Mateo 17 - Chuya Qellqa 1992

Jesuspa rikchaynin tikrakurusqanmanta

¹ Soqta punchaw pasaruptinmi, Pedrota, Jacobota wawqen Juantawan pusarikuspan alto orqopa puntanman Jesús qespirqa.

² Chaypim paykunapa qayllanpi Jesuspa rikchaynin tikrakururqa. Uyanmi inti hina kancharirqa, pachanñataqmi achkiy hina yuraqyarurqa.

³ Hinaptinmi Moisestawan Eliasta Jesuswan parlachkaqta discipulonkuna rikururqaku.

⁴ Chaymi Jesusta Pedro nirqa: Señorlláy ¡allinmi kaypi kayniykuqa! Munaptikiqa kimsa chukllakunatayá ruwarusaqku, hukta qampaq, hukta Moisespaq, huktañataq Eliaspaq, nispa.

⁵ Pedro rimachkaptinmi kancharichkaq puyuñataq paykunata pampaykurqa, hinaptinmi puyumanta kaynata nimurqa: Paymi kuyasqay Churiy, payraykum kusisqa kachkani. Payta uyariychik, nispa.

⁶ Chayta uyariruspankum discipulonkunañataq qonqorakuykurqaku, hinaspam llumpayta mancharikurqaku.

⁷ Hinaptinmi paykunata llapchaykuspan Jesús nirqa: Hatariychik, ama manchakuychikchu, nispa.

⁸ Paykunañataqmi muyuriqninkuta qawarispanku manaña pitapas rikurqakuchu aswanqa Jesusllataña.

⁹ Orqomanta uraykamuchkaptinkum paykunata Jesús kamachirqa: Qawasqaykichik visiontaqa amam pimanpas willankichikchu runapa Churin kawsarimunankama, nispan.

¹⁰ Discipulonkunañataqmi Jesusta tapurqaku: ¿Imanasqataq Diospa leynin yachachiqkuna ninku: “Cristomanta ñawpaqtaqa Eliasmi hamunan”, nispanku?

¹¹ Chaymi Jesús nirqa: Arí, cheqaptaqa Eliasmi puntata hamunqa, paymi tukuy imata musoqmanta hatarichinqa.

¹² Chaywanpas nikichikmi, Eliasqa ñam hamurunña, ichaqa manam reqsirqakuchu, aswanmi paytaqa tukuy ima munasqankuta ruwarqaku. Chaynam runapa Churinpas paykunapa makinpi ñakarinqa, nispa.

¹³ Hinaptinmi discipulonkuna yacharurqaku Jesusqa Bautizaq Juanmanta rimasqanta.

Wañuy mañayuq warmata Jesús sanoyachisqanmanta

¹⁴ Runakunapa kasqanman chayaruptinkum, huk runa asuykuspan Jesuspa ñawpaqninpi qonqorakuykurqa, hinaspam nirqa:

¹⁵ Señorlláy, churillaytayá kuyapayariykuy, wañuymaña hapiptinmi llumpayta ñakarin, achka kutipim ninamanraq yakumanraq wichiykarin.

¹⁶ Discipuloykikunamanmi apamurqani, ichaqa manam sanoyachiyta atinkuchu, nispan.

¹⁷ Chaymi Jesusñataq nirqa: ¡Mana iñiyniyuq huchasapa miraykuna! ¿haykapikamataq qamkunawan kasaq? ¿Haykapikamataq aguantasqaykichik? Chay warmata kayman apamuychik, nispa.

¹⁸ Aparamuptinkum demoniota Jesús qaqcharqa, chaymi warmamanta demonio lloqsiruptin sanoyarurqa.

¹⁹ Chaymantam discipulonkuna Jesusman asuykuspa sapallankupi tapurqaku: ¿Imanasqataq demonio qarqoyta mana atirqanikuchu? nispanku.

²⁰ Chaymi Jesusñataq nirqa: Pisi iñiyniyuq kasqaykichikraykum. Cheqaptapuni nikichik, sichum iñiynikichik huk mostazapa muhun hinallapas kaptinqa, kay orqotam niwaqchik: “Kaymanta waklawman suchuy” nispa, hinaptinqa pasanmanmi. Manam imapas sasaqa kanmanchu, nispan.

²¹ [Kayna demoniotaqa ayunaspa hinaspa Diosta mañakuspallam qarqona], nispa.

Wañunanmanta huktawan Jesús willakusqanmanta

²² Galileapi kachkaptinkum, paykunata Jesús nirqa: Runapa churintam llapa runakunaman hapiykachiptinku

²³ wañurachinqaku, ichaqa kimsa punchawmantam kawsarimunqa, nispan. Chayta uyariykuspankum discipulonkuna llumpayta llakikururqaku.

Templopaq impuestomanta

²⁴ Capernaúm llaqtaman chayaruptinkum, templopaq impuesto cobraqkunam Pedroman asuykuspanku kaynata tapurqaku: ¿Yaqachu Yachachiqniki templopaq impuestota pagan? nispanku.

²⁵ Pedroñataqmi nirqa: Payqa paganmi, nispan. Chaymantam wasiman Pedro yaykuruptin puntata rimapayaspan Jesús tapurqa: ¿Imaninkitaq Simón? ¿Pikunamantataq kay pachapi reykuna impuestota cobranku, churinkunamantachu icha sapaq runakunamantachu? nispan.

²⁶ Pedroñataqmi nirqa: Sapaq runakunamantam, nispa. Hinaptinmi Jesús nirqa: Chaynaqa, churinkunaqa manam pagankuchu.

²⁷ Ichaqa ama pitapas piñachinanchikpaqyá lamar qochaman rispa anzuelota chamqamuy, hinaspam punta challwa hapisqaykipa siminta kicharuspa huk qollqeta tarinki, chaytam iskayninchikmanta pagaykamunki, nispa.