Levítico 14 - Chuya Qellqa 1992

Leprawan onqoq imaynam chuyanchakunanmanta

¹ Moisestam Tayta Dios kaynata nirqa:

² Kaykunam leprawan onqoq runa imaynatam chuyanchakunanpaq yachachikuykuna: Leprawan onqoqmi sacerdoteman pusasqa kanqa,

³ hinaptinmi sacerdoteñataq campamentomanta hawaman lloqsispan chaypi qawanqa. Sichum chay runapa lepran sanoyaruptinqa,

⁴ sacerdotem kamachinqa mikunapaq kaq kawsachkaq iskay urpituchakunata, cedromanta kaspita, puka qaytuta hinaspa hisopopa kallmantapas apamunanpaq. Chaykunam chuyanchakunanpaq ofrenda kanqa.

⁵ Chaymantam sacerdote kamachinqa chayllaraq wisimusqa yakuyuq allpa mankapa hawanpi huknin urpituchata wañuchinankupaq.

⁶ Kawsachkaq urpituchatapas, cedro kaspitawan, puka qaytutawan chaynataq hisopopa kallmantawan kuskata hapiykuspanmi challpunqa chayllaraq wisimusqa yaku hawanpi wañuchisqa urpituchapa yawarninman.

⁷ Hinaspam chay yawarwan lepramanta chuyanchakuq runata qanchis kutikama challanqa, chaynapim payqa chuyaña kanqa. Chay kawsaq urpituchatañataqmi pawakunanpaq kachaykunqa.

⁸ Pipas chuyanchakuqqa pachankunatam taqsakunqa, chukchantapas kachiy-kachiyta rutukuspanmi bañakunqa; chaynata chuyanchakuspanmi campamentoman yaykunqa. Ichaqa qanchis punchawmi kikinpa carpanman ama yaykunqachu.

⁹ Qanchis kaq punchawpim chukchanta, barbanta, cejasninkunata hinaspa lliw chukchankunatapas kachiy-kachiyta rutukunqa. Pachankunata taqsakuspam kikinpas bañakunqa, hinaspam chuyaña kanqa.

¹⁰ Pusaq kaq punchawpiñataqmi iskay sano malta carnerokunatawan huk watayuq sano ovejata apamunqa, apamunqataqmi aceitewan chapusqa soqta kilo parten fino harinatapas, chayqa kawsaykunamanta ofrendam chaynataq cuarto litro masnin aceitetapas.

¹¹ Chaymi lepranmanta chuyanchakuq runata ofrendankunatawan kuskata sacerdote pusamunqa ñoqapa qayllayman, Diosman asuykuna carpapa punkunman.

¹² Hinaspam huknin malta carnerota hapiykuspan kuyuchispa cuarto litro masnin aceiteyuqta ofrecewanqa, chayqa ñoqa Tayta Diosman ofrecewananku culparayku ofrendam.

¹³ Chay malta carnerotaqa sacerdotem wañuchinqa, hucharayku ofrendatawan lliw kañapuwananku ofrendata wañuchinanku sitiopi. Culparayku ofrecewasqanku ofrendaqa sacerdotepaqmi kanqa imaynam hucharayku ofrenda hina, chayqa ñoqallapaqña sapaqchasqam.

¹⁴ Chaymantam culparayku ofrecewasqan carneropa yawarninta chaskiykuspa sacerdote llusinqa chuyanchakuq runapa alleq rinrinpa ura patachanta, llusinqataqmi alleq makinpa alleq chakinpa maman dedontapas.

¹⁵ Chaymantam aceiteta sacerdote hapiykuspan ichoq makinpa pampanman talliykunqa,

¹⁶ hinaspam alleq dedonta, ichoq makinpi aceiteman challpuykuspan hina chay alleq dedollanwan, ñoqa Tayta Diospa ñawpaqniypi qanchis kutikama challanqa.

¹⁷ Makinpi puchuq aceitewanñataqmi lepramanta chuyanchakuq runata alleq rinrinpa ura patachanta llusinqa, llusinqataqmi alleq makinpa alleq chakinpa maman dedontapas. Chaynatam llusinqa culparayku yawarwan llusisqanpa hawanman.

