wiksayakuruspan qari wawata wachakurqa.

⁴ Chaymi Oseasta Tayta Dios nirqa: Jezreelwan chay wawata sutichay, yawarta Jezreel llaqtapi chaqchusqanmantam rey Jehupa ayllunta chaylla castigasaq, chaynatam Israel nacionpa munaychakuyninta tukusaq.

⁵ Chay punchawpim, Jezreel qechwapi Israelpa atiyninta pakisaq, nispa.

⁶ Huktawan wiksayakuruspanmi warmi wawata Gomer wachakururqa. Chaymi Oseasta Tayta Dios nirqa: Lo-ruhama nispa sutichay, manañam huktawanqa Israel nacionta llakipayasaqñachu, nitaqmi pampachasaqñachu.

⁷ Judá naciontam ichaqa llakipayaykuspay salvaykusaq, manam flechawanchu nitaqmi espadawanchu, manam guerrawanchu nitaqmi caballokunawanchu, manam caballopi silladakunawanchu, aswanqa Diosninku kasqayraykum, nispa.

⁸ Lo-ruhamata anukaruspanmi Gomerqa huktawan wiksayakuruspan qari wawata wachakururqa.

⁹ Hinaptinmi Oseasta Tayta Dios nirqa: Lo-ami nispa chay wawata sutichay, qamkunaqa manam llaqtayñachu kankichik, ñoqapas manataqmi Diosnikichikñachu kani, nispa.

Israelwan Judá huktawan hatarichisqa kanankumanta

¹⁰ Chaywanpas, Israelpa mirayninkunaqa lamar qochapa patanpi mana yupay atina aqo hinañam kanqaku. “Qamkunaqa manam llaqtanchu kankichik nisusqaykichik sitiopim”, “qamkunaqa kawsaq Diospa llaqtanñam kankichik nispa” nisunkichik.

¹¹ Judapa chaynataq Israelpa mirayninkunam hukllaman huñunakuspa kamachiqninkutapas chullallataña akllanqaku, tukuy hinastinmantam Jerusalenman kutimunqaku, Jezreelpa punchawninqa hatunmi kanqa.