Jueces 14 - Chuya Qellqa 1992

Sansonpa casarakusqanmanta

¹ Sansonmi Timnat llaqtaman rispan chaypi Filisteamanta kaq sipasta rikururqa.

² Chay llaqtamanta kutiramuspanmi tayta-mamanman kaynata willarqa: Timnat llaqtapim filisteokunapa churinmanta kaq sipasta rikuramuni, ama hina kaspayá paywan casarachiwaychik, nispa.

³ Hinaptinmi tayta-maman nirqaku: ¿Manachu ayllunchikpi otaq nacionninchikpi warmi kan paywanraq casarakunaykipaq? ¿Imanasqataq Tayta Diosta mana reqsiq Filistea warmiwanraq casarakuyta munachkanki? nispanku. Chaymi taytanta Sansón nirqa: Chay sipasmi sonqoyta suwaruwan, casarakunaypaq payta hurqopamuwaychik, nispa.

⁴ Tayta-mamanqa manam yacharqachu Sansonpa munasqanqa Tayta Diosmanta kasqanta. Tayta Diosqa filisteokunata imaynam castigaruytam maskachkarqa; chay tiempopiqa Filistea castakunam Israel miraykunapi munaychakuchkarqaku.

⁵ Sansonmi tayta-mamanpiwan Timnat llaqtaman rirqaku. Timnat lawpi uvas huertakunaman chayaruptinmi, huk malta león qaparispan Sansonman pawaykamurqa.

⁶ Chaymi Sansonman Tayta Diospa Espiritun huntaykuptinmi, yaqa uña cabrata tisapachkaq hina mana imallawan tisaparurqa. Ichaqa manam chay ruwasqanta tayta-mamanman willakurqachu.

⁷ Chayaruspanmi sipasta rimapayarqa, hinaptinmi chay sipasqa Sansonpa sonqonpaq hina karqa.

⁸ Punchawkuna pasaruptinmi, chay warmiwan casarakunanpaq kutispan, ñanmanta rakikururqa wañuchisqan leonta qawananpaq. Qawaykuptinmi leonpa ayanpi nana-nanaq abeja chaynataq miel kachkasqa.

⁹ Chayta hurqoykuspanmi mikustin ñanta rirqa. Tayta-mamanta hayparuspanmi paykunamanpas mikunankupaq qoykurqa, ichaqa manam willakurqachu chay mielta leonpa cuerponmanta hurqomusqanta.

¹⁰ Sansonpa taytanmi sipaspa wasinman rirqa, chaypim Sansón huk convidota ruwachirqa jovenkunapa costumbrenman hina.

¹¹ Filisteokunañataqmi Sansonta manchakuspanku, paywan kanankupaq kimsa chunka jovenkunata akllarurqaku.

¹² Chaymi compañaqninkunata Sansón nirqa: Kunanmi huk watuchita nisqaykichik, sichum kay qanchis punchaw convido tukuykama imam ninanta qamkuna niykuwaptikichikqa, linomanta kimsa chunka pachakunatawan kimsa chunka fiesta pachakunatam qosqaykichik.

¹³ Imam ninan kasqanta mana atispaykichikqa, linomanta kimsa chunka pachakunatawan kimsa chunka fiesta pachakunatam qowankichik, nispa. Hinaptinmi paykunañataq nirqaku: Niwaykuyá chay watuchikita, nispanku.

¹⁴ Chaymi paykunata nirqa: “Mikukuqmantam mikuy lloqsiramun, kallpayuqmantam miski lloqsiramun”, nispa. Kimsa punchawñam pasarurqa, ichaqa manam chay watuchipa imam ninan willayta atirqakuchu.

¹⁵ Tawa punchawmanmi, Sansonpa warminta chay jovenkuna nirqaku: Qosaykita tapuy kay watuchipa imam ninanta willawanaykikupaq, mana chayqa qamtam aylluykikunatawan kuskata kañaykusqaykiku. ¿Suwawanaykikupaqchu kayman convidaramuwarqankiku? nispanku.

¹⁶ Chaymi Sansonpa warminqa, waqaspan Sansonta nirqa: Qamqa cheqniwankim, manam kuyawankichu, llaqtamasiykunamanmi huk watuchita nirqanki, ichaqa manam imam ninanta willaykuwankichu, nispa. Sansonñataqmi nirqa: ¿Tayta-mamaymanpas mana willachkaspaychu qanmanñataq willaruykiman? nispa.

¹⁷ Chay warmim Sansonpa qayllanpi qanchisnintin punchaw convido tukuykama waqapayarqa. Waqapayaspa tapupayasqanraykum, convidopa qanchis kaq punchawninpi, watuchipa imam ninanta willaykurqa, chay warmiñataqmi llaqtamasinkunaman willaykurqa.

¹⁸ Hinaptinmi qanchis kaq punchawpi, manaraq inti seqaykuchkaptin, chay runakuna Sansonta nirqaku: Mielmantapas aswan miskiqa ¿imaraqtaq kanman? Leonmantapas aswan kallpayuqqa ¿imaraqtaq kanman? nispanku. Chaymi Sansonñataq paykunata nirqa: Vaquillaywan yapuruspaykichikmi watuchiypa imam ninanta yacharunkichik, nispa.

¹⁹ Tayta Diospa Espiritun Sansonman huntaykuptinmi, Ascalón llaqtaman rispan, paykunapa castanmanta kimsa chunka qarikunata wañurachirqa. Paykunamanta qechumuspanmi, watuchipa imam ninanta willaqninkunaman fiesta pachakunata qoykurqa, hinaspam llumpay piñasqa taytanpa wasinman kutikurqa.

²⁰ Chaykamam warmintañataq Sansonpa hukkaqnin amigonwan casararachirqa.