Lucas 5 - Chuya Qellqa 1992

Achkallataña challwarusqankumanta

¹ Genesaret qochapa patanpi Jesús kachkaptinmi, llapa runakuna huñunakaramurqaku paytapas kichkichanankukama Diospa palabranta uyarinankupaq.

² Hinaptinmi Jesusqa iskay barcakunata qochapa patanpi rikururqa. Challwaqkunañataqmi barcankumanta lloqsispa mallankuta mayllachkarqaku.

³ Chaymi Jesusqa Simón Pedropa barcanman qespiykuspan payta ruegakurqa uku lawman tanqariykunanpaq, hinaspanmi barcapi tiyaykuspan runakunata yachachirqa.

⁴ Rimayta tukuruspanmi Simonta nirqa: Uku lawman barcaykita apaspa challwanaykichikpaq mallaykichikta wischuychik, nispa.

⁵ Chaymi Simonñataq nirqa: Yachachikuq, tukuy tutam llamkarqaniku, ichaqa manam hukllatapas hapirqanikuchu, ichaqa nisqaykiman hinayá mallata wischumusaq, nispa.

⁶ Chaynata ruwaspankum mallankupas yaqa llikinankama achkallataña challwarurqaku.

⁷ Hinaspam yanapachikunankupaq señaschaspanku huknin barcapi challwaqmasinkunata qayakurqaku, chaymi paykuna asuykuptinku yaqa yakuman chinkaykunankama iskaynin barcaman challwata huntarachirqaku.

⁸ Chayta Simón Pedro qawaykuspanmi Jesuspa ñawpaqninpi qonqorakuykuspan nirqa: Señor, ñoqamanta asurikuy, huchasapa runam kallani, nispan.

⁹ Simonmi llamkaq masinkunapiwan achkallataña challwarusqankurayku mancharikurqaku.

¹⁰ Mancharikurqataqmi Simonpa challwaqmasin Juanwan Jacobopas, paykunaqa Zebedeopa churinkunam karqaku. Chaymi Simonta Jesús nirqa: Ama manchakuychu, kunanmantaqa runakunatañam challwamunki, nispa.

¹¹ Chaymi qochapa patanman barcankuta chayarachispanku, chaypi tukuy imankuta saqespa Jesusta qatikurqaku.

Leprawan onqoqta Jesús sanoyachisqanmanta

¹² Huk kutipim Jesús huk llaqtapi kachkarqa, chaymi leprawan onqoq runa hamuruspan Jesuspa ñawpaqninpi qonqorakuykuspan ruegakurqa: Señorlláy, munaspaykiqa sanoyaykachiway, nispan.

¹³ Jesusñataqmi llapchaykuspan nirqa: Arí, munanim, sanoyayña, nispa. Hinaptinmi chaypunilla chay lepra onqoynin chinkarurqa.

¹⁴ Chaymi Jesús nirqa: Amam pimanpas willakunkichu, aswanqa sacerdoteman rispaykim paywan qawachikamunki, hinaspam sanoña kasqaykita yachanankupaq ofrendata qomunki Moisespa kamachisqanman hina, nispa.

¹⁵ Chaywanpas Jesusmanta rimay aswan-aswan uyarikuptinmi, payta uyarinankupaq hinaspa onqoyninkumanta sanoyachinanpaq llapa runakuna huñunakamurqaku.

¹⁶ Jesusmi ichaqa mana runapa kasqan chunniqkunaman asurikuspan Diosta chaypi mañakuq.

Suchu runata Jesús sanoyachisqanmanta

¹⁷ Huk punchawmi Jesús yachachichkarqa, chaypitaqmi fariseokunapas Diospa leynin yachachiqkunapas tiyachkarqaku, paykunaqa Galilea lawpi hinaspa Judea lawpi llaqtakunamantawan Jerusalenmantam hamurqaku. Diospa atiyninmi Jesuswan karqa onqoqkunata sanoyachinanpaq.

¹⁸ Chaypi kachkaptinmi huk runakuna suchuta chakanapi aparisqa chayaramurqaku, hinaspankum chay suchuta Jesuspa ñawpaqninman apaykuyta munarqaku.

¹⁹ Ichaqa achka runakuna kasqanraykum mana apaykuyta atirqakuchu, hinaspam wasipa qatanta toqoramuspanku chaynintakama Jesuspa ñawpaqninman uraykachirqaku.

