Levítico 26 - Chuya Qellqa 1992

Kasukuqkunata Dios yanapasqanmanta

¹ Amam idolokunataqa ruwankichikchu, nitaqmi llaqtayki ukupiqa rumimanta llaqllasqa ima idolotapas sayachinkichikchu. Chaykunapa qayllanpiqa amataqmi qonqorakunkichikchu. Ñoqaqa Tayta Diosmi kani.

² Samana punchawniykunapiqa samankichikpunim, santuarioytapas respetankichiktaqmi. Ñoqaqa Tayta Diosmi kani.

³ Kamachikuyniykunatawan yachachikuyniykunata kasukuptikichikqa,

⁴ ñoqam tiempollanpi parachimusaq, hinaptinmi chakraykichikpi kawsaynikichikpas qespinqa, fruta sachaykichikkunapas rurunqam.

⁵ Kawsaykuna cosechasqaykichikpas uvas pallaykamam haypanqa, uvas pallaynikichikñataqmi tarpuykama haypanqa, hinaptinmi saksanaykichikkama mikunkichik, allpaykichikpipas hawkallam yachakunkichik.

⁶ Nacionnikichikpim hawka kawsakuyta qosqaykichik, hinaptinmi puñuspapas mana pipa manchachisqan puñukunkichik. Manchakuypaq monte animalkunatapas nacionnikichikmantam chinkachisaq, guerrapas chaypiqa manañam kanqachu.

⁷ Enemigoykichikkunatapas qatispam espadawan wañuchinkichik.

⁸ Pachak enemigoykichiktam pichqalla qatikacharunkichik, chunka waranqatañataqmi pachaklla qatikacharunkichik. Chaynatam enemigoykichikta espadawan wañuchinkichik.

⁹ Ñoqam yanapasqaykichik hinaspam achka-achkallaña kanaykichikkama mirachisqaykichik, chaynapim qamkunawan pacto ruwasqayta cumplisaq.

¹⁰ Ñawpaq watapi kawsaykuna churasqaykichiktam mikunkichik, ñawpaq kawsaykunata hurqospaykichikmi musoq kawsaykunataña waqaychankichik.

¹¹ Qamkunawan yachaspaymi manaña qepanchasqaykichikñachu.

¹² Qamkunapa chawpikichikpi purispaymi Diosnikichik kasaq, qamkunañataqmi runaykuna kankichik.

¹³ Ñoqa Tayta Diosmi Egipto nacionmanta hurqomurqaykichik manaña paykunapa criadon kanaykichikpaq. Yugota pakipachkaq hinam criado kasqaykichikmanta libramurqaykichik, hinaspam qari-qarillataña purichirqaykichik.

Mana kasukuqkunapaq castigomanta

¹⁴ Mana kasukuspa kamachisqaykunata mana ruwayman churaptikichikqa,

¹⁵ chaynataq yachachikuyniykunatapas, kamachikuyniykunatapas hinaspa kunasqaykunatapas wischupakuspa chaynataq mana ruwayman churaspa pacto ruwasqaytapas mana cumpliptikichikqa,

¹⁶ ñoqapas qamkuna ukupim manchapakuyta, wañuchikuq onqoykunata, calenturata, ñawi onqoyta chaynataq eqoyayta rikurirachisaq; yanqapaqmi tarpunkichikpas, tarpusqaykichiktapas enemigoykichikmi mikukunqa.

¹⁷ Ñoqam contraykichikpi kasaq, hinaptinmi enemigoykichikpas vencesunkichik. Cheqnisuqnikichik runakunam munaychakusunkichik, mana pipa qatikachasqanmi ayqenkichikpas.

¹⁸ Chaykunawanpas mana kasuwaptikichikqa ñoqam qanchis kutikama huchaykichikkunamanta castigasqaykichik.

¹⁹ Hatun tukuq kaynikichiktapas yanqacharusaqmi, cielokunatam fierrota hina manaña paramunanpaq ruwarusaq, chaynapim allpaykichikpas bronce hinaña rikurirunqa.

²⁰ Kallpaykichikpas ususqam yanqa llamkankichik, chakraykichikpiqa manam imapas qespinqachu, nitaqmi lliw nacionnikichikpi fruta sachakunapas rurunqachu.

²¹ Chaywanpas contraypi hatarispa mana kasuwaptikichikqa, huchallikusqaykichikman hinam huk qanchis kutitawanraq castigasqaykichik.

²² Manchakuypaq monte animalkunatapas kachaykamusaqmi, hinaptinmi churi-wawaykichikkunatawan animalnikichikkunatapas pasaypaqta tukurunqa, chaynapim aschallaña rikuriruptikichik ñannikichikpas chunninqa.

²³ Chay ñakariykunawanpas mana wanakuspa hinalla qepanchakuwaptikichikqa

²⁴ ñoqapas qepanchakusqaykichikmi, hinaspam huchaykichikmanta aswan qanchis kutikamaraq ñakarichisqaykichik.

