Levítico 11 - Chuya Qellqa 1992

Mikunapaq hinaspa mana mikunapaq animalkunamanta

^1-2 Israelpa mirayninkunaman ninanpaqmi Moisestawan Aaronta Tayta Dios kaynata nirqa: Kay pachapi llapallan animalkunamantam

³ atakanpi pallqa situyuq chaynataq kutipaq animalkunata mikunkichik.

⁴ Ichaqa kutipaq kaptinpas camellotaqa amam mikunkichikchu, camelloqa kutipaq kaspapas manam pallqa situyuqchu. Chay animalqa mana mikunaykichikpaq hinam.

⁵ Conejotaqa amam mikunkichikchu, conejoqa kutipaq kaspapas manam situyuqchu. Chay animaltaqa millakuypaq animalpaqmi hapinkichik.

⁶ Vizcachataqa amam mikunkichikchu, vizcachaqa kutipaq kaspapas manam situyuqchu. Chay animaltaqa millakuypaqtam hapinkichik.

⁷ Kuchitaqa amam mikunkichikchu, kuchiqa pallqa situyuq kaspapas mana kutipaqmi. Chay animaltaqa millakuypaq animalpaqmi hapinkichik.

⁸ Chay animalkunapa aychantaqa amam mikunkichikchu, wañuruptinpas amam llapchayllapas-llapchaykunkichikchu. Chay animalkunataqa millakuypaqtam hapinkichik.

^9-10 Yakupi kawsaq animalkunamantaqa, lamar qochapi kaqta otaq mayupi kaqtapas, haykam raprayuq hinaspa escamayuq challwakunallatam mikunkichik; mana escaman kaptinqa amam mikunkichikchu, hatun kaptin otaq taksa kaptinpas.

¹¹ Chayna animalkunapa aychantaqa amam mikunkichikchu, wañuruptinpas aswanraqmi millakunkichik.

¹² Yakupi kawsaq llapallan animalkunamanta mana raprayuq hinaspa mana escamayuq kaptinqa millakunkichikmi.

^13-19 Alton pawaq animalkunamantaqa millakuypaq kasqankuraykum kaykunata ama mikunkichikchu: Ankakunata, aqchikunata, wamankunata, cuervokunata, avestruzkunata, chuseqkunata, qewllakunata, tukukunata, cormorankunata, ibiskunata, cisnekunata, pelicanokunata, ullachkukunata, cigüeñakunata, garzakunata, leqleskunata, condorkunata, abubillakunata hinaspa masukunatapas.

²⁰ Pawaspa pampanta tawa chakinwan puriq urukunataqa amam mikunkichikchu.

²¹ Pawaspa pampan puriq urukunamantaqa pawatyaq urukunallatam mikuwaqchik. Chay urukunapaqa piernanmi chakinwan iskayman patarasqa kanan, chaynapi pawaspan chakinwan takyananpaq.

²² Chay urukunamantam mikunkichik tukuy rikchaq aqaruwaykunata, tukuy rikchaq pinki-pinkikunata, chillikukunata hinaspa pinki-pikikunata.

²³ Pawaspa pampanta tawa chakinwan puriq llapallan urukunaqa millakuypaqmi kanqa.

²⁴ Chayna urukuna wañuruptin llapchaq runaqa tutaykunankamam millakuypaq kanqa.

²⁵ Pipas chay urukuna wañuruptin hoqariqqa pachantam taqsakunqa, hinaspam tutaykunankama millakuypaq kanqa.

²⁶ Tawa atakayuq animalkunamanta mana pallqa situyuq kaptinqa hinaspa mana kutipaq kaptinqa amam mikunkichikchu. Pipas llapchaqqa millakuypaqmi kanqa.

²⁷ Tawa chakiyuq animalkunamanta, chaki pampanwan sarupakuqtaqa amam mikunkichikchu. Chay animalkuna wañuruptin llapchaqqa tutaykunankamam millakuypaq kanqa.

²⁸ Chay animalkuna wañuruptin hoqariqqa pachantam taqsakunqa, hinaspam tutaykunankama millakuypaq kanqa, chay animalkunataqa millakuypaqmi hapinkichik.

