Lucas 7 - Chuya Qellqa 1992

Capitanpa serviqninta Jesús sanoyachisqanmanta

¹ Runakunaman willayta tukuruspanmi Capernaúm llaqtaman Jesús chayarurqa.

² Chaypim capitanpa ancha kuyasqan serviqnin onqoruspa wañuy patanpiña kachkarqa.

³ Jesusmanta rimasqankuta chay capitán uyariruspanmi, judiokunapa kamachiqninkunata kacharqa ruegakamuptinku hamuspan onqoq serviqninta sanoyaykachinanpaq.

⁴ Chaymi Jesuspa kasqanman chayaruspanku anchallataña ruegakuspa nirqaku: Yanapaykunaykipaq hinam kay capitanqa.

⁵ Payqa nacionninchikta anchata kuyaspanmi sinagogaykutapas ruwachipuwarqaku, nispanku.

⁶ Chaymi paykunawan Jesús rirqa. Ichaqa wasipa hichpanpiña kachkaptinkum, chay capitanqa amistadninkunawan nichimurqa: Señorlláy, amayá piñakuychu, manam wasiyman yaykuykamunaykipaq hinachu kallani.

⁷ Chayraykum maskaqnikipas mana kikiychu hamurqani, rimariykuptillaykim serviqniyqa sanoyarunqa.

⁸ Ñoqapas kamachiwaqniykunatam kasukuni, soldadoykunapas kamachiptiyqa kasuwankum. Sichum hukninta “riy” niptiyqa rinmi, huknintapas “hamuy” niptiyqa hamuntaqmi. Serviqniyta imatapas ruwananpaq kamachiptiyqa ruwanmi, nispa.

⁹ Chayna nisqanwan admirakuspanmi qatiqninkunata qawarispan Jesús nirqa: Israelpipunipas manam kayna iñiyniyuq runataqa tarirqanichu, nispa.

¹⁰ Chaymi Jesusman taripaqkunaqa wasiman kutispanku, capitanpa serviqnintaqa sanotaña tariykurqaku.

Viudapa wawanta Jesús kawsarichisqanmanta

¹¹ Chaykunapa qepantam Jesusqa discipulonkunawan hinaspa achkallaña runakunawan kuska Naín llaqtaman rirqaku.

¹² Llaqtapa punkunman hichpaykuchkaptinkum, huk viudapa sapallan qari wawan wañuruptin pampaq apachkarqaku. Llaqta runakunapas achkallañam pampaysiq rirqaku.

¹³ Chayta qawaykuspanmi Jesusñataq chay viudata llakipayarispan nirqa: Ama waqaychu, nispa.

¹⁴ Hinaspam chakanaman asuykuspa llapchaykurqa, hinaptinmi llapa wantuqkunapas sayarurqaku, chaymi ayata Jesús nirqa: Yaw joven, qamtam niki, ¡hatariy! nispa.

¹⁵ Chaymi wañusqanmanta kawsariruspa rimayta qallaykurqa, chaymi Jesusñataq mamanman qoykurqa.

¹⁶ Chaypi kaqkunañataqmi llumpayta mancharikurqaku, chaymi Diosta kaynata nispa yupaycharqaku: Chawpinchikpim hatun profeta hatarirun. Diosmi yanapaykunanpaq llaqtanta watukaykamun, nispanku.

¹⁷ Jesuspa kaykuna ruwasqanmi tukuy Judea lawpi chaynataq muyuriqnin llaqtakunapipas willakusqa karqa.

Bautizaq Juanpa kachasqankunamanta

¹⁸ Jesuspa tukuy ruwasqankunata Bautizaq Juanpa discipulonkuna yacharuspankum Juanman willarqaku. Juanñataqmi iskay discipulonkunata qayaykuspan

¹⁹ Jesusta tapuchimurqa: ¿Qamchu Diosmanta hamuq kachkanki, icha huktachu suyasaqku? nispa.

²⁰ Chaymi paykunañataq Jesuspa kasqanman rispanku nirqaku: Bautizaq Juanmi kachamuwanku: “¿Qamchu Diosmanta hamuq kachkanki, icha huktachu suyasaqku?” nispanku.

²¹ Jesusñataqmi chay ratollapi achka runakunata tukuy rikchaq onqoyninkumanta, nanayninkumanta, mana allin espiritupa ñakarichisqanmanta sanoyachirqa, chaynataqmi ñawsakunatapas qawirichirqa.

²² Hinaspanmi Juanpa kachamusqankunata nirqa: Kutispa qawasqaykichiktawan uyarisqaykichikta Juanman willamuychik. Ñawsakunam qawakuchkanña, suchukunam purichkanña, leprawan onqoqkunam sanoyachkanña, mana uyarikuqkunam uyarikuchkanña, wañusqakunam kawsariramunña, wakchakunapas evangeliotam uyarichkankuña, nispaykichik.

²³ Mayna kusisqam mana iskayrayaspa ñoqapi hapipakuqkunaqa, nispa.

²⁴ Juanpa kachamusqankuna kutiruptinkum, Juanmanta rimaspan runakunata Jesús tapurqa: ¿Ima qawaqtaq purunta rirqankichik? ¿Wayrapa kuyuchisqan soqosta qawaqchu?

²⁵ ¿Pi qawaqtaq rirqankichik? ¿Allin pachawan pachasqa runata qawaqchu? Allin pachawan churakuq runakunaqa fiestakunapi hinaspa reykunapa palacionpim kachkanku.

