Números 14 - Chuya Qellqa 1992

Tayta Diospa contranpi hatarisqankumanta

¹ Hinaptinmi Israelpa mirayninkuna qaparispanku tukuy tuta waqarqaku.

² Llapallankum Moisespa hinaspa Aaronpa contranpi rimaspa kaynata nirqaku: Amalaya Egipto nacionpi otaq kay chunniqpipas wañuruchwan karqa.

³ ¿Imapaqtaq Tayta Dios kay allpaman pusamuwarqanchik guerrapi wañunanchikpaq? ¿Warminchikkunatapas chaynataq churinchikkunatapas enemigonchik qechuwananchikpaq? ¡Egipto nacionman kutikuyninchikmi allinqa kanman! nispanku.

⁴ Hinaspam hukninkumanta hukninkuman ninakurqaku: ¡Kamachiwaqninchikta akllasunchik hinaspa Egiptoman kutikusunchik! nispanku.

⁵ Moiseswan Aaronñataqmi Israelpa llapallan mirayninkunapa qayllanpi qonqoranpa pampaman kumuykurqaku.

⁶ Josueywan Calebpas llakimantam pachankuta llikipakurqaku. Paykunaqa allpata qawaq riqkunapa partenmi karqaku.

⁷ Hinaspam Israelpa mirayninkunata nirqaku: Qawamusqayku allpaqa allin allpam kasqa.

⁸ Tayta Diosmi yanapawaspanchik chayman pusawasunchik, hinaspam tukuy imapa kanan allpata qowasunchik.

⁹ Chaynaqa, ama Tayta Diospa contranpi hatariychikchu, nitaq chay allpapi runakunatapas manchakuychikchu, paykunataqa manam pipas yanapanchu, ñoqanchikwanmi ichaqa Tayta Dios kachkan, tantata mikuchkaq hinallam vencerusunchik, nispanku.

¹⁰ Llapa runakunañataqmi paykunata rumiwan choqaparuyta munarqaku. Ichaqa Tayta Diospa atiyninmi Diosman asuykuna carpapi Israelpa mirayninkunaman rikuriykurqa.

¹¹ Hinaptinmi Moisesta Tayta Dios nirqa: ¿Haykapikamataq kay runakuna piñachiwanqa? ¿Haykapikamataq qayllankupi tukuy señalkunata ruwachkaptiypas mana creewanqakuchu?

¹² Paykunataqa peste onqoywanmi chinkarachisaq chay allpaman mana yaykunankupaq. Qampa miraynikimantañam paykunamantapas aswan achkata hinaspa atiyniyuq nacionta hatarichisaq, nispa.

¹³ Chaymi Tayta Diosta Moisés nirqa: Qanmi kay runakunata Egipto nacionmanta atiynikiwan hurqomurqanki. Paykunata imam ruwasqaykita Egipto nacionniyuq runakuna yacharuspankuchá

¹⁴ kay allpapi yachaqkunaman willaykunqaku. Paykunapas yachankum runaykikunawan kasqaykitaqa chaynataq uya-uyapura paykunawan rimasqaykitapas. Yachankutaqmi paykunapa hawanpi puyuyki sayasqantapas chaynataq punchawpi sayaq puyupi hinaspa tutanñataq sayaq ninapi ñawpaqninkuta risqaykitapas.

¹⁵ Kay llaqtata wañurachiptikiqa, qanmanta uyariq nacionkunachá contraykipi kaynata ninqaku:

¹⁶ “Tayta Diosqa prometesqan allpaman mana chayachiyta atispanmi chunniqpi wañurachin”, nispanku.

¹⁷ Chaynaqa, Diosnilláy, prometesqaykiman hina atiyniyuq kasqaykita reqsichikuy. Qamqa kaynatam nirqanki:

¹⁸ “Ñoqa Tayta Diosqa mana chaylla piñakuqmi hinaspa ancha hatun kuyakuqmi kani. Ñoqaqa mana allin ruwaqtapas, mana kasukuqtapas pampachanim, huchayuq runatam ichaqa castigani tayta-mamakunamanta qallaykuspa willkanpa willkankunakama”, nispayki.

¹⁹ Chaynaqa, Diosnilláy, hatun kuyapayakuynikiman hina kay runakunata mana allin ruwasqankumanta pampachaykuy, imaynam Egipto nacionmanta kunankama pampachasqaykita hina, nispa.

Israelpa mirayninkunata Tayta Dios castigasqanmanta

²⁰ Moisestam Tayta Dios nirqa: Niwasqaykiman hinam paykunata pampachani.

