Jueces 7 - Chuya Qellqa 1992

Madianitakunata Gedeón vencesqanmanta

¹ Paqarinnintin tutapayta hatariruspankum, Jerobaalwan sutichasqa Gedeón hinaspa paywan kaq llapallan runakuna, Harod pukyupa waqtanpi carpankuta sayachirqaku. Madianitakunapa campamentonñataqmi paykunapa norte lawninpi More moqopa hichpan qechwapi tarikurqa.

² Hinaptinmi Gedeonta Tayta Dios nirqa: Madianitakunata makikiman churanaypaqqa qanwan kaq runakunam achkallaña kachkanku, yanqañataq Israel miraykunaqa hatunchakunmanku, “kikiykum librakunikuqa”, nispanku.

³ Chaynaqa, kunanyá runakunata niy: “Pipas manchakuqqa otaq umpu runaqa Galaad orqomanta wasinman kutikuchunku”, nispa. Chaymi llapa runakunamanta iskay chunka iskayniyuq waranqa kutikuptinku chunka waranqallaña qeparurqa.

⁴ Yapamantam Gedeonta Tayta Dios nirqa: Runakunaqa achkaraqmi kachkan, chaynaqa yakuta tomanankupaq pusay, chaypim huk kutitawan pruebamusaq, pikunam qanwan rinanta chaynataq pikunam mana rinantapas, nispa.

⁵ Hinaptinmi runakunata yakuman Gedeón pusarqa, chaypim Gedeonta Tayta Dios nirqa: Pipas yakuta allqo hina laplaqtam huklawman sapaqchanki, pipas qonqorakuykuspa tomaqtañataqmi huklawman sapaqchanki, nispa.

⁶ Makiwan hoqarispa yaku laplaqkunam karqaku kimsa pachak qarikuna, wakinkunañataqmi qonqorakuykuspa tomarqaku.

⁷ Hinaptinmi Gedeonta Tayta Dios nirqa: Kay kimsa pachak qarikunawanmi libraspay madianitakunata makikiman churasaq, wakinkuñataqyá wasinkuman sapakama kutikuchunku, nispa.

⁸ Hinaptinmi Gedeonqa Israelpa miraykunamanta mana akllasqa kaqkunata wasinkuman aviarurqa, ichaqa manaraq pasakuchkaptinkum qoqawninkutawan cornetankuta huñurachirqa; chay kimsa pachak qarikunallawanñam qeparurqa, hinaspam madianitakunapa campamentonpa hanaynin qechwapi samarurqaku.

⁹ Chay tutam Gedeonta Tayta Dios nirqa: Hatarispa madianitakunapa campamentonman uraykuy, paykunatam makikiman churasaq.

¹⁰ Peleaq riyta manchakuspaykiqa criadoyki Furawan campamentonkuman uraykuy,

¹¹ hinaspa imam rimasqankuta uyarimuy. Rimasqankuta uyarisqaykiwan kallpanchakuspam campamentopi kaq runakupa contranpi uraykunki, nispa. Hinaptinmi criadon Furawan rirqa enemigonkunapa campamentonta waqaychaq soldadokunapa kasqankama.

¹² Chay pampapim madianitakuna, amalecitakuna hinaspa intipa qespimunan lawmanta kaqkuna aqaruway urukuna hinaña achkallay-achka mastarayachkasqaku, camellonkupas lamarpa patanpi aqo hinaña mana yupay atinam kachkasqa.

¹³ Enemigopa campamentonman chayaruspanmi, Gedeón uyarirurqa huk soldado mosqokusqanta soldadomasinman kayna willachkaqta: Mosqoyniypim qawachkasqani cebada tantata campamentonchikkama kururakamuspa huk carpata hapiruspan wichiykachiqta, nispa.

¹⁴ Chaymi soldadomasinñataq nirqa: Chay mosqoyqa Israel casta Joaspa churin Gedeonpa guerrapi ganananmanta willakuymi. Diosmi madianitakunata llapallan campamentontinta Gedeonman qoykunqa, nispa.

¹⁵ Gedeonñataqmi mosqoy willakusqanta chaynataq imam ninanta uyariykuspan Tayta Diosta yupaycharqa. Israel miraykunapa campamentonman kutiruspanmi nirqa: ¡Hatariychik, Tayta Diosmi madianitakunapa campamentonta qoykuwasunchik! nispa.

¹⁶ Chay kimsa pachak runakunata kimsaman rakiruspanmi sapakamaman trompetata qorqa, qorqataqmi ukunpi ratachkaq mecheroyuq puyñukunatapas.

¹⁷ Paykunatam nirqa: Madianitakunapa campamentonpa patanman chayaruptiymi qamkunapas ruwankichik ñoqapa ruwasqayta hina.

¹⁸ Riqmasiykunawan trompetata tocamuptiykum qamkunapas tukuy campamentopa muyuriqninpi tocankichik, hinaspam qaparinkichik: “¡Tayta Diosrayku hinaspa Gedeonrayku!” nispaykichik.

¹⁹ Campamento waqaychaqkunata cambiaruptillankum, yaqa chawpi tutata Gedeonqa pusasqan pachak runakunapiwan campamentoman chayarurqaku, hinaspam trompetankuta tocaspa sapakama puyñu apasqankuta pakirqaku.

²⁰ Kimsaman rakisqa tropakunam trompetankuta tocaspa puyñunkuta pakirqaku. Ichoq makinkuwan mecherota hapispankum alleq makinkuwanñataq trompetata tocarqaku, hinaspam qaparirqaku: ¡Tayta Diosrayku hinaspa Gedeonrayku peleaychik! nispanku.

²¹ Israel castakuna sapakama campamentopa muyuriqninpi sayaruptinkum, Madián tropakuna qapariyllawanña lluptikurqaku.

²² Israel castakunamanta kimsa pachak runakuna trompetankuta tocaptinkum, campamentopi kaq madianitakunata kikinkupurata Tayta Dios peleanarachirqa. Ayqespankuñataqmi Zerera lawman riq Bet-sita lawkama lluptirqaku, Tabat lawpa hichpanpi kaq Abel-mehola llaqtapa linderonkama.

²³ Chaymantam Gedeón qayachirqa Israelpa miraynin Neftalí ayllukunata, Aser ayllukunata chaynataq Manasés ayllukunatapas, madianitakunata qatinankupaq.

²⁴ Gedeonmi Efraín law orqokunapi yachaq llapallan runakunaman willakuqkunata kacharqa kaynata nimunankupaq: Madianitakunata rispa hapimuychik, Bet-bara llaqtapa hichpanpi Jordán mayupa vadonkunapi churakamuychik manaraq paykuna chayaruchkaptinku, nispa. Chaymi llapallan Efraín castakuna huñunakuruspanku Bet-bara llaqtapa hichpanpi Jordán mayupa vadonkunapi churakururqaku.

²⁵ Madián tropakunapa kamachiqnin Orebtawan Zeebtapas presocharurqakum; Orebtam Oreb qaqapi wañurachirqaku. Zeebtañataqmi uvas sarunanku Zeeb pozopi wañurachirqaku. Madianitakunata qatispankum rey Orebpa hinaspa rey Zeebpa umankunata Gedeonman Jordán mayupa chimpanpi kachkaptin apamurqaku.