Miqueas 1 - Chuya Qellqa 1992

Samaria llaqta castigasqa kananmanta

¹ Judá nacionpi rey Jotam, rey Acaz hinaspa rey Ezequías munaychakuchkaptinkum, Moreset llaqtayuq Miqueasta visionpi Tayta Dios rimapayarqa, Samaria llaqtatawan Jerusalén llaqtata imam pasananmanta.

² Kay pachapi llaqtakuna uyariychik, kay nacionpi runakuna uyariychik. Tayta Diosyá, Tukuy Atiyniyuq Señoryá, chuya templonmantapuni contraykichikpi testigo kachun.

³ Tayta Diosmi maymi kasqanmanta lloqsimuchkan, uraykamuspanmi kay pachapa hawanta puririmuchkan.

⁴ Ninapi chulluchisqa vela hinam orqokunapas chakinpa ukunpi chullurunqa. Achka yakupa wayqorusqan hinam qechwakunapas rakinakunqa.

⁵ Kaykunaqa pasakunqa Jacobpa mirayninkuna mana kasukusqanmantam, Israelpa mirayninkunapa huchanmantam. ¿Imataq Jacobpa mana kasukuynin? ¿Manachum Samaria llaqta? ¿Maytaq Judá nacionpa huchallikunan capillakuna? ¿Manachum Jerusalén llaqta?

⁶ Chayraykum Tayta Dios kaynata nin: Samaria llaqtata purmarachispaymi uvas tarpuna allpamanña tikrarusaq, ruminkunatapas qechwaman wikaparuspaymi cimientonkunatapas rikurirachisaq.

⁷ Idolonkunapas ñutupasqam kanqa, yupaychanan kullukunapas kañasqam kanqa. Chaykunaqa chuchumika kaspan ganakusqan qollqewan ruwasqam karqa, chayraykum huktawan chuchumikapa qollqenman tikrasqa kanqa, nispa.

Miqueaspa waqasqanmanta

⁸ Hinaptinmi nirqani: Hatun llakikuywanchá waqapakusaq, qala chakillachá purisaq, mana pachayuqchá purisaq, atoqkuna hinachá allwasaq, avestruzkuna hinachá qaparkachasaq.

⁹ Samariapa heridanqa mana hampiy atinam, chay heridanmi Judá nacionkamaña chayarun, yachanay llaqtapa punkunkamañam, Jerusalén llaqtapa punkunkamañam chayarun.

¹⁰ Amayá chayta Gat llaqtaman willaychikchu, ama llumpayta waqaychikchu. Bet-le-afra llaqtapa putyanpiyá nanaywan qochpaychik.

¹¹ Safir llaqtapi yachaqkuna, penqakuypaq qalalla ayqeychik. Zaanán llaqtapi yachaqkunapas manam lloqsinqakuchu. Bet-esel llaqtapipas waqayllañam kachkan, chayraykum mana yanapasunkichikmanchu.

¹² Marot llaqtapi yachaqkunapas allinyayta maskaspankum qewipakuchkanku, Tayta Diosmi Jerusalenpa punkunman ñakariyta kachaykamun.

¹³ Laquis llaqtapi yachaqkuna, qamkunam Sionpi yachaqkunata huchallichirqankichik, carretaykichiktayá caballokunaman wataychik.

¹⁴ Chayraykum Moreset-gat llaqtaman doteta qonkichik. Aczib llaqtapi wasikunapas Israelpa reyninkunapaqmi trampaña kanqa.

¹⁵ Tayta Diosmi kaynata nin: Maresa llaqtapi yachaqkuna, qamkunapa contraykichikpim ñakarichisuqnikichikta yapamanta pusamusaq, hinaptinmi Israelpi allinnin qarikunapas Adulam orqopi machaykunaman ayqenqaku.

¹⁶ Jerusalenpi yachaqkuna, wawa-churikichikmanta qaparkachaspa barbaykichikta rutukuychik, ullachku hina paqla uma kanaykichikkama umaykichiktapas ruturachikuychik, ancha kuyasqaykichik wawa-churikichikmi karu llaqtakunaman preso apasqa kanqaku.