Números 10 - Chuya Qellqa 1992

Qollqe trompetakunamanta

¹ Moisestam Tayta Dios nirqa:

² Qollqemanta iskay trompetakunata ruway, chaykunataqa martillowanmi ruwanki. Chaykunam runakunata huñunapaq chaynataq maymi kasqankumanta ñawpaqman rinankupaqpas servikunqa.

³ Iskayninta tocachiptikim qampa ñawpaqnikiman asuykuwanaykichik carpapa punkunman lliw llaqta huñunakamunqaku.

⁴ Hukllanta tocachiptikiñataqmi, sapa ayllupi kamachikuqkunalla otaq Israel miraykunapi waranqa runakunapa kamachiqninkunalla qayllaykiman huñunakamunqaku.

⁵ Iskaynin trompetata guerrapaq hina tocachiptikiñataqmi intipa qespimunan lawpi samaqkuna lloqsinqaku.

⁶ Iskay kutikama guerrapaq hina tocachiptikiñataqmi sur lawpi samaqkuna lloqsinqaku. Chaynaqa, guerrapaq hina tocasqankum lloqsinankupaq señal kanqa.

⁷ Runakuna huñunakunanpaqqa amam guerrapaq hinachu tocanqaku.

⁸ Chay trompetakunataqa Aaronpa churin sacerdotekunam tocanqaku. Kayqa wiñaypaq kamachikuymi qamkunapaq chaynataq miraynikichikkunapaqpas kanqa.

⁹ Nacionnikichikpi kachkaptikichik ñakarichisuqnikichik enemigo contraykichikpi hamuptinqa guerraman lloqsinaykichikpaqmi trompetakunata tocankichik, chaynapim ñoqa Tayta Diosqa mana qonqarusqaykichikchu, hinaspam enemigoykichikmanta librasqaykichik.

¹⁰ Trompetakunataqa tocankichiktaqmi kusikunaykichik punchawkunapipas, fiestakunapipas, musoq killakunapipas, lliw kañana sacrificiota ofrecewaspaykichikpas chaynataq ñoqawan allinlla kasqaykichikmanta ofrendata ofrecewaspaykichikpas, chaynapim ñoqa Diosnikichik mana qonqasqaykichikchu. Ñoqa Tayta Diosmi Diosnikichik kani.

Sinaimanta lloqsisqankumanta

¹¹ Iskay kaq watamanña yaykuchkaptinkum, chay watapa iskay kaq killapa iskay chunka kaq punchawninpi, Tayta Diosman asuykuna carpapa hawanmanta puyu hoqarikururqa.

¹² Chaymi Israelpa mirayninkuna Sinaí chunniqmanta lloqsirqaku. Chay puyuñataqmi Parán chunniqpi sayarurqa.

¹³ Paykunam lloqsirqaku imaynam Moisesman Tayta Diospa kamachisqanman hina.

¹⁴ Puntatam Judá ayllupa banderan hinaspa tropankuna lloqsirqaku. Chay tropakunapa kamachiqninmi karqa Aminadabpa churin Naasón.

¹⁵ Isacar ayllu tropakunapa kamachiqninmi karqa Zuarpa churin Natanael.

¹⁶ Zabulón ayllu tropakunapa kamachiqninmi karqa Helonpa churin Eliab.

¹⁷ Tayta Diospa carpanta paskaruptinkum Gersonpa hinaspa Meraripa mirayninkuna chay carpata apaspanku lloqsirqaku.

¹⁸ Chaymantam Rubén ayllupa banderan hinaspa tropankuna lloqsirqaku. Paykunapa kamachiqninmi karqa Sedeurpa churin Elisur.

¹⁹ Simeón ayllu tropakunapa kamachiqninmi karqa Zurisadaipa churin Selumiel.

²⁰ Gad ayllu tropakunapa kamachiqninmi karqa Deuelpa churin Eliasaf.

²¹ Chaymantam Coat ayllukuna Diospaq sapaqchasqa kaqkunata apastin lloqsirqaku; samasqanku sitioman chayaspaqa, carpataqa tarirqaku sayachisqatañam.

²² Chaymantam Efraín ayllupa banderan hinaspa tropankuna lloqsirqaku. Paykunapa kamachiqninmi karqa Amiudpa churin Elisama.

²³ Manasés ayllu tropakunapa kamachiqninmi karqa Pedasurpa churin Gamaliel.

²⁴ Benjamín ayllukunapa kamachiqninmi karqa Gedeonipa churin Abidán.

²⁵ Chaymantam Dan ayllupa banderan hinaspa tropankuna lloqsirqaku. Paykunam rirqaku llapallan campamentokunapa qepanta. Paykunapa kamachiqninmi karqa Amisadaipa churin Ahiezer.

²⁶ Aser ayllu tropakunapa kamachiqninmi karqa Ocranpa churin Pagiel.

²⁷ Neftalí ayllu tropakunapa kamachiqninmi karqa Enanpa churin Ahiram.

²⁸ Chayna seqesllanpim Israelpa mirayninqa soldadokuna hina tropa-tropa sapa kuti lloqsiqku.

Cuñadonta paykunawan rinanpaq Moisés nisqanmanta

²⁹ Huk punchawmi Madián ayllu suegron Jetropa churin Hobabta Moisés nirqa: Tayta Diospa qowasqanku allpamanmi richkaniku, sichum ñoqaykuwan riptikiqa yanapasqaykikum. Israel ayllukunataqa Tayta Diosmi prometewarqaku yanapawanankupaq, nispa.

³⁰ Hinaptinmi cuñadon Hobab nirqa: Manam riymanchu, ñoqaqa llaqtaypi aylluykunapa kasqanmanmi kutikusaq, nispa.

³¹ Chaymi Moisés nirqa: Amayá saqeruwaykuchu, qamqa reqsinkim chunniqpi maypim samanayku sitiokunatapas, qamqa ñawiyku hina reqsichiwaqniykum kanki.

³² Ñoqaykuwan riptikiqa, Tayta Diospa tukuy allin kaqkuna qowasqankutam rakisqaykiku, nispa.

³³ Tayta Diospa orqonmantam kimsa punchaw puriyta rirqaku. Chay kimsan punchawmi Tayta Diospa Arcan ñawpaqninkuta rirqa, samanankupaq sitiota maskastin.

³⁴ Campamentomanta lloqsiruptinkum Tayta Diospa puyun paykunapa hawanta rirqa.

³⁵ Diospa Arcan apaqkuna puriyta qallaykuptinkum Moisés kaynata niq: ¡Dios Taytalláy, hatariy! ¡Enemigoykikuna cheqechisqa kachunku! ¡Cheqnisuqnikikuna qayllaykimanta lluptichunku! nispa.

³⁶ Diospa Arcan apaqkuna samaruptinkuñataqmi Moisés kaynata niq: ¡Dios Taytalláy, ñoqaykuman kutirikamuy! ¡Mana yupay atina Israelpa mirayninkunaman kutirikamuy! nispa.