Jueces 17 - Chuya Qellqa 1992

Micaiapa templonmanta

¹ Efraín law orqokunapim Micaía yacharqa.

² Paymi mamanta nirqa: Chunka kimsayuq kilo qollqeta suwarachikuspaykim suwata ñakarqanki, chay qollqeqa makiypim kachkan, ñoqam suwarurqayki, nispa. Chaynata niptinmi maman nirqa: Wawalláy, Tayta Diosyá bendecisunki, nispa.

³ Chay chunka kimsayuq kilo qollqeta mamanman Micaía kutiykachiptinmi, maman nirqa: Cheqaptapunipas chay qollqetaqa wawayraykum Tayta Diospaq sapaqcharqani, llaqllaspa chaynataq chulluchispa ruwasqa idolokunata ruwachinaypaq, chaynaqa qanmanñayá qosqayki, nispa.

⁴ Chay qollqeta Micaía kutiykachiptinmi, maman iskay kilo masnin qollqeta plateroman qoykurqa llaqllaspa chaynataq chulluchispa ruwasqa idolokunata ruwananpaq; chay idolokunatam Micaiapa wasinman churarqaku.

⁵ Micaiapaqa wasinpim karqa idolonkuna yupaychanan capillan, hinaptinmi efodtawan terafinkunata otaq idolokunata ruwarachispa huknin churinta sacerdote kananpaq churarqa.

⁶ Chay punchawkunapiqa manaraqmi rey Israel nacionpi karqaraqchu, chayraykum sapakama munasqankuta ruwarqaku.

⁷ Judá law Belén llaqtapim Judá ayllumanta kaq joven yacharqa, payqa levitam karqa.

⁸ Paymi Judá lawpi Belén llaqtamanta lloqsirqa maypim yachananpaq maskastin, chaymi richkaspan Efraín law orqokunapi yachaq Micaiapa wasinman chayarurqa.

⁹ Hinaptinmi Micaía tapurqa: ¿Maymantataq hamuchkanki? nispa. Chaymi Leví casta jovenñataq nirqa: Judá lawpi Belén llaqtamanta kaqmi kani, maypim yachanaypaqmi allpata maskachkani, nispa.

¹⁰ Hinaptinmi Micaía nirqa: Kay wasiypiyá yachakuy, sacerdotey kaspa taytay hinaña kanaykipaq. Ñoqañataqmi tawa chunka onza llasaq qollqeta watapi pagasqayki, qosqaykitaqmi pachaykitawan mikunaykitapas, nispa.

¹¹ Chaymi Leví casta jovenqa Micaiapa nisqanta “allinmi” nispan paywanña yachaspan Micaiapa churin hinaña karqa.

¹² Chay joventa sacerdotenpaq Micaía churaruptinmi wasinpiña yacharqa.

¹³ Sacerdotenpaq churaruspanmi Micaiaqa tantearqa: Kunanqa Tayta Diosmi bendeciwanqa, Leví casta sacerdotey kapuwasqanrayku, nispa.