Mateo 4 - Chuya Qellqa 1992

Jesusta diablo tentasqanmanta

¹ Chaymantam Jesusta purunman Espíritu aparurqa diablopa tentasqan kananpaq.

² Chaypim tawa chunka punchaw tawa chunka tuta mana mikusqa karqa, chaymantam yarqarachikurqa.

³ Hinaptinmi diabloñataq Jesusta tentananpaq asuykuspan nirqa: Sichum Diospa Churin kaspaykiqa kay rumikunatayá kamachiy tantayarunanpaq, nispan.

⁴ Hinaptinmi Jesús nirqa: Chuya Qellqam nin: “Runaqa manam tantallawanchu kawsan, aswanqa Diospa siminmanta lloqsimuq rimaykunawanmi”, nispan.

⁵ Chaymantam diablo aparurqa Jerusalén chuya llaqtaman, hinaspam templopa hawanpi sayaykachispan

⁶ nirqa: Sichum Diospa Churin kaspaykiqa kaymanta pawaykuy, qellqasqam kachkan: “Qamraykum waqaychasunaykipaq angelninkunata Dios kamachimunqa. Paykunam makinkupi chaskisunki, rumikunaman chakikita mana takakunaykipaq”, nispa.

⁷ Jesusñataqmi nirqa: Qellqasqataqmi kachkan: “Amam Señor Diosnikita tentankichu”, nispa.

⁸ Chaymantam diablo aparurqa alto-alto orqopa puntanman, hinaspam kay pachapi llapallan nacionkunatawan chaypi tukuy ima kaqkunata qawaykachirqa.

⁹ Hinaspam nirqa: Sichum qonqorakuykuspa hatunchawaki, hinaptinqa tukuy kaykunatam qosqayki nispan.

¹⁰ Jesusñataqmi nirqa: ¡Kaymanta anchuriy Satanás! qellqasqam kachkan: “Señor Diosllaykitam hatunchanki, payllatataqmi servinkipas”, nispa.

¹¹ Chaynapim diabloqa saqerurqa, angelkunañataqmi hamuspanku Jesusta servirqaku.

Jesuspa willakuy qallarisqanmanta

¹² Jesusmi, Juanpa carcelpi kasqanta yacharuspan Galilea lawman pasakurqa.

¹³ Nazaret llaqtamanta lloqsispam Galilea qochapa patanpi kaq Capernaúm llaqtapi yacharqa, chay llaqtaqa kachkan Zabulón hinaspa Neftalí lawpim.

¹⁴ Chaykunaqa pasakurqa profeta Isaiaspa qellqasqan cumplikunanpaqmi.

¹⁵ Paymi nirqa: “¡Zabulonpawan Neftalipa allpan, lamar qochapa hichpanpi kaq ñan, Jordán mayupa waklawninpi kaq allpan Dios mana reqsiq runakunapa yachanan Galilea llaqta.

¹⁶ Tutayaypi kawsaq llaqtam hatun achkiyta rikurun, wañuypa llantuyninpi kawsaqkunatam achkiy kanchaykun!” nispa.

¹⁷ Chaymantapacham Jesusqa kayna willakuyta qallarirqa: ¡Huchaykichikmanta wanakuychik, Diospa munaychakuyninmi hichparamunña! nispan.

Challwaqkunata Jesús qayasqanmanta

¹⁸ Galilea qochapa patanta richkaspanmi Pedrowan sutichasqa Simontawan wawqen Andresta Jesús rikururqa, paykunam challwaqkuna kasqankurayku mallawan challwachkarqaku.

¹⁹ Paykunatam Jesús nirqa: Qatiwaychik, runakuna challwaqtañam ruwasqaykichik, nispan.

²⁰ Chaymi mallankuta saqespanku Jesuswan chaylla pasakurqaku.

²¹ Chaymanta richkaspanmi Jesús rikururqa Jacobotawan wawqen Juanta, paykunam barcankupi mallankuta sirachkarqaku taytanku Zebedeopiwan kuska, chaymi paykunata Jesús qayarqa.

²² Hinaptinmi barcankutawan taytankuta saqespa Jesustaña chaylla qatikurqaku.

Achka runakunata Jesús yachachisqanmanta

²³ Jesusmi lliw Galilea llaqtapi purirqa, sinagogakunapi Diospa munaychakuyninmanta allin noticiata willakustin, tukuy rikchaq onqoyniyuqkunata hinaspa nanayniyuqkunata sanoyachistin.

²⁴ Jesuspa ancha reqsisqa kayninta yacharuspankum Siria lawpi kaqkunapas tukuy rikchaq onqoywan kaqkunata apamurqaku, nanaywan ñakariqkunata, demoniopa ñakarichisqankunata, wañuy mañayuqkunata hinaspa suchukunata, paykunatam Jesús sanoyachirqa.

²⁵ Achkallaña runakunam qatirqaku Galileamanta, Decapolismanta Jerusalenmanta, Judeamanta chaynataq Jordán mayupa waklawninpi kaqkunamantapas.