Levítico 3 - Chuya Qellqa 1992

Dioswan allinlla kasqankumanta ofrendakuna

¹ Pipas ñoqawan allinlla kasqanmanta vacakunamanta otaq torokunamanta wañuchipuwananpaq ofrendan kaptinqa, chay animalqa sanom kanan.

² Chay ofrecewaqniymi puntata animalpa umanman makinta churaykunqa, chaymantañam ñoqaman asuykuna carpapa punkunpi wañurachinqa, hinaptinmi Aaronpa miraynin sacerdotekuna chay animalpa yawarninwan altarta challanqaku.

³ Ñoqawan allinlla kasqanmanta ofrendata ñoqa Tayta Diosman ofrecewaspaqa, chunchulninkunapi wirankunata, llika wirankunata,

⁴ iskaynin rurunninkunata, rurunninkunapi wirankunata, laplanpi wirankunata hinaspa kichpanninpi wirankunatam rurunninkunatawan kuskata hurqonqa,

⁵ tukuy chaykunatam Aaronpa churin sacerdotekuna altarpi kañanqaku, yantapa hawanpi lliw kaña ofrendatawan kuskata. Chay ofrendaqa ñoqapaq miskillaña asnariq ofrendam.

⁶ Ñoqawan allinlla kasqanmanta, pipapas carnerokunamanta otaq ovejakunamanta ofrecemuwaptinqa, chay animalqa sanom kanqa.

⁷ Malta carnerota ñoqa Tayta Diosman ofrecewaspanqa,

⁸ chay ofrecewaqniymi puntata animalpa umanman makinta churaykunqa, chaymantañam ñoqaman asuykuna carpapa punkunpi wañurachinqa, hinaptinmi Aaronpa churin sacerdotekunañataq chay animalpa yawarninwan altarta challanqaku.

⁹ Chaynaqa, ñoqawan allinlla kasqanmanta ofrendata ñoqa Tayta Diosman ofrecewaspanqa wiranta, kuchunmanta hurqosqa chupanta, chunchulninkunapi kaq wirankunata, llapallan llika wirankunata,

¹⁰ iskaynin rurunninkunata, rurunninkunapi wirankunata, laplanpa hawanpi wirankunata, kichpanninpi kaq wirankunatam rurunninkunatawan kuskata hurqonqa.

¹¹ Sacerdotem tukuy chaykunata altarpi kañanqa, Chay ofrendaqa ñoqapaq kañasqa miski mikuy ofrendam.

¹² Pipas cabramanta ofrecewaspanqa ñoqa Tayta Diosmanmi apamuwanqa.

¹³ Ofrecewaqniymi chay animalpa umanman makinta churaykunqa, chaymantañam ñoqaman asuykuna carpapa punkunpi wañurachinqa, Aaronpa churin sacerdotekunañataqmi chay animalpa yawarninta tukuy altarman challanqaku.

¹⁴ Chaymantam chay ofrendata ñoqa Tayta Diosman ofrecewaspa kañapuwanqa chunchulninkunapi kaq wirankunata, llika wirankunata,

¹⁵ iskaynin rurunninkunata, rurunninkunapi wirakunata, laplanpa hawanpi wirankunata hinaspa kichpanninpi kaq wirata, chay wirakunataqa rurunninkunatawan kuskatam hurqonqa.

¹⁶ Sacerdotem tukuy chaykunata altarpi kañanqa. Chayqa ñoqapaq kañasqa miski mikuy ofrendam, hinaspapas miskillaña asnariq ofrendam. Llapallan wirakunaqa ñoqa Tayta Diospaqmi.

¹⁷ Kay kamachisqayqa wiñaypaq decretom llapallan miraynikichikpaq. Maypiña kaspapas amam wiratawan yawartaqa mikunkichikchu, nispa.