²⁶ Chaynaqa, ¿pi qawaqtaq rirqankichik? ¿Huk profetata qawaqchu? Arí, cheqaptapunim nikichik, payqa profetamantapas masmi.

²⁷ Juanmantam qellqasqa kachkan: “Ñoqam willakuqniyta qanmanta puntata kachasaq, paymi ñannikita allichanqa”, nispa.

²⁸ Cheqaptapunim nikichik, warmimanta nacemuq runakunamantaqa manam pipas Bautizaq Juan hinaqa kanchu. Chaywanpas Diospa munaychakuyninpi kaqkunamanta taksan kaqmi Juanmantapas aswan hatunqa.

²⁹ Juanpa willakuyninta uyariqkunaqa, Romapaq impuesto cobraqkunawan kuskam Juanwan bautizachikurqaku, chaynatam Diospa kamachikuyninta cumplirqaku.

³⁰ Fariseokunawan Diospa leynin yachachiqkunam ichaqa mana Juanwan bautizachikurqakuchu, chaynatam paykunapaq Diospa imam munasqanta wischupakurqaku.

³¹ Jesusqa nirqataqmi: ¿Imamantaq tupachiyman kunan tiempo miraykunata? ¿Imamantaq rikchakunmanku?

³² Paykunaqa rikchakun plazakunapi pukllaspan qayaykachanakuq warmakunamanmi. Paykunam ninakunku: “Qenata tocaptiykupas manam tusurqankichikchu, aya takita takiptiykupas manam waqarqankichikchu”, nispanku.

³³ Bautizaq Juanmi hamurqa, payqa manam mikurqachu nitaqmi vinotapas tomarqachu, hinaptinmi nirqankichik: “Payqa demoniopa huntasqanmi” nispaykichik.

³⁴ Runapa Churin hamuruspa mikuptin vinotapas tomaptinñataqmi ninkichik: “Kay runaqa mikuysapa hinaspa vino upyakuqmi, impuesto cobraqkunapa chaynataq huchasapakunapa amistadninmi”, nispaykichik.

³⁵ Diospa yachayninqa churinkunapa ruwayninpim qawachikun, nispa.

Jesusman perfumeta huk warmipa tallisqanmanta

³⁶ Hukkaqnin fariseom Jesusta convidarqa wasinpi mikuykamunanpaq, chaymi rispan mesapi tiyaykurqa.

³⁷ Hinaptinmi chay llaqtapi kaq huchasapa warmiñataq, fariseopa wasinpi Jesús kasqanta yacharuspan, rumimanta pomochapi perfume aparisqa chayaramurqa.

³⁸ Hinaspanmi waqaspan Jesuspa qepanpi qonqorakuykuspan chakinkunata weqenwan mayllaspan chukchanwanñataq chakichirqa, hinaspam muchaykuspan perfumeta talliykurqa.

³⁹ Convidaqnin fariseoñataqmi chayta qawaykuspan piensarqa: “Sichum kay runa cheqaptapuni profeta kaspanqa, yachanmanmi imayna clasem chay llapchaqnin warmi kasqanta, kay warmiqa huchasapam”, nispan.

⁴⁰ Chaymi Jesusñataq nirqa: Simón hukmi ninay kachkan, nispa. Simonñataqmi nirqa: Yachachikuq, chaynaqa niykuwayá, nispan.

⁴¹ Hinaptinmi Jesusñataq nirqa: Qollqe prestaq runatam iskay runakunam debekurqa. Hukninmi prestakurqa pichqa pachakta, hukninñataqmi pichqa chunkallata.

⁴² Mana imaynapas pagayta atiptinkum iskayninta pampachaykurqa. Chaynaqa, ¿mayqanninkutaq masta kuyanqa? nispa.

⁴³ Chaymi Simonñataq nirqa: Ñoqamantaqa achkanpi debekuqmi mastaqa kuyanqa, nispa. Hinaptinmi Jesusñataq nirqa: Allintam nirunki, nispa.

⁴⁴ Chaymantam warmita qawarispan Simonta nirqa: ¿Qawachkankichu kay warmita? Wasikiman yaykuykamuptiyqa manam yakutapas chakiyta mayllakunaypaq qoykuwarqankichu, kay warmim ichaqa weqenkunawan chakiykunata mayllaykun, hinaspam chukchanwan chakiykachin.

⁴⁵ Manam muchaykuwarqankichu, kay warmim ichaqa yaykuykamusqanmantapuni chakiykunata muchapayachkan.

⁴⁶ Aceitewanpas manam umaymanqa tallirqankichu, kay warmim ichaqa perfumewanraq chakiykunaman talliykun.

⁴⁷ Chayraykum niki, achka-achka huchankunam pampachasqa, chayraykum payqa llumpayta kuyawan. Pipas pisilla huchanmanta pampachasqam ichaqa pisillatataq kuyakunpas, nispa.

⁴⁸ Chaynata niruspanmi warmitañataq nirqa: Huchaykikunaqa pampachasqañam, nispan.

⁴⁹ Jesuswan kuska convidasqa kaqkunañataqmi ninakurqaku: ¿Pitaq kay runaqa huchakunatapas pampachananpaqqa? nispanku.

⁵⁰ Jesusñataqmi warmita nirqa: Iñiynikim salvarusunki, kunanqa hawkañayá pasakuy, nispan.