²⁵ Pacto ruwasqayta mana kasusqaykichikmantam guerrawan wañuchisqaykichik, guerramanta llaqtaykichikman ayqeptikichikpas peste onqoytam kachaykamusqaykichik, qamkunaqa enemigoykichikkunaman qosqam kankichik.

²⁶ Mikunaykichik kawsaykunata chinkarachiptiymi chunka warmikuna chulla hornollapi tantata ruwaspanku kama-kamallamanta qosunkichik, ichaqa manam saksankichikchu.

²⁷ Chaykunawanpas mana kasuwaspa hina qepanchawaptikichikqa

²⁸ ñoqapas contraykichikpi piñakuspaymi aswan qanchis kutikamaraq huchaykichikmanta ñakarichisqaykichik.

²⁹ Hinaptinmi churi-wawaykichikkunataña mikunkichik.

³⁰ Idoloykichikkunapa capillankunatapas tuñirachisaqmi, incienso kañana altarnikichikkunatapas pakiparusaqmi, ayaykichiktapas idoloykichikkunapa hawanmanmi montorusaq.

³¹ Llaqtaykichikkunatam purmachisaq, altarnikichikkunatam tuñichisaq, ofrendaykichikkunapa miski asnaynintapas manañam chaskisqaykichikñachu.

³² Nacionnikichiktam purmarachisaq hinaptinmi chaypi yachananpaq hamuq enemigoykichikkunapas admirasqallaña qawanqaku.

³³ Huklaw nacionkunamanmi cheqechisqaykichik, hinaspam guerrawan qatikachachisqaykichik, nacionnikichikmi chunninqa, llaqtaykichikkunam purmanqa.

³⁴ Allpaykichikpas enemigoykichikkunapa nacionninpi kamunaykichikkamam purmaspa samakunqa, mana samachisqaykichikmantam samakunqa.

³⁵ Allpaykichikpi yachaspa mana samachisqaykichikmantam chay allpa purmasqan watakunapi samakunqa.

³⁶ Qamkunamanta puchuqkunamanñataqmi, enemigonkupa allpanpi kaptinku sonqonkuman manchakuyta churasaq, hinaptinmi sachapa rapin wichiykuptillanpas guerramanta hinaraq ayqenqaku, ayqespankum mana pipa qatisqallan urmanqaku.

³⁷ Mana pipas qatichkaptillanmi guerramanta lluptichkaq hina kallpaspanku kikinkupura urmachinakunqaku, manam mayqanninkupas enemigonku kutipakuyta atinqakuchu.

³⁸ Huklaw nacionkunapim wañunkichik, enemigoykichikpa allpanmi mikusunkichik.

³⁹ Enemigoykichikpa nacionninpim qamkunamanta puchuqkunapas mana allin ruwasqankumanta wañunqaku, tayta-mamankuwan kuskam mana allin ruwasqankurayku wañunqaku.

⁴⁰ Mana allin ruwasqankumanta chaynataq ñawpaq taytankupa mana allin ruwasqankumanta reqsikuptinkupas, qepanchawasqankuta hinaspa mana kasukusqankuta reqsikuptinkupas,

⁴¹ paykunapa contrankupi kaspaymi enemigonkupa nacionninman pusachisaq. Chaypim rumi sonqo kayninkupas llampuyamunqa, chaypitaqmi mana allinta ruwasqankumantapas paganqaku.

⁴² Chaymantañam Jacobwan, Isaacwan, Abrahamwan pacto ruwasqayta yuyarisaq, allpanmantapas yuyarisaqtaqmi.

⁴³ Allpankuqa paykunapa saqesqan kaspanmi purmaspan chayraq samaykunqa. Paykunaqa mana allin ruwasqankumantam paganqaku, paykunaqa kamachikuyniykunatapas qepanchaspankum yachachikuyniykunatapas wischupakurqaku.

⁴⁴ Chaywanpas enemigonkupa allpanpiña kaptinkupas ñoqaqa manam wischupakusaqchu nitaqmi puchukarachinaypaq hinaqa millakusaqchu. Manam paykunawan pacto ruwasqaytaqa yanqachasaqchu. Ñoqaqa paykunapa yupaychasqan Tayta Diosmi kani.

⁴⁵ Aswanraqmi paykunapa allinninpaq ñawpaq pacto ruwasqayta yuyarisaq. Paykunataqa nacionkunapa yachasqantam Egipto nacionmanta Diosninku kanaypaq hurqomurqani. Ñoqaqa Tayta Diosmi kani, nispa.

⁴⁶ Kaykunam Moisesnintakama Israelpa mirayninkunaman Tayta Diospa qosqan kamachikuykuna, reglamentokuna hinaspa yachachikuykuna. Tukuy chaykunatam Sinaí orqopi Moisesman qorqa.