Lucas 13 - Chuya Qellqa 1992

Huchamantaqa wanakunamanta

¹ Chay punchawkunapim wakin runakuna Jesusman rispanku willarqaku: Galilea lawmanta kaqkunam animalkunata wañuchichkarqaku Diospaq ofrecenankupaq, paykunata Pilato wañurachispanmi yawarninkuwan chay animalkunapa yawarninwan chapururqa, nispa.

² Chaymi Jesusñataq nirqa: ¿Creenkichikchu chay galileo runakuna wakin llaqtamasinkumantapas astawan huchasapa kasqankurayku chayna wañuchisqa kasqankuta?

³ Nikichikmi, manam chaynachu. Huchaykichikmanta mana wanakuspaqa qamkunapas chaynam wañunkichik.

⁴ Siloé pozopa waqtanpi torre tuñiykuspanmi chunka pusaqniyuq runakunata wañurachirqa. ¿Creenkichikchu Jerusalenpi runakunamantapas aswan huchasapa kasqankuta?

⁵ Nikichikmi, manam chaynachu. Huchaykichikmanta mana wanakuspaqa qamkunapas chaynam wañunkichik, nispa.

Mana ruruyuq higos sachamanta

⁶ Jesusmi rikchanachispan nirqa: Huk runapam uvas chakranpi higos sachan karqa, chaymi rurunta maskaq rispan mana tarirqachu.

⁷ Hinaspam chakra cuidaqta nirqa: “Kimsa watañam kay higospa rurun maskaq hamuni, ichaqa manam tarinichu. Kuchuruy amaña kichkichakunanpaq”, nispa.

⁸ Chakra nanachikuqñataqmi nirqa: “Señor, kay watatawanraqyá saqeykuy. Muyuriqninta aspiruspaymi wanuchaykusaq,

⁹ icharaqpas rurunman, mana chayqa kuchurunkiñachiki”, nispa.

Onqoq warmita samana punchawpi Jesús sanoyachisqanmanta

¹⁰ Jesusmi samana punchawpi sinagogapi yachachichkarqa.

¹¹ Chaypim kachkarqa chunka pusaqniyuq wataña onqoq warmi. Kurkunpalla puriqta demonio ruwaruptinmi chayna kurkunpalla puriq.

¹² Payta Jesús rikuruspanmi qayaykuspa nirqa: Yaw warmi, onqoynikimantaqa sanoñam kanki, nispa.

¹³ Warmipa hawanman makinta churaykuptillanmi chay warmiqa derechakuruspan Diosta hatuncharqa.

¹⁴ Sinagogapi kamachikuqñataqmi samana punchawpi Jesuspa sanoyachisqanwan piñakuruspan runakunata nirqa: Soqta punchawmi llamkanapaqqa kachkan. Sanoyachisqa kayta munaspaqa chay punchawkunapiyá hamuychik, amayá samana punchawpichu, nispa.

¹⁵ Señorñataqmi nirqa: ¡Yaw, llapa iskay uyakuna! ¿manachum qamkunapas toroykichikta otaq asnoykichikta samana punchawpi paskaspa yaku tomachiq pusankichik?

¹⁶ Kay warmiqa Abrahampa mirayninmantam karqa, paytam chunka pusaqniyuq wataña Satanás watarurqa, ¿chaychu samana punchawña kachkaptinpas mana sanoyaykachiyman? nispa.

¹⁷ Chaynata niptinmi lliw enemigonkuna penqaypi rikurirurqaku. Runakunañataqmi admirakuypaq tukuy ruwasqankunata qawaspanku anchallataña kusikurqaku.

Mostaza muhuwan rikchanachisqanmanta

¹⁸ Jesusmi nirqa: ¿Imamantaq Diospa munaychakuyninqa rikchakun? ¿Imawantaq tupanachiyman?

¹⁹ Diospa munaychakuyninqa rikchakun huk runapa tarpusqan mostaza muhumanmi, wiñaruspa sachayaruptinmi urpikunapas kallmankunapi qesachakun, nispa.

Levadurawan rikchanachisqanmanta

²⁰ Jesusmi huk rikchanachiytawan nirqa: ¿Imawantaq Diospa munaychakuyninta tupachiyman?

²¹ Chayqa rikchakun, huk warmipa kimsa tupu harinata chapuruptin poqorachiq levaduramanmi, nispa.

Kichki punkumanta

²² Jerusalenman Jesús rispanmi llaqtakunapi hinaspa taksa llaqtakunapi yachachistin rirqa.

²³ Chaymi hukkaqnin tapurqa: Señor ¿asllachu salvakunqaku? nispa. Hinaptinmi payñataq nirqa:

²⁴ Kichki punkunta yaykunaykichikpaqyá kallpanchakuychik; cheqaptam nikichik, achkaqmi yaykuyta munanqaku, ichaqa manam atinqakuchu.

²⁵ Punkuta wasiyuq wichqaramuptinmi qamkunañataq hawamanta takaspa ninkichik: “Señor, kichaykamullawayku”, nispaykichik. Hinaptinmi payñataq nimusunkichik: “Manam reqsikichikchu, maylawcha kankichikpas”, nispa.

²⁶ Hinaptinmi qamkunañataq ninkichik: “Señor, qanwanqa kuskam mikurqanchikpas, tomarqanchikpas, plazaykupitaqmi yachachirqankipas”, nispaykichik.

²⁷ Hinaptinmi payñataq nimusunkichik: “Manam reqsikichikchu, maylawcha kankichikpas, qayllaymanta asuychik mana allin ruwaqkuna”, nispa.

²⁸ Hinaptinmi hawapi qeparuspa, Abrahamta, Isaacta, Jacobta hinaspa profetakunata Diospa munaychakuyninpi kachkaqta qawaspa, kiruykichikpas kirichichisqa qaparkachankichik.

²⁹ Intipa qespimunan lawmanta, intipa seqaykunan lawmanta, norte lawmanta hinaspa sur lawmanta hamuspankum Diospa munaychakuyninpi mikunankupaq tiyaykunqaku.

³⁰ Qepa kaqkunam puntapi kanqaku, puntapi kaqkunañataqmi qepapi kanqaku, nispa.

Jerusalén llaqtarayku Jesuspa waqasqanmanta

³¹ Chaykunata rimachkaptinmi llapa fariseokuna chayaruspanku Jesusta nirqaku: Herodesmi wañuchiyta munasuchkanki, kaymanta pasakuy, nispanku.

³² Chaymi Jesusñataq nirqa: Rispaykichik chay atoqta nimuychik: “Kunanwan paqarinqa demoniokunata qarqospaymi onqoqkunata sanoyachisaq, mincharaqmi ruwanayta tukusaq”

³³ Ichaqa kunanpas, paqarinpas chaynataq minchapas maymi rinaytam risaq. Profetaqa manam Jerusalenmanta hawapiqa wañunmanchu.

³⁴ ¡Jerusalén, Jerusalén! ¡Profetakunatam wañuchinki! Diospa kachamususqayki willakuqkunatam rumiwan chamqapanki ¡Maynatam munarqani chiwchinkunata rapran ukupi huñuykuq wallpa hina wawaykikunata huñuykuyta, ichaqa manam munarqankichu!

³⁵ Chayraykum wasikichikpas chunninqa. Nikichikmi, manañam rikuwankichikñachu: “Señorpa sutinpi hamuqyá qapaqchasqa kachun” nispa niwanaykichik punchawkama.