Números 23 - Chuya Qellqa 1992

¹ Rey Balactam Balaam nirqa: Qanchis altarkunata kaypi hatarichipuway hinaspa qanchis torokunatawan qanchis carnerokunata nakamuy, nispa.

² Chaymi Balaampa nisqanman hina rey Balac ruwarqa. Hinaptinmi iskayninku huk torota huk carnerota wañuchispanku sapa altarpi ofrecerqaku.

³ Chaymantam rey Balacta Balaam nirqa: Ofrecesqayki animalpa ladonpi sayaykuchkay. Ñoqañataqyá rirusaq, ichapas Tayta Dioswan tuparamuyman, nispa. Hinaspanmi chunniq orqoman qespirqa.

Israel runakunapa favorninpi Balaam rimarisqanmanta

⁴ Chaypim Tayta Dios rikuriykurqa, hinaptinmi Balaam nirqa: Qanchis altarkunata perqachispaymi sapa altarpi huk torotawan huk carnerota ofrecemurqayki, nispa.

⁵ Rimananpaq Balaamta yachachispanmi Tayta Dios nirqa: Rey Balacman kutispa nisqayta hinalla nimuy, nispa.

⁶ Balaam kutiruptinmi rey Balacqa Moab nacionpi llapallan kamachikuqkunapiwan lliw kañana ofrendanpa waqtanpi sayachkasqaku.

⁷ Hinaptinmi Balaam kaynata nirqa: Aram nacionmantam rey Balac pusachimuwarqa, intipa qespimunan law orqomantam Moab nacionpa reynin pusachimuwarqa; paymi kunamuwarqa: “Hamuspayki Jacobpa mirayninkunata ñakaykapuway, Israelpa mirayninkunata ñakaykapuway”, nispa.

⁸ Ichaqa, ¿Imanispaytaq Tayta Diospa mana ñakasqankunata ñakayman? Paykunapaq allinllata munachkaptinqa ¿imaynataq paykunapa mana allinninta rimayman?

⁹ Kay alto orqokunamantam paykunata qawarini, kay moqokunamantam paykunata rikuykuni. Paykunaqa wakin nacionkunamanta sapaqchakuspa yachaq runakunam.

¹⁰ Jacobpa mirayninkunaqa ñutu allpa hinañam, ¿pitaq yupayta atinman? ¿Pitaq hayka kasqankutapas yachanman? ¡Ima allinraq kanman allin ruwaq runakuna hina ñoqapas wañukuptiyqa! ¡Ima allinraq kanman paykunapa wañukuyninta hina ñoqapas chinkaruptiyqa!

¹¹ Chaymi Balaamta rey Balac reclamarqa: ¿Imatataq rimachkanki? Ñoqaqa enemigoykunata ñakanaykipaqmi pusachimurqayki, manam paykunata bendecinaykipaqchu, nispa.

¹² Hinaptinmi Balaam nirqa: Ñoqaqa nirqaykiñam, Tayta Diospa niwasqallantam rimasaq, nispa.

¹³ Rey Balacñataqmi nirqa: Huklawman hakuchik, chaymantaqa manam lliw Israel runakunapa campamentontachu rikunki aswanqa wakillantam, chaynapi ñakaykapamuwanaykipaq, nispa.

¹⁴ Chaymi Balaamta rey Balac pusarqa Pisga orqopi Zofim patakama. Chaypim Balaam qanchis altarkunata ruwaspa huk torotawan huk carnerota sapa altarpi ofrecerqa.

¹⁵ Hinaspanmi rey Balacta nirqa: Lliw kañana sacrificioykipa waqtanpi sayaykuchkay. Ñoqañataqyá rirusaq Tayta Dioswan tuparamunaypaq, nispa.

¹⁶ Chaypim Balaamman Tayta Dios rikuriykuspan kaynata yachachirqa: Rey Balacman kutispayki nisqayta hinalla nimuy, nispa.

¹⁷ Balaam kutiruptinmi rey Balacqa lliw kañana sacrificiopa waqtanpi sayachkasqaku, Moab nacionpi kamachikuqkunapiwan kuska. Hinaptinmi rey Balac tapurqa: ¿Imanintaq Tayta Dios? nispan.

¹⁸ Chaymi Balaam kaynata profetizarqa: ¡Yaw Balac, hatariy! ¡Yaw Ziporpa churin, nisqayta uyariy!

¹⁹ Diosqa manam runachu, manam payqa llullakunmanchu, tanteasqantapas manam yanqachanchu, imapas rimasqantaqa ruwanqapunim, imapas nisqantaqa cumplinqapunim.

²⁰ Ñoqataqa bendecinaypaqmi kamachiwarqa, Diospuni bendecichkaptinqa manam kutipaymanchu.

²¹ Jacobpa mirayninkunataqa manam pipas huchayuqmi ninmanchu, Israel runakunataqa manam pipas mana allin ruwaqkunam ninmanchu. Tayta Diosmi paykunawan kachkan, reyninkuta hinam paykunapas hatunchanku.

²² Egiptomanta hurqomuqninku Diosqa búfalo hina kallpasapallañam.

²³ Jacobpa mirayninpa contranpiqa manam layqapas atinmanchu, Israelpa mirayninpa contranpiqa manam qatipaqkunapas atinmanchu. Kunanqa Jacobmantawan Israelmantam ninqaku: “¡Mayna admirakuypaqmi qanwan Diospa ruwasqanqa!” nispanku.

²⁴ Kay llaqtaqa león hinam hatarichkan, león hinam chutaparikuchkan. Manam samaykunqachu wañuchisqanta mikuruspan yawarninta llaqwanankama.

²⁵ Hinaptinmi Balaamta rey Balac nirqa: Mana ñakaspaykiqa amataq bendeciypaschu, nispa.

²⁶ Balaamñataqmi nirqa: ¿Manachum ñoqaqa nirqayki: “Tayta Diospa niwasqallantam ruwasaq”, nispay?

²⁷ Chaymi rey Balac nirqa: Huklawman hakuchik, ichapas Dios munanman chaymanta ñakaykapuwanaykita, nispa.

²⁸ Chaynapim Balaamta rey Balac pusarqa Peor sutiyuq orqopa puntanman. Chaymantam tukuy chunniq rikukurqa.

²⁹ Chaypim rey Balacta Balaam nirqa: Kaypi qanchis altarkunata hatarichipuway hinaspa qanchis torotawan qanchis carnerota nakamuy, nispa.

³⁰ Chaynapim Balaampa tukuy kamachisqanta rey Balac ruwarqa, hinaspam huk torotawan huk carnerota wañuchispa sapa altarpi ofrecerqa.