¹⁸ Puchuq aceitewanñataqmi sacerdote tallinqa lepramanta chuyanchakuq runapa umanman. Chaynata sacerdote ruwaruptinmi chay runapa huchanta ñoqa pampachasaq.

¹⁹ Chaymantam sacerdoteqa hucharayku ofrendata ofrecewanqa. Chaynataqa ruwanqa chay runa millakuypaq kasqanmanta chuyaña kananpaqmi. Chaymantañam lliw kañana animalta ofrecewanqa.

²⁰ Chay altarpa hawanpim lliw kañana animalta ofrecewanqa kawsaykunamanta ofrendatawan kuskata. Chaynata sacerdote ruwaptinmi chay runapa huchankunata ñoqa pampachasaq, hinaptinmi chay runa chuyaña kanqa.

²¹ Chay onqoq runa wakcha kasqanrayku qollqen mana haypaptinqa huk malta carnerotam pusamuwanqa culparayku ofrecewananpaq, chayqa huchakuna pampachasqa kananpaq ofrendam, chaytawan kuskatam ofrecewanqa aceitewan chapusqa iskay kilo masnin fino harinatapas, chayqa kawsaykunamanta ofrendam. Ofrecewanqataqmi cuarto litro masnin aceitetapas,

²² iskay qoqñuta otaq iskay mallqo palomakunatapas, hukninmi hucharayku ofrendapaq kanqa, hukninñataqmi lliw kañanapaq.

²³ Pusaq kaq punchawpim tukuy chaykunata apamunqa asuykamuwananku carpapa punkunman. Chaypim ñoqa Tayta Diospa qayllaypi sacerdoteman qonqa.

²⁴ Sacerdotem culparayku carnero ofrendata cuarto litro masnin aceiteyuqta ofrecewanqa. Chayqa ñoqa Tayta Diosman kuyuchispa ofrecewasqanku ofrendam.

²⁵ Chaymantam culparayku malta carnero ofrendata sacerdote wañuchinqa, hinaspam yawarninta chaskiykuspa chuyanchakuq runapa alleq rinrinpa uran patachanta llusiykunqa, llusinqataqmi alleq makinpa alleq chakinpa maman dedontapas.

²⁶ Chaymantam aceiteta sacerdote ichoq makinpa pampanman talliykunqa.

²⁷ Hinaspam alleq dedonta ichoq makinpi aceiteman challpuykuspan ñoqa Tayta Diospa ñawpaqniypi qanchis kutikama challanqa.

²⁸ Sacerdotem makinpi kaq aceitewan, millakuypaq kayninmanta chuyanchakuq runapa alleq rinrinpa ura patachanta llusinqa, llusinqataqmi alleq makinpa alleq chakinpa maman dedontapas. Chaynataqa llusinqa culparayku yawarwan llusisqanpa hawanmanmi.

²⁹ Puchuq aceitetañataqmi millakuypaq kayninmanta chuyanchakuq runapa umanman tallinqa, chaynapim chay runapa huchankunata ñoqa Tayta Dios pampachasaq.

³⁰ Chaymantam ofrecewaqniypa atisqanman hina, sacerdote ofrecewanqa huknin qoqñuta otaq huknin mallqo palomata.

³¹ Chaykunapa hukninmi hucharayku ofrendapaq kanqa, hukninñataqmi lliw kañanapaq. Chaywan kuskatataqmi millakuypaq kayninmanta chuyanchakuq runapa huchankunata pampachasaq.

³² Kaykunam lepra onqoywan kasqanmanta chuyanchakuq wakcha runakunapaq yachachikuy, nispa.

Wasikunapa lepranmanta

³³ Moisestawan Aarontam Tayta Dios kaynata nirqa:

³⁴ Sichum qamkunaman qonay Canaán allpapiña kachkaptikichik, hukkaqnikichikpa wasiman leprata kachaykamuptiyqa,

³⁵ chay wasiyuqmi sacerdoteman rispan ninqa: “Wasiypa perqankunapim qoqaray rikurirun”, nispa.

³⁶ Hinaptinqa sacerdotem manaraq wasiman yaykuchkaspan, chay wasimanta tukuy imakunatapas hurqonankupaq kamachinqa, chaynapi chay wasipi tukuy ima kaqkunapas mana millakuypaq rikurirunanpaq, chaymantañam qawananpaq sacerdote yaykunqa.

