Lucas 18 - Chuya Qellqa 1992

Juezmantawan viudamanta

¹ Mana pisipaspa Diosta tukuy tiempo mañakunamanta yachachispanmi kay rikchanachiyta Jesús nirqa:

² Huk llaqtapim karqa Diosta mana manchakuq hinaspa runakunatapas mana respetaq juez.

³ Chay llaqtapitaqmi huk viudapas yacharqa, paymi chay juezman rispan cheqniqnin runawan quejanakusqanta allichaykapunanpaq mañakurqa.

⁴ Chay juezmi ichaqa unayña mana atiendeyta munarqachu. Chaymantam kaynata tantearurqa: “Diosta mana manchakuchkaspaypas chaynataq runakunata mana respetachkaspaypas,

⁵ ichaqa kay viuda hamupayawasqanraykuyá quejanta allichaykusaq, yanqañataq kutitikramuspan umayta nanachiwanman”, nispa.

⁶ Chaymantam Jesús nirqa: Chaynatam kay mana allin juez nirqa.

⁷ Chaynaqa, ¿manachum Tayta Diospas tuta punchaw qayakuqnin churinkunata nanachikunman? ¿Yaqachu suyachikunman?

⁸ Cheqaptapunim nikichik, payqa chayllam nanaykachikunqa. Ichaqa runapa Churin hamuspan ¿yaqachu iñiyta kay pachapi tarinqaraq? nispa.

Fariseopawan impuesto cobraqpa mañakuyninmanta

⁹ Allinpaq hapikuspanku runamasinkuta usuchiqkunamanmi kay rikchanachiyta Jesús nirqa:

¹⁰ Iskay runakunam Diosta mañakunankupaq temploman rirqaku. Hukninmi karqa fariseo, hukninñataq impuesto cobraq.

¹¹ Chay fariseom sayaykuspan kaynata mañakurqa: “Graciastam qoyki Diosnilláy. Ñoqaqa manam wakin runakuna hina suwachu, mana allin ruwaqchu, waqllikuqchu, nitaqmi kay impuesto cobraq runa hinachu kani.

¹² Semanapim iskay kutita ayunani, lliw ganasqaymantapas diezmoytam qoyki”, nispa.

¹³ Impuesto cobraqñataqmi qepallapi kaspan cielotapas mana qawarispan qasqonta takakuspan nirqa: “Diosnilláy kuyapayariykullaway, huchasapam kallani”, nispa.

¹⁴ Chaynaqa, nikichikmi, kay impuesto cobraqmi huchanmanta pampachasqaña wasinman kutikurqa, fariseoñataqmi mana pampachasqachu karqa. Pipas hatunchakuqqa uchuychasqam kanqa, uchuychakuqñataqmi hatunchasqa, nispa.

Wawakunata Jesús bendecisqanmanta

¹⁵ Bendeciykunanpaqmi Jesusman wawakunata pusamurqaku. Chayta qawaykuspankum discipulonkunañataq pusamuqkunata qaqcharqaku.

¹⁶ Chaymi Jesusñataq paykunata qayaykuspan nirqa: Ama wawakuna ñoqaman hamunanta harkakuychikchu. Kay wawakuna hina kaqkunapaqmi Diospa munaychakuyninqa.

¹⁷ Cheqaptam nikichik, pipas wawakuna hina Diospa munaychakuyninta mana chaskiqqa, manapunim chaymanqa yaykunqachu, nispa.

Apu runapa Jesuswan rimasqanmanta

¹⁸ Hukkaqnin kamachikuqmi Jesusta tapurqa: Allin yachachikuq ¿imatataq ruwasaq wiñay kawsayta haypanaypaq? nispa.

¹⁹ Chaymi Jesusñataq nirqa: ¿Imanasqataq “allin yachachikuq” niwanki? Allinqa chullallam, payqa Diosmi.

²⁰ Qamqa yachankim kamachikuykunataqa: “Amam waqllikunkichu, amam wañuchinkichu, amam suwakunkichu, amam pimantapas llullataqa rimankichu, taytaykitawan mamaykitam kasukunki”, nispa.

