Números 28 - Chuya Qellqa 1992

Sapa punchaw ofrendakuna qonankumanta

^1-2 Israelpa mirayninkunaman ninanpaqmi Moisesta Tayta Dios kaynata nirqa: Tantamanta ofrendaytawan kañapuwanaykichik ofrendaytapas imam nisqay punchawpim ofrecemuwankichik, chaykunam ñoqapaq miskillaña asnariq ofrenda kanqa.

³ Ñoqa Tayta Diospaq kañapuwananku ofrendakunamantapas kaynatam ninki: Watayuq iskay sano carnerokunatam lliw kañana sacrificiota mana tipiyta sapa punchaw ofrecewankichik.

⁴ Huknin carnerotam tutapayta ofrecewankichik, huknintañataqmi inti seqaykuyta.

⁵ Chaykunataqa aceitunasmanta hurqosqa huk litro aceitewan chapusqa iskay kilo fino harinayuqtam ofrecewanki.

⁶ Sinaí orqopi kamachisqayman hinam chaykunataqa lliw kañana sacrificiota sapa punchaw ofrecewankichik, chaykunam ñoqa Tayta Diospaq miskillaña asnariq ofrenda kanqa.

⁷ Sapa carnerotam huk litro vinoyuqta ofrecewankichik. Chay vinotam ñoqa Tayta Diospaq santuarioypi tallinkichik.

⁸ Inti seqaykuytapas imaynam tutapayta ofrecewasqaykita hinam ofrecewanki, chapusqa harinayuqta hinaspa vinoyuqta. Chaykunam ñoqa Tayta Diospaq miskillaña asnariq ofrenda kanqa.

Samana punchawpi ofrendamanta

⁹ Samana punchawpim watayuq iskay sano carnerotawan aceitewan chapusqa tawa kilo fino harinata tallinapaq vinoyuqta ofrecemuwankichik.

¹⁰ Sapa punchaw lliw kañana sacrificiota ofrecemuwachkaspaykichikpas, sapa samana punchawpim chaykunata vinoyuqta ofrecemuwankichik.

Musoq killapi ofrenda qonankumanta

¹¹ Sapa killapa qallariyninpim ñoqa Tayta Diosman iskay malta torokunata, huk carnerota hinaspa watayuq qanchis sano carnerokunata ofrecemuwankichik.

¹² Sapa malta toromanmi aceitewan chapusqa soqta kilo fino harinata yapankichik, sapa carneromanñataqmi aceitewan chapusqa tawa kilo harinata.

¹³ Watayuq carneropaqñataqmi sapakamapaq aceitewan chapusqa iskay kilo fino harina kanqa. Chayqa ñoqa Tayta Diospaq lliw kañana miskillaña asnariq ofrendam kanqa.

¹⁴ Huk malta toromanmi iskay litro vinota tallinkichik, huk carneromanñataqmi litro parten vinota, sapa huk watayuq carneropaqmi kanqa huk litro vino. Sapa killa qallariytam chaykunata lliw kañana animalta ofrecewankichik.

¹⁵ Sapa punchaw lliw kañana ofrendamantapas, hucha pampachana ofrendapaqmi ñoqa Tayta Diosman huk chivatota tallinapaq vinoyuqta ofrecemuwankichik.

Pascua Fiestapi ofrendakunamanta

¹⁶ Punta kaq killapa chunka tawayuq punchawninpim ñoqa Tayta Diospaq Pascua fiestata ruwankichik.

¹⁷ Chunka pichqayuq kaq punchawpiñataqmi hatun fiesta kanqa; qanchis punchawmi mana levadurayuq tantata mikunkichik.

¹⁸ Chay fiestapa qallarisqan punchawpim hatun huñunakuyta ruwankichik. Chay punchawqa amam pipas llamkanqachu.

¹⁹ Ñoqa Tayta Diosmanmi lliw kañana sacrificiota iskay malta torota, huk carnerota chaynataq watayuq qanchis carnerokunata ofrecemuwankichik. Chay animalkunaqa sanokamam kanqa.

²⁰ Sapa toromanmi aceitewan chapusqa soqta kilo fino harinata yapankichik, huk carneromanñataqmi tawa kilo harinata,

²¹ watayuq qanchis carneromanñataqmi sapakamaman iskay kilo harinata yapankichik.

²² Huk chivatotam hucha pampachasqa kananpaq ofrecemuwankichik.

²³ Sapa tutapayta lliw kañana sacrificiota ofrecewasqaykichikmantapas tukuy chaykunatam ofrecewankichik.

²⁴ Qanchisnintin punchawmi chaynallata ruwankichik, chaykunam ñoqa Tayta Diospaq miskillaña asnariq ofrenda kanqa. Sapa punchaw lliw kañana sacrificiota ofrecewasqaykichikmantapas chaykunatam vinoyuqta ofrecemuwankichik.

²⁵ Chay fiestapa qanchis kaq punchawninpim hatun huñunakuyta ruwankichik. Chay punchawqa amam pipas llamkanqachu.

Kawsaykunapa punta kaq rurun ofrendamanta

²⁶ Semanakuna fiestapi otaq kawsaykunapa punta kaq rurunta Tayta Diosman apamuna fiestapim hatun huñunakuyta ruwankichik, chay punchawqa amam pipas llamkanqachu.

²⁷ Ñoqa Tayta Diosmanmi iskay malta torokunata, huk carnerota hinaspa huk watayuq qanchis carnerokunata lliw kañana miskillaña asnarichkaq ofrendata hina ofrecemuwankichik.

²⁸ Sapa toromanmi aceitewan chapusqa soqta kilo fino harinata yapankichik, huk carneromanñataqmi tawa kilo harinata,

²⁹ watayuq qanchis carnerokunamanmi sapakamaman iskay kilo harinata yapankichik.

³⁰ Huk chivatotañataqmi huchaykichik pampachasqa kananpaq ofrecemuwankichik.

³¹ Sapa punchaw lliw kañana sacrificiota ofrecewachkaspapas, tukuy chaykunatam kawsaykunamanta ofrendayuqta hinaspa tallinapaq vinoyuqta ofrecemuwankichik. Chay animalkunaqa sanokamam kanqa, nispa.