Levítico 17 - Chuya Qellqa 1992

Animalta nakaspa santuarioman apanankumanta

^1-2 Aaronman, churinkunaman chaynataq Israelpa mirayninkunaman kamachinanpaqmi Moisesta Tayta Dios nirqa:

³ Sichum Israelpa mirayninkunamanta pipas nakanqa torota, carnerota, cabrata campamento ukupi otaq hawapipas,

⁴ hinaspañataq chay nakasqanta ñoqa Tayta Diospa santuarioypa punkunpi ofrecewananpaq mana apamunqachu, hinaspaqa yawar chaqchusqanmantam huchayuq kanqa. Chayraykum chay runaqa llaqtamanta chinkachisqa kanqa.

⁵ Chaynapim Israelpa mirayninkunaqa campamentomanta huklawpiña nakaspapas ofrendankutaqa ñoqaman apamuwanqaku carpapa punkunman, sacerdoteñataqmi ñoqawan allinlla kasqankumanta ofrendata ofrecewanqa.

⁶ Hinaptinmi sacerdote asuykuwananku carpapa punkunpi altarman yawarta challanqa, hinaspam chay animalpa wiranta kañanqa. Chayqa ñoqa Tayta Diospaq miskillaña asnaq ofrendam.

⁷ Demoniokunamanqa amañam sacrificiotaqa qonkichikñachu. Ñawpaqtam chaykunaman ofrecespa pierdekuq warmi hina huchallikurqankichik; kay kamachikuymi wiña-wiñaypaq llapallan miraynikichikpaq kanqa.

⁸ Israelpa miraynin kaspa otaq huklaw llaqtayuq kaspapas lliw kañana otaq wakin ofrendatapas

⁹ ñoqa Tayta Diosman ofrecewananpaq asuykuwananku carpaman mana apamuspaqa, llaqtamanta chinkachisqam kanqa.

Yawarta ama mikunankumanta

¹⁰ Israelpa mirayninkunamanta otaq qamkunawan yachaq huklaw llaqtayuqkunapas yawarta mikuruptinqa paypa contranpim kasaq, hinaspam llaqtamanta chinkarachisaq.

¹¹ Animalpa vidanqa yawarninpim kachkan. Ñoqam kamachirqaykichik chay yawarta altarman apaptikichik huchaykichikta pampachanaypaq. Chay yawarwanmi huchaykichikta pampachaspay vidaykichikta librasaq.

¹² Amam mayqannikichikpas nitaq qamkunawan yachaq huklaw llaqtayuqpas yawartaqa mikunkichikchu.

¹³ Israelpa mirayninkunamanta otaq qamkunawan yachaq huklaw llaqtayuqpas mikuna purun animalta otaq urpituta hapiramunqa, hinaspaqa yawarninta pampaman suturachispanmi allpawan taparunqa.

¹⁴ Runapas otaq animalpas yawarllanwanmi kawsan. Chayraykum nikichik ima animalpa yawarnintapas ama mikunaykichikpaq. Pipas yawar mikuqqa chinkachisqam kanqa.

¹⁵ Israelpa mirayninkunamanta otaq huklaw llaqtayuqkunamanta kikinmanta wañuq animalta otaq purun animalpa wañuchisqan animalta mikuruspaqa pachankunata taqsakuspanmi bañakunqa, hinaspam tutaykunankama millakuypaq kanqa, chaymantañam chuya kanqa.

¹⁶ Sichum pachanta mana taqsanqachu nitaq kikinpas bañakunqachu hinaspaqa huchayuqmi kanqa, nispa.