Mateo 16 - Chuya Qellqa 1992Milagrokuna ruwananpaq Jesusta mañakusqankumanta ( Mr 8.11-13 . Lc 12.54-56 ) 1 Fariseokunawan saduceokunam tentanankupaq Jesusman asuykurqaku, hinaspam Diosmanta hamusqanta yachanankupaq huk milagrota ruwananpaq mañakurqaku. 2 Jesusñataqmi nirqa: Tardenmi antaqata rikuspa ninkichik: “Allin tiempom kanqa”, nispaykichik. 3 Pacha achikyaytañataqmi puyutawan antaqata rikuspa ninkichik: “Wayra-param kanqa”, nispaykichik. ¡Iskay uyakuna! Qamkunaqa cielopi kaqkunata qawaspam imaynam tiempo kananta yachankichik; chaynaqa ¿imanasqataq kunan tiempokunapi imakunam pasakusqanmantaqa mana kaqpaqpas hapinkichikchu? 4 Kay mana kasukuq huchasapa runakunaqa, milagrotaraqmi mañakunkupas, ichaqa manam milagroqa ruwasqachu kanqa, aswanqa profeta Jonasta imam pasasqallanmi paykunapaq señal kanqa, nispan. Chaynata niruspanmi paykunata saqeruspan Jesús pasakurqa. Levaduramanta ( Mr 8.14-21 ) 5 Jesuspa discipulonkunam lamar qochapa waklaw chimpanman chayarurqaku, ichaqa tanta apaytam qonqarusqaku. 6 Chaymi Jesús nirqa: Fariseokunapa hinaspa saduceokunapa levadurankumanta cuidakuychik, nispa. 7 Hinaptinmi discipulonkuna ninakurqaku: Tantata mana apamusqanchikraykum chaynataqa nichkan, nispanku. 8 Jesusñataqmi chayta musyaruspan nirqa: Yaw, pisi iñiyniyuq runakuna, ¿imanasqataq nichkankichik: “Manam tantanchik kanchu”, nispaykichik? 9 ¿Manachu entiendenkichik? ¿Manachu yuyankichik pichqa waranqa qarikunapaq pichqa tantata haypachisqayta? ¿Hayka canastatataq puchuqninkunata huñurqankichik? 10 ¿Manataqchu yuyankichik qanchis tantata tawa waranqa runapaq haypachisqaytapas? ¿Hayka canasta huntatataq puchuqta huñurqankichik? 11 “Fariseokunapa hinaspa saduceokunapa levaduranmanta cuidakuychik” nispayqa, manam tantamantachu rimarqaniqa. ¿Imanasqamá manaqa entiendenkichikchu? nispan. 12 Chayñam yachaykurqaku Jesusqa mana tanta ruwana levaduramantachu rimasqanta, aswanqa fariseokunapa hinaspa saduceokunapa yachachikuyninmanta cuidakunankupaq nisqanta. Jesusqa Cristo kasqanmanta ( Mr 8.27-30 . Lc 9.18-21 ) 13 Cesarea de Filiposwan sutichasqa llaqtaman Jesús chayaruspanmi discipulonkunata tapurqa: ¿Llapa runakunaqa pim ninkutaq runapa Churinmanta? nispa. 14 Chaymi paykunañataq nirqaku: Wakinmi ninku Bautizaq Juanmi nispanku, wakinñataqmi ninku Eliasmi, Jeremiasmi otaq hukkaqnin profetam, nispanku. 15 Jesusñataqmi nirqa: ¿Qamkunaqa pim kasqaytataq ninkichik? nispan. 16 Hinaptinmi Simón Pedro nirqa: Qamqa kanki kawsaq Diospa Churin Cristom, nispa. 17 Chaymi Jesús nirqa: Jonaspa churin Simón, mayna kusisqam kanki, kaytaqa manam runachu qawachisurqanki, aswanqa hanaq pachapi kaq Taytaymi. 18 Chaymi ñoqapas niki, qamqa Pedrom kanki, kay rumipa hawanpim iglesiayta hatarichisaq, paytaqa wañuypa atiyninpas manam vencenqachu. 19 Diospa munaychakuyninpa llavenkunatam qosqayki; kay pachapi watasqaykim hanaq pachapipas watasqa kanqa, kay pachapi paskasqaykiñataqmi hanaq pachapipas paskasqa kanqa, nispa. 20 Hinaspam discipulonkunata kamachirqa: Amam pimanpas Cristo kasqaytaqa willankichikchu, nispan. Wañunanmanta Jesuspa willakusqanmanta ( Mr 8.31—9.1 ; Lc 9.22-27 ) 21 Chaymantapunim discipulonkunaman Jesús willakurqa Jerusalenman riptin judiokunapa chaynataq sacerdotekunapa kamachiqninkuna hinaspa Diospa leynin yachachiqkuna ñakarichinankumanta. Willakurqataqmi wañurachiptinku kimsa punchawninman kawsarimunantapas. 22 Chaymi Pedroñataq huklawchaman pusaruspan Jesusta nirqa: Amayá Diospas munachunchu chaykuna pasasunaykitaqa, nispan. 23 Hinaptinmi muyuriykuspan Pedrota Jesús nirqa: ¡Anchuy ñawpaqniymanta Satanás! Qamqa pantachiwaytam munachkanki, qamqa manam Diospa munasqanman hinachu tanteanki, aswanqa runakunapa tanteasqanman hinallam, nispan. 24 Chaymantam discipulonkunata nirqa: Pipas qatiwayta munaspaqa amaña kikillanpaq kawsaspayá cruzninta qepikuykuspa qatiwachun. 25 Pipas vidallan salvay munaqqa pierderunqam, pipas ñoqarayku wañuqmi ichaqa kawsanqa. 26 ¿Imatataq runa hurqokunman kay pachapi kaqkunata ganaruspan vidantañataq pierderuspan? ¿Haykatataq runa paganman vidanta salvananpaq? 27 Runapa Churinqa Taytanpa atiyninwan huntarisqam angelninkunawan hamunqa, hinaspam sapakamaman imam ruwasqanman hina pagapunqa. 28 Cheqaptapunim nikichik, kaypi kaqkunamantaqa achkaqmi mana wañunqakuchu runapa Churinta munaychakunanpaq hamuqta rikunankukama. |
Chuya Qellqa Revisión @ Sociedad Bíblica Peruana, 2012
Peruvian Bible Society