²⁰ Chaymi Jesusñataq paykunapa iñiyninta qawaykuspan chay suchuta nirqa: Huchaykikunaqa pampachasqañam, nispa.

²¹ Diospa leynin yachachiqkunawan fariseokunañataqmi kaynata piensarqaku: “¿Pitaq kay runaqa karqa Diospa contranpi rimananpaqqa? Diosllam huchataqa pampachan”, nispanku.

²² Chayna piensasqankuta yachaspanmi Jesusñataq nirqa: ¿Imanasqataq chaynakunata piensankichik?

²³ ¿Mayqantaq fácil kanman: “Huchaykikunaqa pampachasqañam” niychu, icha: “Hatarispayki puriyña”, niychu?

²⁴ Kunanmi yachankichik runapa Churinqa huchakunata pampachananpaq kay pachapi atiyniyuq kasqanta, nispan. Chaynata niruspanmi suchutañataq nirqa: Qamtam niki, hatarispayki chakanaykita hoqarispa wasikiman ripukuy, nispa.

²⁵ Suchuñataqmi llapallanku qawachkaptinku chaylla hatariruspan chakananta hoqarispan Diosta yupaychastin wasinman ripukurqa.

²⁶ Chaymi lliw admirakuspanku Diosta yupaycharqaku, hinaspam ancha mancharisqallaña nirqaku: ¡Kunanqa admirakuypaq kaqkunatam rikuykunchik! nispanku.

Leviyta Jesús qayasqanmanta

²⁷ Jesusmi chaymanta pasaspan rikururqa Romapaq impuesto cobraq Leviyta, impuesto cobrananpi tiyachkaqta, hinaspanmi nirqa: Qatiway, nispan.

²⁸ Chaymi Leviyqa tukuy imantapas saqeruspan Jesusta qatirqa.

²⁹ Paymi Jesuspaq hatun convidota wasinpi ruwachirqa. Hinaptinmi Romapaq impuesto cobraqkunawan achkallaña runakuna paykunawan kuska mikurqaku.

³⁰ Chaymi Diospa leynin yachachiqkunawan fariseokunañataq Jesuspa discipulonkunapa contranpi rimaspanku nirqaku: ¿Imanasqataq qamkunaqa impuesto cobraqkunawan hinaspa huchasapakunawan kuska mikuspa upyachkankichik? nispanku.

³¹ Hinaptinmi Jesusñataq nirqa: Sano runakunaqa manam medicotaqa necesitankuchu, aswanqa onqoqkunallam.

³² Ñoqaqa manam sano runakuna qayaqchu hamurqani, aswanqa huchasapakunata qayaqmi, chaynapi Diosman kutirikunankupaq, nispa.

Ayunomanta tapukuy

³³ Wakin runakunañataqmi Jesusta tapurqaku: ¿Imanasqataq Bautizaq Juanpa chaynataq fariseokunapa discipulonkunaqa chaylla-chaylla ayunanku hinaspa Diostapas llumpayta mañakunku, discipuloykikunañataq mikuyllapi hinaspa upyayllapi kakuchkanku? nispanku.

³⁴ Hinaptinmi Jesusñataq nirqa: ¿Yaqachu paykunawanraq novio kachkaptin casamientoman riq runakunata ayunachiwaqchik?

³⁵ Ichaqa chayamunqam punchaw paykunamanta novio qechusqa kananpaq, hinaptinmi ichaqa ayunanqaku, nispa.

³⁶ Jesusqa kay rikchanachiytapas nirqataqmi: Manam pipas mawka pachataqa musoq pachata llikispanqa remiendanmanchu. Chaynata ruwaspanqa musoq pachatam yanqacharunqa, mawka pachaman serasqanpas manataqmi tupanqachu.

³⁷ Manataqmi pipas mawka odrekunamanqa mana poqosqa vinotaqa hillpunmanchu, yanqañataqmi chay vino poqoruspan mawka odrekunata toqyarachinman, hinaptinmi vinopas usunman, chaynataqmi odrekunapas mana valeqñam kanman.

³⁸ Mana poqosqa vinotaqa musoq odrekunamanmi hillpuna.

³⁹ Manam pipas poqosqa vinota upyachkaspaqa, mana poqosqa vino upyaytaqa munanmanchu, aswanqa ninqam: “Poqosqa vinom aswan allinqa”, nispan.