Números 20 - Chuya Qellqa 1992

Qaqamanta pawamuq yakumanta

¹ Punta kaq killapim, Israelpa mirayninkuna Zin chunniqman chayaruspanku Cades lawpi samarurqaku. Chaypim María wañukurqa, hinaptinmi pamparurqaku.

² Yaku mana kasqanraykum runakuna Moisespa chaynataq Aaronpa contranpi hatarirurqaku.

³ Moisespa contranpi rimaspankum nirqaku: ¡Amalaya Tayta Diospa wañuchisqan runakunawan kuska wañukuchwan karqa!

⁴ ¿Imapaqtaq Tayta Diospa runankunata kay chunniqman pusamuwarqankiku, ñoqaykupas chaynataq animalniykupas kaypi wañunaykupaq?

⁵ ¿Imapaqtaq Egiptomanta kay mana imapa kananman pusamuwarqankiku? Kaypiqa manam imatapas tarpuchwanchu. Manam higospas, uvaspas, granadapas nitaq yakupas tomanaykupaq kanchu, nispanku.

⁶ Chaymi Moiseswan Aarón, runakunapa qayllanmanta Diosman asuykuna carpapa punkunman pasaspanku pampakama kumuykurqaku, chaypim Tayta Diospa kanchariynin paykunaman rikuriykamurqa.

⁷ Hinaptinmi Moisesta Tayta Dios nirqa:

⁸ Tawnata hapispa wawqeki Aaronwan runakunata huñuychik; hinaspa paykunapa qayllanpi yaku pawamunanpaq qaqata rimapayay, chaynapim qaqamanta lloqsimuq yakuta runakunapas chaynataq animalkunapas tomanqaku, nispa.

⁹ Chaymi Moisés, Tayta Diospa qayllanmanta tawnata hoqarirqa, paypa kamachisqanman hina.

¹⁰ Qaqapa ñawpaqninman runakunata Moiseswan Aarón huñuruptinkum, Moisés nirqa: Uyariychik rumi sonqo runakuna: ¿Kay qaqamantachu tomanaykichikpaq yakuta hurqorusaqku? nispa.

¹¹ Chaynata niruspanmi Moisesqa makinta altoman hoqarispan, tawnanwan iskaykama qaqata waqtarurqa, hinaptinmi achka yaku pawaramuptin runakunapas chaynataq animalkunapas tomarqaku.

¹² Ichaqa Moisestawan Aarontam Tayta Dios nirqa: Ñoqapi mana hapipakuspa Israel miraykunapa qayllanpi mana hatunchawasqaykichikraykum, qosqay allpamanqa Israelpa mirayninkunawan kuskaqa mana yaykunkichikchu, nispa.

¹³ Chay yakutam Meriba nispa suticharqaku. Chaypim Israelpa mirayninkuna Tayta Dioswan atipanakurqaku, chaypitaqmi chuya kasqanta paykunaman qawachirqa.

Edom castakuna Israelpa mirayninkunata harkakusqankumanta

¹⁴ Cades lawmantam willakuqkunata Moisés kacharqa Edom nacionpa reyninta kaynata nimunankupaq: Castayki Israelpa mirayninkunam kaynata nimusunki: Tukuy ñakariykuna pasasqaykutaqa yachankim.

¹⁵ Ñawpaq taytaykum Egipto nacionman ripukuspan chaypi unay watakuna yachamurqaku. Aswanqa Egipto runakunam ñawpaq taytaykutapas chaynataq ñoqaykutapas ñakarichiwarqaku.

¹⁶ Chaymi Tayta Diosta qayakuptiyku uyariykuwaspanku angelninta kachamurqa hinaspam Egipto nacionmanta hurqoramuwarqaku. Kunanqa allpaykipa linderonwan tupaq Cades llaqta lawpiñam kachkaniku.

¹⁷ Ama hina kaspa allpaykipa chawpinta pasarachiwayku. Manam tarpusqa ukuntachu nitaq uvas huertantachu risaqku, manataqmi pozoykipi yakutapas tomasaqkuchu. Allpaykita pasarunaykukamam hatun ñanllanta rispayku mana maylawmanpas muyusaqkuchu, nispanku.

¹⁸ Ichaqa Edom nacionpa reyninmi nirqa: Manam allpaypa chawpintaqa pasawaqchikchu, pasaptikichikqa qamkunawan peleaqmi lloqsimusaqku, nispa.

¹⁹ Hinaptinmi Israelpa mirayninkuna nirqaku: Hatun ñanllantam risaqkuqa, sichum pozoykipi yakuta ñoqaykupas otaq animalniykupas tomaruspaqa pagapusqaykikum. Ama hina kaspa pasarachiwayku, nispanku.

²⁰ Ichaqa Edompa reyninmi nirqa: ¡Manam kaynintaqa pasawaqchikchu! nispa. Hinaspam qari-qarillaña paykunapa contranpi achkallaña tropayuq lloqsimurqa.

²¹ Allpan chawpinta pasanankuta mana munaptinmi Israelpa mirayninkunaqa huklaw ñannintaña pasarqaku.

Aaronpa wañukusqanmanta

²² Israelpa mirayninkunam Cades lawmanta lloqsispanku Hor sutiyuq orqoman chayarurqaku.

²³ Edom nacionwan tupaq Hor orqopim Moisestawan Aaronta Tayta Dios nirqa:

²⁴ Aaronmi wañukuspan Israelpa mirayninkunaman qosqay allpaman mana yaykunqachu, Meriba yakupa waqtanpi mana kasuwasqaykichikrayku.

²⁵ Chaynaqa, Moisés, Aarontawan churin Eleazarta Hor orqoman pusay.

²⁶ Hinaspam Aaronpa sacerdote pachanta hurqospa churin Eleazartaña pachachinki. Chaypim Aarón wañukunqa, nispa.

²⁷ Chaymi Tayta Diospa kamachisqanta Moisés ruwarqa. Llapa runakuna qawachkaptinkum Hor orqoman rirqaku.

²⁸ Chaypim Aaronpa sacerdote pachanta hurqospan churin Eleazartaña pachaykachirqa. Chay orqopa puntanpim Aarón wañukurqa. Moiseswan Eleazarñataqmi chay orqomanta kutimurqaku.

²⁹ Aaronpa wañukusqanta yacharuspankum Israelpa mirayninkuna kimsa chunka punchaw llumpayta waqarqaku.