Lucas 16 - Chuya Qellqa 1992

Sakri mayordomomanta

¹ Jesusmi discipulonkunata nirqa: Apu runapam huk mayordomon karqa. Paymantam patronninman willaykurqaku kapuqninkuna yanqachasqanmanta.

² Chaymi qayaykuspan tapurqa: ¿Imatataq qanmanta kaykunata uyarini? Llamkasqaykimanta cuentata qoway, mayordomo kaynikitam saqenkiña, nispa.

³ Hinaptinmi chay mayordomoñataq yuyaymanaspan nirqa: ¿Imatataq ruwasaq patronniy llamkayniymanta qarqoruwaptinqa? Llamkanaypaqpas manam kallpay kanchu, limosna mañakuytapas penqakunim.

⁴ Chaynaqa, mayordomo kayniymanta wischuruwaptin, runakunañataq wasinkupi chaskiykuwananpaqyá kaynata ruwasaq, nispa.

⁵ Chaymi haykam patronnin debeqkunata sapakamata qayaspan, hukninta nirqa: “¿Haykataq patronniyta debenki?” nispa.

⁶ Hinaptinmi chay runa nirqa: “Pachak barril aceitem”, nispa. Chaymi mayordomoñataq nirqa: “Kayqa contrato ruwasqayki papel. Kunanqa pichqa chunkallamantaña musoq papelta ruwaykuway”, nispa.

⁷ Huknintapas nirqataqmi: “¿Haykataq patronniyta debenki?” nispa. Hinaptinmi payñataq nirqa: “Pachak tupu trigom”, nispa. Chaymi paytapas nirqa: “Kayqa papelniki. Pusaq chunkallamantaña papelta ruwaykuway”, nispa.

⁸ Hinaptinmi patronnin chay mana allin ruwaq mayordomopa sakri kaywan ruwasqanta allinpaq hapirqa. Arí, runamasinwan imatapas ruwanankupaqqa kay pachapi runakunam aswan sakri kanku Diospa churinkunamantaqa.

⁹ Chaynaqa, nikichikmi: Mana allinkunamanta chaskisqaykichik qori-qollqewanqa amistadkunatayá armaychik, chaynapi qollqekichik manaña kaptinpas hanaq pachapi chaskisunaykichikpaq.

¹⁰ Asllatapas nanachikuq runaqa, achkatapas allintam nanachikunqa; asllatapas yanqacharuq runaqa, achkatapas yanqacharunqam.

¹¹ Sichum mana allinkunamanta chaskisqaykichik qori-qollqeta mana allinta nanachikuptikichikqa ¿pitaq cheqap kaqtaqa confiasunkichikman?

¹² Sichum runapa kaqta yanqachaptikichikqa ¿pitaq kikikichikpa kaqtaqa qosunkichikman?

¹³ Manam pipas iskay patrontaqa servinmanchu, hukninta kuyaruspachá huknintañataq cheqnirunman, hukninman ratakuruspachá huknintañataq qepancharunman. Manam Diostawan qollqetaqa serviwaqchikchu, nispa.

¹⁴ Tukuy chaykunatam qollqella kuyaq fariseokunapas uyarirqaku, hinaspam Jesusmanta burlakurqaku.

¹⁵ Chaymi Jesusñataq nirqa: Qamkunaqa runakuna qawanallanpaqmi allin tukunkichik, Diosmi ichaqa sonqoykichikta reqsisunkichik. Runakunapaq sumaqllaña rikchakuqpas Diospaqqa millakuypaqmi.

Leymantawan Diospa munaychakuyninmanta

¹⁶ Kamachikuykunawan profetakunapa yachachisqanqa Bautizaq Juanpa willakuy qallarisqankamallam karqa. Chaymanta qepamanñataqmi Diospa munaychakuyninmanta willakusqa kachkan, chaymi llapallanku yaykunankupaq kallpanchakuchkanku.

¹⁷ Kay pachawan hanaq pachach chinkarunman, Diospa kamachikuyninpam ichaqa huk letrallanpas mana chinkanqachu.

Casadokunaqa mana rakinakunankumanta

¹⁸ Warminmanta rakikuruspan huk warmiwan casarakuq runaqa chay warmiwanmi waqllikurun. Qosanpa saqesqan warmiwan casarakuqpas waqllikuruntaqmi.

Apumantawan Lazaromanta

¹⁹ Huk apu runam karqa grosellamanta hinaspa linomanta fino pachakunawan churakuq, paymi sapa punchaw munayllapaqña convidokunata ruwachiq.

²⁰ Karqataqmi limosna mañakuq Lázaro sutiyuq runapas, paymi chay apupa punkunpi pasaypaq heridasqallaña tiyallaq,

²¹ apupa mesanmanta wichiq puchukunawan wiksallan huntaykachiyta munaspan, allqokunapas asuykuspankum heridankunata llaqwaykuq.

²² Chay limosna mañakuq runam wañukurqa, hinaptinmi Abrahampa kasqanman angelkuna aparurqaku. Chaynataqmi apupas wañururqa, hinaptinmi pamparurqaku.

²³ Chay apum, wañusqakunapa kasqanpi ñakarichkaspan karumanta qawarispan Abrahamta rikururqa, Lazarotañataq waqtanpi tiyachkaqta.

²⁴ Chaymi qaparispan nirqa: “¡Taytáy Abraham, llakipayariykullaway! ama hina kaspaykiyá Lazarota kachamuway dedollanpipas yakuta apamuspan qallullaytapas chiriykachinanpaq, ñoqaqa kay ninapim llumpa-llumpayta ñakarichkani”, nispa.

²⁵ Abrahamñataqmi nirqa: “Churilláy, yuyariyyá kawsaspaykiraq allin kaqkuna chaskisqaykita, Lazaroñataq ñakariyllapi kasqanta. Kunanmi ichaqa kusisqaña kaypi tarikuchkan, qamñataqmi ñakarichkanki.

²⁶ Chaywanpas qamkunatawan ñoqaykutaqa uku-uku wayqom rakiwachkanchik, chaynapim kaymanta chaylawman chimpayta munaspapas mana atinmankuchu, nitaqmi chaymanta kawlawmanpas atimunmankuchu”, nispa.

²⁷ Chaymi apuñataq nirqa: “Chaynaqa, taytáy Abraham, ruegakusqaykim taytaypa wasinman Lazarota kamachinaykipaq,

²⁸ kachkanraqmi pichqa wawqeykuna, paykunamanyá willamuchun, chaynapi kay ñakariypa kasqanman amaña hamunankupaq”, nispa.

²⁹ Hinaptinmi Abrahamñataq nirqa: “Chaypaqmi Moisespa hinaspa profetakunapa qellqanta hatallinku, chaytayá kasukuchunku”, nispa.

³⁰ Chay apuñataqmi nirqa: “Taytáy Abraham, manam kasukunmankuchu. Sichum wañuqkunapa kasqanmanta kutispa pillapas willaykuptinmi ichaqa wanakunqaku”, nispa.

³¹ Chaymi Abrahamñataq nirqa: “Moisespa hinaspa profetakunapa nisqankunata mana kasukuspankuqa, wañuqkunamanta hukkaqnin kutispan willamuptinñapas manam creenqakuchu”, nispa.