²¹ Hinaptinmi chay runañataq nirqa: Chaykunataqa warma kasqaymantaraqmi ruwayman churaq kani, nispa.

²² Chayta uyarispanmi Jesusñataq nirqa: Chaywanpas kayraqmi ruwanayki kachkan, rispayki tukuy kapuqnikita rantikaramuy hinaspa chay qollqeta wakchakunaman qoykamuy, chaynapim hanaq pachapi kapuqniyuq kanki, hinaspayá ñoqawan riy, nispa.

²³ Chayta uyariruspanmi chay runañataq apullaña kasqanrayku llumpayta llakikururqa.

²⁴ Jesusñataqmi ancha llakisqata qawarispan nirqa: ¡Mayna sasatam apukunaqa Diospa munaychakuyninman yaykunqa!

²⁵ Apu runa Diospa munaychakuyninman yaykunanmantaqa, camelloraqcha yaqapas agujapa rinrinta usturunman, nispa.

²⁶ Uyariqninkunañataqmi nirqaku: Hinaptinqa ¿pitaq salvasqa kaytaqa atinman? nispanku.

²⁷ Chaymi Jesusñataq nirqa: Runakunapa mana ruway atisqanpas Diospaqqa atinallanmi, nispa.

²⁸ Hinaptinmi Pedroñataq nirqa: Señor, ñoqaykuqa tukuy imaykutapas saqespam qatichkaykiku, nispa.

²⁹ Jesusñataqmi nirqa: Cheqaptapunim nikichik, pipas Diospa munaychakuyninrayku wasinta, warminta, wawqe-paninkunata, turi-ñañankunata, tayta-mamanta, churinkunata saqeqqa,

³⁰ kay pachapim aswantaraq chaskinqa, hamuq kawsaypiñataqmi wiñay kawsayta chaskinqa, nispa.

Wañunanmanta kimsa kutikamaña Jesuspa rimarisqanmanta

³¹ Chunka iskayniyuq discipulonkunata huklawman sapaqchaykuspanmi Jesús nirqa: Jerusalén llaqtamanmi richkanchik, chaypim runapa Churinmanta profetakunapa tukuy ima qellqasqanku cumplikunqa.

³² Diosta mana reqsiqkunaman entregaykuptinkum burlakuspanku, kaminqaku hinaspa toqanqaku.

³³ Azoteruspankum wañurachinqaku, ichaqa kimsa punchawmanmi kawsarimunqa, nispa.

³⁴ Discipulonkunam ichaqa mana imayrikuqtapas entienderqakuchu, chay rimasqankunaqa pakasqa hina kasqanrayku.

Huk ñawsata Jesús sanoyachisqanmanta

³⁵ Jericó llaqtaman Jesús hichpaykuchkaptinmi, ñanpa patanpi limosnata mañakuspan huk ñawsa tiyachkarqa.

³⁶ Achkallaña runakuna pasasqanta uyarispanmi, imam pasakusqanmanta tapukurqa.

³⁷ Chaymi Nazaretmanta kaq Jesuspa chayninta pasasqanta willaykurqaku.

³⁸ Hinaptinmi payñataq qaparirqa: ¡Davidpa churin Jesús, llakipayariykullaway! nispa.

³⁹ Jesuspa ñawpaqninta riqkunañataqmi upallananpaq qaqcharqaku; paymi ichaqa aswanraq qaparispan nirqa: ¡Davidpa churin Jesús, llakipayariykullaway! nispa.

⁴⁰ Chaymi Jesusñataq sayaykuspan qayllanman apamunankupaq kamachirqa. Aparamuptinkum tapurqa:

⁴¹ ¿Imatataq qampaq ruwanayta munanki? nispa. Chaymi ñawsañataq nirqa: Señor, qawarikuytam munallani, nispa.

⁴² Jesusñataqmi nirqa: Qawarikuy. Iñisqaykiraykum sanoyarunki, nispa.

⁴³ Chaymi chaylla qawarikuruspan Jesusta qatikurqa Diosta yupaychastin. Llapa runakunapas chayta rikuykuspankum Diosta yupaycharqaku.