Jueces 2 - Chuya Qellqa 1992

Boquim lawman Tayta Diospa angelnin risqanmanta

¹ Gilgal llaqtamanta Boquim lawman Tayta Diospa angelnin rispanmi Israelpa mirayninkunata nirqa: Ñoqam Egipto nacionmanta hurqomurqaykichik, hinaspam ñawpaq taytaykichikman prometispa qosqay allpaman pusamurqaykichik. Paykunamanmi nirqani: “Qamkunawan pacto ruwasqaytaqa manam yanqachasaqchu,

² ichaqa qamkunam kay allpapi yachaqkunawan ama ima contratotapas ruwankichikchu, aswanqa altarninkutapas tuñichinkichikmi”, nispay. Chaynata nichkaptiypas manam kasukurqankichikchu. ¿Imanasqataq kaynataqa ruwarunkichik?

³ Chayraykum nikichik: “Chay runakunataqa manam qayllaykichikmanta qarqosaqchu, paykunam qamkunapaq sasachakuy qosuqnikichik kanqa, diosninkupas wichichiqnikichikmi kanqa”, nispa.

⁴ Tayta Diospa angelnin chaynata niruptinmi Israelpa mirayninkuna qaparispa waqarqaku.

⁵ Chayraykum chay lugarta Boquimwan suticharqaku, hinaspam animalkunata wañuchispa Tayta Diosman ofrecerqaku.

Josueypa wañukusqanmanta

⁶ Runakunata Josué aviaruptinmi Israelpa mirayninkuna, tupaqninku allpaman sapakama pasakurqaku.

⁷ Josueypa kawsanankamaqa chaynataq wiñaymasin ancianonkunapas kawsanankamaqa, Israel runakunam Tayta Diosta servirqaku; chay ancianokunaqa rikurqakum Israelpa mirayninkunapaq Tayta Diospa tukuy ima ruwasqanta.

⁸ Tayta Diospa serviqnin Nunpa churin Josueymi pachak chunka watanpiña wañukurqa.

⁹ Hinaptinmi Timnat-sera law allpapi pamparurqaku, Efraín law orqonpi, otaq Gaas orqopa norte lawninpi.

¹⁰ Josueypa wiñaymasinkunapas, ñawpaq taytanku hina wañukuptinkum paykunapa qepanta huk miraykunaña nacemurqa, paykunaqa manam Tayta Diosta reqsirqakuchu, nitaqmi Israelpa mirayninkunapaq Tayta Diospa imakunam ruwasqantapas yacharqakuchu.

Israel runakuna Tayta Diosta qepanchasqankumanta

¹¹ Israelpa mirayninkunam Tayta Diospa qayllanpi mana allinta ruwarqaku, paykunaqa Baal sutiyuq idolokunatañam yupaycharqaku.

¹² Ñawpaq taytankupa, Egipto nacionmanta hurqomuqninku Tayta Diosta saqeruspankum, idolokunataña qatispanku muyuriqninkupi runakunapa diosninkutaña yupaycharqaku, chaynapim Tayta Diosta piñachirqaku.

¹³ Tayta Diosta qepanchakuruspankum Baal chaynataq Astarot idolokunataña yupaycharqaku.

¹⁴ Chayraykum Israel castakunapa contranpi Tayta Dios piñakuruspan suwakunawan llapa imankuta suwachirqa. Muyuriqninkupi enemigonkunaman qoykuptinmi manaña ima ruwakuytapas atirqakuchu.

¹⁵ Sapa kuti guerraman riptinkupas Tayta Diosmi paykunapa contranpi karqa, ñawpaqmantaraq juraspa nisqanman hina. Ichaqa chaynataña ñakarichichkaspanpas,

¹⁶ Tayta Diosqa kamachikuqkunatam hatarichirqa suwakunamanta librananpaq.

¹⁷ Chaywanpas Israelpa mirayninkunaqa manam chay kamachiqkunatapas kasurqakuchu, paykunaqa Tayta Diosta qepanchakuruspankum idolokunataña yupaycharqaku. Tayta Diospa kamachikuyninkunatam ñawpaq taytankuqa kasukurqaku, paykunam ichaqa chaylla saqerurqaku.

¹⁸ Hinaptinmi kamachiqkunata Tayta Dios hatarichispan yanaparqa. Chay kamachiq kawsanankamaqa paykunatam enemigonkunamanta librarqa. Tayta Diosmi paykunata ñakariypi hinaspa llakikuypi kaspa waqasqankuta uyarispa llakipayarqa.

¹⁹ Kamachiqninku wañuruptinqa kasqallanmi huchallikuyta qallaykuqku, hinaspam ñawpaq taytankumantapas aswan penqakuypaq kaqtaraq ruwaqku. Idolokunataña servispankum qonqoraspa yupaycharqaku. Manam wanakuqkuchu mana allin ruwayninmantawan rumi sonqo kayninkumantaqa.

²⁰ Chaymi Israel runakunapa contranpi Tayta Dios piñakuruspan nirqa: Kay runakunaqa ñawpaq taytankuwan pacto ruwasqayta qepanchaspam nisqaykunatapas mana kasukunkuchu,

²¹ chayraykum ñoqapas mana qarqosaqchu Josueypa mana qarqosqan nacionkunataqa, nispa.

²² Chay nacionkunawanmi Israelpa mirayninkunata Tayta Dios pruebarqa, chaynapi kasukusqankuta otaq mana kasukusqankutapas yachananpaq, ñawpaq taytankuqa paypa munasqanman hinam kawsarqaku.

²³ Chayraykum Tayta Diosqa chay nacionniyuq runakunata saqerurqa, manam chayllaqa qarqorurqachu, Josueywanpas manataqmi qarqochirqachu.