Levítico 24 - Chuya Qellqa 1992

Mecherokunapaq aceitemanta

¹ Moisestam Tayta Dios kaynata nirqa:

² Israelpa mirayninkunata kamachiy aceitunasmanta allinnin aceiteta apamunankupaq, chaywan mecherokuna manaña tukuyta ratananpaq.

³ Aaronmi mecherokunata churanqa tukuy tuta ñoqa Tayta Diospa qayllaypi ratananpaq, chayqa ratanqa carpa ukupim velopa ñawpaqninpi. Kaymi wiña-wiñaypaq kamachikuy kanqa llapallan miraynikichikkunapaq.

⁴ Qorimanta candelabropi mecherokunatam ratachinqa, chaynapi ñoqa Tayta Diospa qayllaypi mana tukuyta achkinanpaq.

Tayta Diospa qayllanpi tantamanta

⁵ Allinnin harinamantam chunka iskayniyuq tantakunata ruwankichik. Sapa tantam tawa kilo parten harinamanta kanqa.

⁶ Hinaptinmi iskay montonta soqtatakama patanasqata churanki, chaynataqa churanki ñoqa Tayta Diospa qayllaypim qorimanta mesapa hawanpi.

⁷ Sapa monton tantapa hawanmanñataqmi inciensota churanki, hinaptinmi tantapa rantinpi chay incienso ñoqa Tayta Diospaq kañasqa ofrenda kanqa.

⁸ Chaytaqa sapa samana punchawmi mana tukuyta churanki, ñoqa Tayta Diospa qayllaypi Israelpa mirayninkunawan wiña-wiñaypaq contrato kasqanrayku.

⁹ Chay tantakunaqa Aaronpaqwan churinkunapaqmi kanqa. Paykunam chaypaq sapaqchasqa sitiopi mikunqaku. Ñoqa Tayta Diospaq kañanaykichik ofrendakunamantapas, kay ofrendaqa ñoqallapaqña sapaqchasqam kanqa, nispa.

Diosta mana kasukuqkunapaq castigomanta

^10-11 Israelpa mirayninkuna ukupim huk runa karqa, payqa karqa Israel casta warmipa wawanmi hinaspa Egipto runapa churin. Mamanmi Dan ayllumanta kaq Dibripa churin Selomit karqa. Chay Selomitpa wawanmi Israel castamanta kaq runawan maymi samasqanku ukupi churanakurqa, chayna churanakusqanpim Selomitpa wawan Tayta Diospa sutinta yanqachaspan ñakarqa, hinaptinmi chay ñakaq runata Moisesman pusarqaku.

¹² Chaymi carcelman wichqaruspanku Tayta Diospa imam nisqanta ruwanankupaq suyarqaku.

¹³ Hinaptinmi Moisesta Tayta Dios nirqa:

¹⁴ Chay ñakaqniy runatam campamentomanta hurqonki, hinaptinmi llapallan uyariqninkuna paypa umanman makinkuta churanqaku, hinaptinmi llapallan huñunasqa runakuna rumiwan chamqaparunqaku.

¹⁵ Chaymantam Israelpa mirayninkunata ninki: Pipas Tayta Diospa sutinta ñakaqqa wañuchisqam kanqa.

¹⁶ Huklaw llaqtayuq kaqpas, qamkunamanta kaqpas, ñoqa Tayta Diospa sutiyta ñakaqqa wañuchisqam kanqa, paytaqa llapallan runakunam rumiwan chamqaparunqaku.

¹⁷ Pipas runamasinta wañuchiqqa wañuchisqam kanqa.

¹⁸ Pipas hukpa animalninta wañurachispaqa, dueñonmanmi hina chayna animalta sayachipunqa.

¹⁹ Pipas runamasinpa cuerponta dañaqtaqa, paytapas chaynallatam ruwanqaku:

²⁰ Runapa tullunta pakiqqa, paypa tullunpas pakisqam kanqa; ñawita hurqoruptinqa paypatapas ñawintam hurqorunqaku, kiruta wichirachiptinqa paypatapas kiruntam wichirachinqaku; runamasinpa cuerponta dañasqanman hinam paytapas chaynallata ruwanqaku.

²¹ Pipas animalta wañurachispaqa sayachinqam. Runata wañurachispanmi ichaqa paypas wañuchisqa kanqa.

²² Hina chayna kamachikuyllam kanqa huklaw llaqtayuq runakunapaqpas chaynataq hinapi naceqpaqpas. Ñoqa Tayta Diosmi Diosniki kani, nispa.

²³ Moisesmi Israelpa mirayninkunata kamachirqa, hinaptinmi paykunañataq chay ñakaq runata campamentomanta hawaman hurqoruspanku rumiwan choqaparurqaku. Chaynatam Israelpa mirayninkuna ruwarqaku, Moisesman Tayta Diospa kamachisqanman hina.