Jueces 5 - Chuya Qellqa 1992

Deborawan Barac takisqankumanta

¹ Chay punchawpim Deborawan Abinoampa churin Barac kaynata takirqaku:

² Israelpa kamachiqninkuna ñawpaqman churakusqankumantayá, guerraman rinankupaq kikillankumanta ofrecekuq runakunamantayá, ¡Tayta Diosman graciasta qoychik!

³ ¡Llapa reykuna, uyariychik! ¡Kamachikuqkuna, uyariychik! Ñoqam Tayta Diosman takisaq, Israelpa Diosninmanmi takisaq.

⁴ Dios Taytalláy, Seir orqomanta lloqsimuptikim, Edom nacionpa pampankumanta pasakuptikim kay pachapas hanaq pachapas katkatatarqa, puyukunamantam paramurqa.

⁵ Tayta Diospa qayllanpim orqokuna katkatatarqa, Israelpa Diosninpa qayllanpim Sinaí orqopas kuyurqa.

⁶ Anatpa churin Samgarpa tiemponkunapiqa, Jaelpa punchawninkunapiqa manam ñannintañachu purirqaku, illaqkunapas llutan ñanninkunatañam purirqaku.

⁷ Israelpi taksa llaqtakunapas saqesqam karqaku, chaynaqa karqaku ñoqa Débora hatarinaykamam, Israelpa maman hinam hatarirqani.

⁸ Mana reqsisqanku dioskunatam akllakuykurqaku, guerrañataqmi llaqtakunapa punkunpiña kachkarqa, tawa chunka waranqa Israel miraykunapiqa manam chulla lanzallapas rikukurqachu, manataqmi huk escudollapas karqachu.

⁹ Israelpa capitanninkunawanmi sonqoyqa kachkan, guerraman rinankupaq kikillankumanta hatariqkunawanmi sonqoyqa kachkan. ¡Tayta Diosta llapallaykichik yupaychaychik!

¹⁰ Yuraq china asnopi sillakuqkuna, pillonpi tiyaqkuna, chakillawan illaqkuna willakuychik.

¹¹ Uywakunapa yaku tomananpi, platillokunata tocaspa Tayta Diospa vencesqanmanta yupaychaychik, Israel ayllukunapa vencesqankumanta takiychik; Tayta Diospa runankunam llaqtapa punkunman richkanku.

¹² ¡Rikchariy Débora, rikchariy! ¡Rikcharispayki takikunata takiy! Abinoampa churin Barac, hatarispayki presochasqaykikunata apay.

¹³ Israelmanta puchuq capitankunam uraykamurqaku, Tayta Diospa runankunam kallpasapa soldadokunapa contranpi rirqaku.

¹⁴ Efraín ayllumantam Amalec lawpi yachaqkuna hamurqaku, paykunapa qepantam Benjamín ayllukuna hamurqaku. Maquir lawmantam capitankuna hamurqaku, Zabulón ayllumantam kamachikuqkuna hamurqaku.

¹⁵ Isacar ayllumanta kamachikuqkunam Deborawan rirqaku, Isacar ayllukunaqa Baracwanmi karqaku, paypa qepantam wayqoman uraykurqaku. Rubén ayllupim tukuy imata tanteanakurqaku.

¹⁶ ¿Imanasqataq ovejakunapa kanchanpi qeparurqankichik? ¿Ovejakunapa qapariyninta uyarispa qeparurqankichik? Rubén ayllukunaqa manchati runakunam karqaku.

¹⁷ Galaad ayllukunam Jordán mayupa chimpanpi qeparamurqaku, Dan ayllukunam barcokunapa waqtanpi qeparamurqaku; Aser ayllukunapas lamar qochapa patanpim qeparamurqaku, barconkunapa sayananpim qeparamurqaku.

¹⁸ Zabulón ayllukunam ichaqa wañuytapas mana manchakurqakuchu, Neftalí ayllukunapas mana manchakuspam orqokunapi pelearqaku.

¹⁹ Reykunam Taanac lawman hamuspa pelearqaku, Canaán allpapi reykunam Meguido yakukunapa hichpanpi pelearqaku, ichaqa manam qollqetapas nitaq imatapas aparqakuchu.

²⁰ Cielopi chaskakunam pelearqaku, maymi kasqankumantam Sisarapa contranpi pelearqaku.

²¹ Cisón wayqopi lloqllam llapa enemigonchikta aparurqa, Cisón wayqopi ñawpaq lloqllam paykunata aparurqa. Ñoqallayqa mana manchakuspam ñawpaqman risaq.

²² Caballokunapa kallpasqanmi uyarikurqa, kallpasapa caballokunapa kallpasqanmi uyarikurqa.

²³ Tayta Diospa angelninmi kaynata nin: “Meroz llaqtapi yachaqkunata ñakaychik, Tayta Diospa tropankuna kallpasapa tropakunawan peleaptin yanapaq mana hamusqankumanta”, nispa.

²⁴ Ceneo Heberpa warmin Jaelyá llapallan warmikunamanta aswan bendecisqa kachun. Carpapi yachaq warmikunamantapas aswan bendecisqayá kachun.

²⁵ Yakuta Sísara mañakuptinmi Jaelqa lecheta qoykurqa, sumaq tazonpim lluklluta qoykurqa.

²⁶ Huknin makinwanmi estacata hapiykurqa, alleq makinwanñataqmi llamkaqpa mazonta hapiykurqa, hinaspam Sisarata estakawan rinri kullunpi takaruspan umanta pasarachirqa.

²⁷ Jaelpa ñawpaqninpim Sísara qepichakururqa, qepichakuruspanmi pampapi chutarikururqa, chayllapim wañururqa.

²⁸ Sisarapa mamanmi ventananta qawaspan kaynata nirqa: “¿Imanasqataq wawaypa carretan mana chayamunchu? ¿Imanasqataq carretankuna llumpayta tardearamun?” nispa.

²⁹ Yachayniyuq warmikunañataqmi nirqaku, kikinpunipas kaynatam nikurqa:

³⁰ Guerrapi ganasqankutachiki rakinakuchkanku, sapa soldadomanchiki hukta otaq iskay sipasta qochkanku; Sisaramanñataqchiki kuyayllapaq pachakunata qochkanku, sumaq colorkunawan bordasqa telakunatachiki hukta otaq iskayta kunkanman wallqakunanpaq qochkanku, nispa.

³¹ ¡Dios Taytalláy, llapa enemigoykikuna chaynata wañuchunku! ¡Kuyasuqnikikunayá ichaqa qespimuq inti hinaraq kancharichunku! nispa. Chaymantam tawa chunka wata hawka karqaku.