Números 15 - Chuya Qellqa 1992

Tayta Diosman ofrenda qonankumanta

^1-2 Israelpa mirayninkunaman ninanpaqmi Moisesta Tayta Dios kaynata nirqa: Yachanaykichikpaq qosqay allpaman yaykuruspaykichikqa,

³ torokunata otaq ovejatam lliw kañana sacrificiota ofrecemuwankichik. Chaykunaqa kanmanmi prometewasqaykichik ofrendakunapas, kikikichikmanta qosqaykichik ofrendakunapas, otaq fiestakunapi ofrecewanaykichik ofrendakunapas. Chaykunam kanqa ñoqa Tayta Diospaq miskillaña asnaq ofrendakuna.

⁴ Pipas ofrecewaqniymi chay ofrendakunaman yapanqa aceitewan chapusqa iskay kilo fino harinata.

⁵ Tayta Diosman sapa carnero ofrecesqaykichikmanmi huk litro vinota yapankichik.

⁶ Sapa carnero ofrendamantaqmi huk litro aceitewan chapusqa tawa kilo fino harinatapas yapankichik.

⁷ Chay ofrendakunamanpas huk litro parten vinotam tallinkichik, chaykunam ñoqa Tayta Diospaq miskillaña asnaq ofrenda kanqa.

⁸ Sichum huk torota lliw kañana sacrificiopi ñoqa Tayta Diosman ofrecewaspaykichikqa otaq prometewasqaykichik ofrendapaq, otaq ñoqawan allinlla kasqaykichikmanta ofrendapaq ofrecewaspaykichikqa,

⁹ chay ofrendakunamanmi iskay litro aceitewan chapusqa soqta kilo fino harinata yapankichik,

¹⁰ hinaspam iskay litro vinota tallinkichik. Chaykunam ñoqa Tayta Diospaq miskillaña asnaq ofrenda kanqa.

¹¹ Chaynatam sapa ofrecewasqaykichik torowan, carnerowan, malta carnerowan chaynataq chivatochawanpas ruwankichik.

¹² Hayka animalta ofrecewaspaykichikpas, sapa animalmanmi chaynallata yapankichik.

¹³ Ñoqa Tayta Diosman Israelpa mirayninkuna sapakama miski asnaq ofrendata ofrecemuwaspanqa kamachisqaykunaman hinam ruwanqa.

¹⁴ Sichum huklaw llaqtayuq runa, samapakuq kaspapas, otaq unayña qamkunawan yachaq kaspapas, miski asnaq ofrendata ñoqa Tayta Diosman ofrecemuwaspanqa qamkunapa ruwanaykichikta hinam ruwanqa.

¹⁵ Hina chay kamachikuyllam kanqa qamkunapaqpas chaynataq huklaw llaqtayuqkunapaqpas. Chay kamachikuyllam llapallan miraynikichikpaq wiñaypaq kanqa. Ñoqa Tayta Diospa qayllaypiqa paykunapas qamkuna hinallam kanqaku.

¹⁶ Hina chay kamachikuywan hina chay yachachikuyllam qamkunapaqpas chaynataq qamkunawan yachaq huklaw llaqtayuqkunapaqpas kanqa, nispa.

^17-18 Israelpa mirayninkunaman ninanpaqmi Moisesta Tayta Dios kaynata nirqa: Pusasqay allpaman yaykuspaykichikqa,

¹⁹ chay allpapi kawsaykunatam mikunkichik, wakintañataqmi ñoqa Tayta Diosman ofrecewankichik.

²⁰ Punta trigo trillasqaykichikmantawan puntata masa chapusqaykichikmanta tantatam ñoqaman ofrecewankichik.

²¹ Ñoqa Tayta Diosmanmi wiñaypaq chaynata ofrecewankichik.