³⁷ Sichum sacerdote allinta qawaykuptin chay wasipa perqankunaman verde otaq puka qoqaraykuna yaykuchkaqña kaptinqa

³⁸ wasimantam lloqsiruspa qanchis punchawpaq wichqarunqa.

³⁹ Qanchis kaq punchawpiñataqmi kaqlla kutispan allinta qawapanqa; sichum chay qoqaraykuna wasipa perqankunapi miraruptinqa,

⁴⁰ sacerdotem chay wasipa perqanmanta qoqaraypa kasqan rumikunata hurqochinqa, hinaspam llaqtamanta hawapi millakuypaq sitioman wischuchimunqa.

⁴¹ Chaymantam wasipa ukunpi llapallan perqakunata allinta siksichinqa, hinaspam chay allpata llaqtamanta hawapi millakuypaq sitioman wischuchinqa.

⁴² Hinaspam wischuchisqan rumikunapa rantinpi huk rumikunataña churachinqa, perqakunatapas musoqmantam mituwan laqapachinqa.

⁴³ Sichum ruminkunatapas wischuchichkaptin chaynataq perqakunatapas siksichispa musoqmanta mituwan laqachichkaptin chay wasipa perqankunapi kaqllamanta qoqaray rikuriruptinqa,

⁴⁴ sacerdotem huktawan yaykuspan allinta qawanqa; sichum chay wasipi qoqaray miraruptinqa, chayqa lepra onqoymi, chay wasiqa millakuypaqñam kanqa.

⁴⁵ Chay wasitaqa tuñichispam ruminkunatapas, qerunkunatapas, allpantapas, llaqtamanta hawapi millakuypaq sitioman wischuchinqa.

⁴⁶ Chay wasi wichqasqa kachkaptin pipas yaykuqqa tutaykuqkamam millakuypaq kanqa.

⁴⁷ Pipas chay wasipi puñuqqa otaq mikuqqa pachantam taqsakunqa.

⁴⁸ Sichum sacerdote chay wasiman huktawan yaykuspa allinta qawaptin, musoqmanta laqapasqanku perqakunapi chay qoqaray mana miraruptinqa, qoqaray chinkarusqanraykum sacerdote ninqa chay wasiqa chuyaña kasqanta.

⁴⁹ Wasita chuyanchananpaqmi iskay urpituchakunata, cedro kaspita, puka qaytuta chaynataq hisopopa kallmantapas apamunqa.

⁵⁰ Hinaspam huknin urpituchata wañuchinqa chayraq wisimusqa yakuyuq allpa mankapa hawanpi.

⁵¹ Chaymantam cedro kaspita, hisopopa kallmanta, puka qaytuta chaynataq kawsachkaq huknin urpituchatapas hapiykunqa. Chaykunatam wañuchisqan urpituchapa yawarninman hinaspa chayraq wisimusqa yakuman challpuykuspan qanchis kutikama chay wasita challanqa.

⁵² Chaynatam qoqaraypa rikurisqan wasita, urpituchapa yawarninwan, chayllaraq wisimusqa yakuwan, kawsachkaq urpituchawan, cedro kaspiwan, hisopopa kallmanwan hinaspa puka qaytuwan chuyanchanqa.

⁵³ Kawsachkaq huknin urpituchatañataqmi pawakunanpaq llaqtamanta hawapi kachaykunqa. Chaynatam ruwanqa chay wasi manaña millakuypaq kananpaq.

⁵⁴ Kaykunam lepra onqoymanta, caracha onqoymanta,

⁵⁵ pachapi qoqaraymanta, wasipa perqanpi qoqaraymanta,

⁵⁶ aycha qarapi rikuriruq punkiykunamanta, pusllukunamanta chaynataq aycha qarapi rikuriq manchakunamantapas yachachikuykuna.

⁵⁷ Kaykunatam llaqtaman yachachinkichik lepra onqoyta, qoqaray onqoyta chaynataq millakuypaq kaqkunata hinaspa chuya kaqkunatapas reqsinankupaq, nispa.