²¹ Chaywanpas kikiyrayku chaynataq tukuy kay pachata huntariq atiyniyraykum jurani:

²² Egiptopipas, chunniqpipas atiyniytawan señal ruwasqaykunata rikuchkaspanku, achka kutikamaña pruebaman churawaqniykunaqa chaynataq kamachikuyniykunatapas mana kasukuqkunaqa,

²³ manam mayqanninkupas ñawpaq taytankuman juraspa prometesqay allpataqa rikunqakuchu. Qepanchawaqniy runakunaqa manam mayqanninpas rikunqakuchu.

²⁴ Serviqniy Calebtam ichaqa kallpanchakuspan nisqaykunata kasukusqanrayku, qawamusqan allpaman yaykuchisaq, chay allpam mirayninkunapaq kanqa.

²⁵ Amalec runakunawan cananeokunam chay qechwapiqa yachachkanku, chaynaqa kutiychik hinaspa chunniqninta paqarin punchaw kutiychik Puka lamar qocha lawman, nispa.

²⁶ Moisestawan Aarontam Tayta Dios nirqa:

²⁷ Kay Israelpa mana allin mirayninkunapa contraypi rimasqanta ¿haykapikamataq uyarisaq? Contraypi mana allinkuna rimasqankutam uyariruni.

²⁸ Chaynaqa, ñoqa Tayta Dios juraspa nisqayta kaynata nimuy: Imam pasasunaykichikpaq rimasqaykichikta hinam ñoqa qamkunawan ruwasaq.

²⁹ Llapallan contraypi rimaqkunam iskay chunka watayuqmanta hanayman yupasqakuna wañunqaku, chaymi cuerponkupas chunniqpi wischurayanqa.

³⁰ Yachanaykichikpaq juraspay qonay allpamanqa manam mayqannikichikpas yaykunkichikchu. Jefonepa churin Calebwan Nunpa churin Josueyllam yaykunqaku.

³¹ Qamkunam nirqankichik: Churinchikkunataqa enemigonchikkunachá qechuruwasun, nispaykichik. Aswanqa paykunatam wischupakusqaykichik allpaman yaykuchisaq, paykunam chay allpapi yachanqaku.

³² Qamkunam ichaqa kay chunniqpi wañunkichik.

³³ Churikichikkunam kay chunniqpi ovejakunata michistin tawa chunka wata muyunqaku. Paykunam qepanchawasqaykichikmanta ñakarinqaku, kay chunniqpi llapallaykichik wañunaykichikkama.

³⁴ Tawa chunka punchawmi chay allpata qawamurqankichik, chayna tawa chunka watataqmi ñakarichisqaykichikpas. Huk punchawmantam huk wata castigo kanqa. Chaynapim contraypi hatarisqaykichikqa yanqapaq kasqanta yachankichik.

³⁵ Ñoqa Tayta Diosmi nini: Chaynatapunim ruwasaq contraypi huñunakuq mana allin runakunataqa. Kay chunniqpim wañunqaku, kaypitaqmi puchukanqakupas.

Chunka qawamuqkunata Tayta Dios wañurachisqanmanta

^36-37 Allpata qawamunankupaq Moisespa kachasqan runakuna kutiramuspanku mana allin willakuykunawan chay allpapa contranpi llaqtata rimachiqkunatam, Tayta Diosqa peste onqoywan wañurachirqa.

³⁸ Chay allpa qawamuq runakunamantaqa Josueywan Calebllam mana wañurqakuchu.

Israelpa mirayninkuna Hormapi vencechikusqankumanta

³⁹ Tayta Diospa nisqanta Israelpa mirayninkunaman Moisés willaykuptinmi anchallataña llakikurqaku.

⁴⁰ Chaymi paqarinnintin tutapayta hatarispanku orqoman rirqaku kaynata nispanku: Kaypiñam kachkanchik chaynaqa Tayta Diospa prometewasqanchik allpaman hakuchik. Cheqaptapunipas huchallikurunchikmi, nispanku.

⁴¹ Hinaptinmi Moisés nirqa: ¿Imanasqataq Tayta Diospa nisqanta mana kasukurqankichikchu? Chaynaqa, kay ruwasqaykichikpas manam allinchu kanqa.

⁴² Amaña orqomanqa riychikchu, Tayta Diosqa manañam qamkunawanchu kachkan, yanqañataq enemigoykichik venceramusunkichikman.

⁴³ Amalecitakunawan cananeokunam ñawpaqnikichikpi kachkanku peleaspa wañuchisunaykichikpaq. Tayta Diosta manaña qatisqaykichikraykum payqa mana yanapasunkichikñachu, nispa.

⁴⁴ Chaywanpas mana kasukuspankum orqoman rirqaku. Tayta Diospa Arcanwan Moisesmi ichaqa campamentomanta mana lloqsirqakuchu.

⁴⁵ Hinaptinmi orqopi yachaq amalecitakunawan cananeokuna lloqsiramuspanku chay orqoman riq runakunata pasaypaqta venceramurqaku hinaspam Horma lawkama qatiramurqaku.