Lucas 21 - Chuya Qellqa 1992

Viudapa ofrendanmanta

¹ Jesusmi qawachkarqa, ofrenda churanankuman apukunapa ofrenda churasqankuta.

² Rikurqataqmi wakcha viudapa iskay qollqechakuna churasqantapas.

³ Chaymi nirqa: Cheqaptapunim nikichik, kay wakcha viudam llapallan apukunamantapas mastaqa churarun.

⁴ Paykunaqa puchuqllankumantam ofrendankutaqa churarqaku, kay viudam ichaqa wakcha kayninpi vida pasananpaq kaqta lliwta churaykun, nispa.

Templo tuñichisqa kananmanta

⁵ Kuyayllapaq rumikunawan hinaspa Diosman qosqa sumaq adornokunawan ruwasqa templomanta qawaspa wakiqninku rimaptinkum Jesusñataq nirqa:

⁶ Hamunqam punchaw, kay qawasqaykichikmantaqa manam chulla rumillapas perqasqaqa qepanqachu, lliwmi tuñichisqa kanqa, nispa.

Tukupay punchawkunapi imakunam pasakunanmanta

⁷ Chaymi Jesusta tapurqaku: Yachachikuq ¿haykapitaq kay nisqaykikunaqa pasakunqa? ¿Ima señaltaq kanqa manaraq chaykuna pasakuchkaptinqa? nispanku.

⁸ Jesusñataqmi nirqa: Pipas pantachisunaykichikmantayá allinta cuidakuychik. Achkaqmi sutiypi hamunqaku: “Ñoqam kani Cristo, ñam tiempoqa chayaramunña”, nispanku. Ichaqa amam paykunataqa kasunkichikchu.

⁹ Guerrakunamanta hinaspa chaqwakunamanta uyarispaykichikqa amam manchakunkichikchu. Chaykunam puntataqa pasakunqa, ichaqa manam kay tiempopa tukupayninraqchu.

¹⁰ Huk nacionmi huklaw nacionwan peleanqa, chaynallataqmi huk munaychakuypas huk munaychakuywan peleanqa.

¹¹ Tukuy hinastinpim hatun terremotokuna, muchuykuna hinaspa onqoykuna kanqa. Cielopipas manchakuypaq hatun señalkunam kanqa.

¹² Ichaqa manaraq chaykuna pasakuchkaptinmi, presochasqa hinaspa qatikachasqa kankichik. Sinagogakunaman hinaspa carcelkunaman apasqam kankichik. Ñoqaraykum reykunapa hinaspa gobernadorkunapa qayllanman apasqa kankichik.

¹³ Chaykunaqa pasasunkichik ñoqamanta willakunaykichikpaqmi.

¹⁴ Amayá puntataqa yuyaymanaychikchu imaynam rimarikuytaqa.

¹⁵ Ñoqam qosqaykichik yachaywan rimaytaqa, chaynapim mayqan enemigoykichikpas mana kutipakuyta atisunkichikchu.

¹⁶ Qamkunaqa tayta-mamaykichikpa, wawqekichikkunapa, aylluykichikkunapa hinaspa amistadnikichikkunapa traicionasqanmi kankichik. Wakiqnikichiktam wañuchisunkichik.

¹⁷ Ñoqaraykum llapallan runakuna cheqnisunkichik.

¹⁸ Chaywanpas manam umaykichikpi chulla chukchallaykichikpas chinkanqachu.

¹⁹ Pipas allinta takyaqmi salvakunqa.

²⁰ Jerusalenpa muyuriqninpi tropakunata qawaspaqa, chay llaqtapa purmachisqa kanan tiempo chayaramusqantañayá yachaychik.

²¹ Chaynaqa, Judeapi kaqkunayá orqokunaman ayqeychik, Jerusalén llaqtapi kaqkunapas chay llaqtamantayá lloqsiychik. Chakrapi kaqkunapas amañayá llaqtamanqa kutiykuychikñachu.

²² Chay punchawkunaqa Qellqapa nisqankuna cumplikunanpaqmi Diospa castiganan punchawkuna kanqa.

²³ ¡Chay punchawkunapi wiksayuq otaq ñuñuq wawayuq warmikuna imaynaraq kanqaku! Kay allpapim hatun ñakariy kakunqa, kay llaqtapas castigasqam kanqa.

²⁴ Wakinmi espadawan wañuchisqa kanqaku, wakinñataqmi huklaw nacionkunaman preso apasqa kanqaku. Jerusalén llaqtapas Diosta mana reqsiqkunapa sarupasqanmi kanqa, chaynaqa kanqa Diosta mana reqsiqkunapa munaychakunan tiempo tukunankamam.

Jesucristopa kutimunanmanta

²⁵ Señalkunam kanqa intipi, killapi hinaspa chaskakunapi. Kay pachapi runakunapas, lamar qochapa hinaspa olakunapa qapariyninwanmi pantaypi hina kaspanku mancharisqallaña kanqaku.

²⁶ Kay pachata imam pasananmanta yuyaymanaspankum runakunapas wañunayanqaku; cielopi atiyniyuqkunapas katkatatanqakum.

²⁷ Chaymantam runapa Churinta hatun atiyninwan hinaspa kanchariyninwan puyupi hamuchkaqta rikuykunqaku.

²⁸ Kaykuna pasakuyta qallaykuptinqa kallpanchakuspayá umaykichikta hoqariychik, librasqa kanaykichikmi hichpaykamuchkanña.

²⁹ Huk rikchanachiytapas nirqataqmi: Higos sachatawan wakin sachakunata qawariychik.

³⁰ Llaqenkuna ikllimuqta qawaspaykichikqa poqoy tiempo hichpamusqantañam yachankichik.

³¹ Chaynaqa, tukuy kaykuna pasakusqanta qawaspaykichikmi yachankichik Diospa munaychakuyninqa hichpamusqantaña.

³² Cheqaptapunim nikichik, tukuy kaykunaqa cumplikunqa manaraqpas kay miraykuna tukuchkaptinmi.

³³ Hanaq pachawan kay pachapas tukunqam, palabraykunam ichaqa wiñaypaq takyanqa.

³⁴ Allintayá cuidakuychik, amayá viciokunawan, machakuykunawan hinaspa kay pachapi imamantapas afanakuykunawan sonqoykichikta rumiyarachiychikchu, yanqañataq chay punchawqa qonqayta chayaramusunkichikman.

³⁵ Toqlla hinam kay pachapi llapallan runakunata qonqayllamanta hapiramunqa.

³⁶ Rikchapalla kaspayá tukuy tiempopi mañakuychik, tukuy kaykuna hamuqmanta lluptinaykichikpaq, chaynapi runapa Churinpa qayllanman yaykunaykichikpaq.

³⁷ Jesusmi templopi sapa punchaw yachachiq, tutañataqmi Olivos moqoman riq chaypi kamunanpaq.

³⁸ Llapa runakunañataqmi sapa tutapayta temploman riqku Jesuspa yachachisqanta uyarinankupaq.