²⁹ Pampan puriq animalkunamantapas kaykunatam ama mikunkichikchu: Unchuchukukunata, ukuchakunata, tukuy rikchaq lagartijakunata,

³⁰ sukullukuykunata, cocodrilokunata, lagartokunata hinaspa camaleonkunata.

³¹ Chaynaqa, chay pampan puriq animalkunamantam chaykunata millakuypaq hapinkichik. Chay animalkuna wañuruptin llapcharuqqa tutaykunankamam millakuypaq kanqa.

³² Chayna animalkuna wañuruspa imapas kullumanta ruwasqaman, pachaman, qaraman, costalman, otaq ima herramientamanpas wichiykuptinqa yakumanmi hinankichik, chaynapim tutaykunankama ama pipas hapinqachu, chaymantañam huktawan servikunqa.

³³ Chay animalkunamanta wañuruspa allpa mankaman wichiykuptinqa, chay allpa mankapas hinaspa ukunpi tukuy ima kaqpas millakuypaqmi kanqa, chay mankapas pakipasqam kanqa.

³⁴ Ima mikuymanpas chay mankapi yaku tallikuykuptinqa, chay mikuymi millakuypaqña kanqa, chay mankapi ima upyana kaqpas millakuypaqñam kanqa.

³⁵ Chayna animalkuna wañuruspan imamanpas wichiykuptinqa mana servikuqñam kanqa, horno kaptinpas otaq tullpa kaptinpas pakipankichikmi. Chaykunataqa millakuypaq kasqanraykum millakuypaqña hapinkichik.

³⁶ Yaku tomananku pukyuman otaq pozoman wichiykuptinmi ichaqa, chay yakuqa hinalla tomanapaq kanqa; chay animalkuna wañuptin llapchaqmi ichaqa tutaykunankama millakuypaq kanqa.

³⁷ Sichum chayna animalkuna wañuruspan tarpuna muhupa hawanman wichiykuptinqa amam wischunkichikchu aswanqa servikunqam;

³⁸ nuyusqa muhupa hawanman wichiykuptinmi ichaqa, chay muhuqa mana servikuqña kanqa.

³⁹ Mikunapaq animalnikichikmanta mayqanninpas wañuruptinqa, chay wañusqata tupaykuqmi tutaykunankama millakuypaq kanqa.

⁴⁰ Chay wañusqa animalpa aychanta mikuqqa pachanta taqsakuspanmi tutaykunankama ama asuykamuwanqachu, chay wañuruq animalta hoqariqpas pachantam taqsakunqa hinaspam tutaykunankama millakuypaq kanqa.

⁴¹ Qasqonpa pampan puriq llapallan animalkunataqa amam mikunkichikchu. Chay animalkunataqa millakuypaqmi hapinkichik.

⁴² Qasqonpa pampan puriq llapallan animalkunamantaqa amam mikunkichikchu tawa chakiyuqña otaq achka chakiyuqña kaptinpas. Chay animalkunataqa millakuypaqmi hapinkichik.

⁴³ Amayá chay animalkunata mikuspa otaq wañuruptin llapchaspa kikillaykichikqa millakuypaqta ruwakuychikchu.

⁴⁴ Ñoqa Tayta Diosmi Diosnikichik kani. Ñoqa chuya kasqayraykuyá qamkunapas sapaqchakuspa chuyanchakuychik. Amayá pampan puriq animalkunata llapchaspaqa millakuypaqta ruwakuychikchu.

⁴⁵ Diosnikichik kanaypaqmi Egipto nacionmanta ñoqa Tayta Dios hurqomurqaykichik. Chaynaqa, chuya kasqayraykuyá qamkunapas chuya kaychik, nispa.

⁴⁶ Kaykunam lliw animalkunamanta, raprayuq animalkunamanta, yakupi kawsaq animalkunamanta hinaspa pampan puriq animalkunamanta yachachikuyniykuna.

⁴⁷ Chaynaqa, amam pantarunkichikchu mayqanmi allin animal kasqantapas otaq mayqanmi millakuypaq animal kasqantapas. Mayqanmi mikuna animal kasqantapas otaq mayqanmi mana mikuna animal kasqantapas.