^22-23 Moisesman ñoqa Tayta Diospa kamachisqaykunata, otaq qallariyninmantapuni Moisesnintakama qamkunapas chaynataq miraynikichikkunapas ruwanaykichikpaq kamachisqaykunata mana yachastin pantaruspa huchallikuruspaykichikqa kaynatam ruwankichik:

²⁴ Runakunapa mana yachasqanta pipas huchallikuruptinqa, llapallan runakunam lliw kañana sacrificiota hina huk malta torota ofrecemuwanqaku, chay sacrificiom ñoqa Tayta Diospaq miskillaña asnariq ofrenda kanqa, chaywan kuskatataqmi kawsaykunamanta ofrendatapas chaynataq tallinapaq vinotapas imaynam kamachisqayman hina ofrecemuwankichik. Huchamanta ofrendapaqpas huk chivatotam ofrecemuwankichik.

²⁵ Hinaptinmi Sacerdoteqa Israelpa mirayninkunapa rantinpi ofrecemuwanqa, chaymi paykunapa mana yachastin huchallikusqankuta pampachasaq. Paykunam hucharayku ofrendata ñoqa Tayta Diosman ofrecemuwanqaku.

²⁶ Chaynapim Israelpa mirayninkunatapas chaynataq qamkunawan yachaq huklaw llaqtayuqkunatapas mana yachaywan huchallikurusqankuta pampachasaq.

²⁷ Pipas mana yachastin huchallikuruspanqa, huchamanta ofrendatam huk watayuq cabrata ofrecemuwanqa.

²⁸ Sacerdotem chay mana yachastin huchallikuruq runapa rantinpi animalta wañuchinqa ñoqa Tayta Diospa qayllaypi. Chaynata sacerdote ruwaruptinñam chay runapa huchanta pampachasaq.

²⁹ Mana yachaywan huchallikuptikichikqa hina chay kamachikuyllam kanqa qamkunapaqpas chaynataq qamkunawan yachaq huklaw llaqtayuqkunapaqpas.

³⁰ Israelpa miraynin kaspapas otaq huklaw llaqtayuq kaspapas yachastin huchallikuqqa ñoqa Tayta Diostam insultawachkan, chayna runaqa llaqtamanta chinkachisqam kanqa.

³¹ Yachachikuyniykunata mana kaqpaq hapispan kamachikuyniytapas mana kasukusqanraykum chayna runaqa huchanmanta chinkachisqa kanqa.

Samana punchawta mana respetaq runata wañuchisqankumanta

³² Chunniqpi kachkaspankum Israelpa mirayninkuna samana punchawpi yantata pallachkaq runata tarirurqaku.

³³ Hinaspam Moisesmanwan Aaronman chaynataq llapa runakunapa qayllanman pusaruspanku

³⁴ presocharuspa carcelpi wichqarurqaku, chayna runawan manaraq ima ruwaytapas yachasqankurayku.

³⁵ Chaymi Moisesta Tayta Dios nirqa: Chay runaqa wañunqapunim. Campamentomanta hawapi llapa runakuna rumiwan choqapachunku, nispa.

³⁶ Hinaptinmi chay runata campamentomanta hawaman pusaruspanku wañunankama rumiwan choqaparurqaku, chaynataqa ruwarqaku Moisesman Tayta Diospa kamachisqanman hinam.

Pachankupa patankunaman kipuyuq qaytukuna siranankumanta

^37-38 Israelpa mirayninkunaman ninanpaqmi Moisesta Tayta Dios kaynata nirqa: Pachaykichikpa patanpim kipuyuq qaytukunata sirankichik. Chaynatam llapallan miraynikichikkunapas ruwanqaku. Pachaykichikpa patanpi sapa kipumanmi morado watuchakunata churankichik.

³⁹ Chay kipuyuq qaytukunata qawarispaykichikmi kasukunaykichikpaq ñoqapa kamachikuyniykunata yuyarinkichik, chaynapim chuchumika warmi hinaqa sonqoykichikpa mana allin munasqankunapiqa manaña purinkichikchu.

⁴⁰ Chay kipuyuq qaytukunata qawaspaykichikmi kasukunaykichikpaq kamachikuyniykunata yuyarinkichik, chaynapim ñoqallapaqña sapaqchasqa kankichik.

⁴¹ Ñoqa Tayta Diosmi Egipto nacionmanta hurqomurqaykichik Diosnikichik kanaypaq. Ñoqa Tayta Diosmi Diosnikichik kani.