Números 27 - Chuya Qellqa 1992

Zelofehadpa warmi churinkuna allpata mañakusqankumanta

¹ Joseypa churinmi karqa Manasés, Manasespañataq Maquir, Maquirpañataq Galaad, Galaadpañataq Hefer, Heferpañataq Zelofehad. Zelofehadpam karqa pichqa warmi churinkuna: Maala, Noa, Hogla, Milca hinaspa Tirsa.

² Paykunam Diosman asuykuna carpapa punkunman rirqaku, Moiseswan, sacerdote Eleazarwan hinaspa ayllukunapa kamachiqninkunawan rimanankupaq; hinaspam nirqaku:

³ Taytayku Zelofehadmi chunniqpi wañukurqa. Payqa manam wañukurqa Tayta Diospa contranpi hoqarikuq Coreypa umachasqankunawan kuskachu, aswanqa kikinpa huchanmantam wañukurqa, manam qari churin karqachu.

⁴ Chaynaqa, ¿imanasqataq taytaykupa sutin ayllunkunamanta chinkachisqa kanqa? ¿Mana qari churiyuq kasqanraykuchu sutin chinkachisqa kanqa? Chaynaqa, ruegakuykikum ñoqaykumanpas taytaykupa wawqenkunaman qosqaykichik allpatawan kuskata qoykuwanaykikupaq, nispanku.

⁵ Hinaptinmi Moisés chay warmikunapa nisqanta Tayta Diosman willarqa.

⁶ Tayta Diosñataqmi nirqa:

⁷ Zelofehadpa warmi churinkunaqa allintam nichkanku, imaynam tionkuman herencia allpa qosqaykichikta hinayá wañukuq taytankumanpas tupaqnin allpata qoychik, chaynapi taytankuman tupaqnin allpa warmi churinkunapaqña kananpaq.

⁸ Hinaspam Israelpa mirayninkunata kaynata ninki: “Qamkuna ukupi mana qari churiyuq pipas wañukuptinqa warmi churinkunamanñam chay allpata qonkichik.

⁹ Sichum warmi churinpas mana kaptinqa, chay allpatam wañukuqpa wawqenkunamanña qonkichik.

¹⁰ Chay wañukuqpa wawqenkunapas mana kaptinqa, wañukuqpa taytanpa wawqenkunamanñam qonkichik.

¹¹ Sichum chay wañukuqpa taytanpa wawqenkunapas manaña kaptinqa, chay wañukuqpa hichpa ayllunmanñam qonkichik”, nispa. Kay kamachikuymi Israelpa mirayninkunapaq kanqa imaynam qanman kamachisqayman hina.

Moisespa rantinpi Josué akllasqa kasqanmanta

¹² Moisestam Tayta Dios kaynata nirqa: Abarim orqoman riy, chay orqomantam Israelpa mirayninkunaman qosqay allpata qawarinki.

¹³ Chay allpata qawaykuspaykiñam wañukunki, hinaspam wawqeki Aaronpa hinaspa ñawpaq taytaykikunapa kasqanman rinki.

¹⁴ Zin chunniqpi llapa runakuna contraypi hatarispanku yakuta mañakuptinkum mana kasuwaspaykichik chuya kayniyta mana qawachirqankichikchu. Chaymi lloqsiq yakuta Meriba nispa suticharqaku, chayqa Cades lawpi Zin chunniqpim kachkan.

¹⁵ Chaymi Tayta Diosta Moisés nirqa:

¹⁶ Llapallan runakuna kawsachiq Dios Taytalláy, qamyá hukkaqninta akllay llaqtaykita kamachinanpaq,

¹⁷ llaqtaykita mayman risqankupi puntaman pusananpaq, chaynapi runaykikuna mana michiqniyuq ovejakuna hina mana kanankupaq, nispa.

¹⁸ Tayta Diosñataqmi nirqa: Nunpa churin Josueymi espiritupa huntasqan kachkan, payta akllaspam umanman makikita churanki.

¹⁹ Hinaspam sacerdote Eleazarpa qayllanpi chaynataq llapallan runakunapa qayllanpi sayachinki. Paykuna qawachkaptinkum imam ruwananta ninki.

²⁰ Paymanmi atiynikita qonki Israelpa mirayninkuna paytaña kasunankupaq.

²¹ Sacerdote Eleazarpa ñawpaqninpi Josué sayaykuptinmi paypaq Urim rumintakama Eleazar tapuwanqa. Josueymi Israelpa llapallan mirayninkunaman tukuy ima ruwanankuta kamachinqa, nispa.

²² Tayta Diospa kamachisqanman hina Moisés ruwaspanmi Josueyta sacerdote Eleazarpa hinaspa huñunasqa runakunapa ñawpaqninpi sayachirqa.

²³ Paypa umanman Moisés makinkunata churaspanmi imam ruwanankunata nirqa imaynam Tayta Diospa kamachisqanman hina.