Jueces 13 - Chuya Qellqa 1992

Sansonpa nacesqanmanta

¹ Israelpa mirayninkunam Tayta Diospa qayllanpi huktawan huchallikururqaku, hinaptinmi tawa chunka watapaq Filistea castakunaman Tayta Dios qoykurqa.

² Zora llaqtapim Dan ayllumanta kaq Manoa yacharqa, warminñataqmi mana wachakuq karqa.

³ Chay warmimanmi Tayta Diospa angelnin rikuriykuspan nirqa: Qamqa mana wachakuq kachkaspapas wiksayakuspaykim qari wawata wachakunki.

⁴ Chaynaqa, amam vinota nitaq ima sinkachikuqtapas upyankichu. Amataqmi mana mikuna kaqkunatapas mikunkichu.

⁵ Wiksayakuspam qari wawata wachakunki. Paypa chukchantaqa amam pipas rutunqachu, payqa nacesqanmantapunim Diospaq sapaqchasqa kanqa. Paymi Israel nacionta Filistea castakunamanta libranqa, nispa.

⁶ Chaymi hamuspan qosanman kaynata willarqa: Diospa runanmi ñoqapa kasqayman hamusqa, rikchayninpas Diospa angelnin hinam kasqa. Manam maymantam kasqantapas tapurqanichu, nitaqmi sutintapas willawarqachu.

⁷ Ichaqa kaynatam niwarqa: “Wiksayakuspaykim qari wawata wachakunki, amam vinota nitaq ima sinkachikuqtapas upyankichu, amataqmi mana mikuna kaqkunatapas mikunkichu, chay wawaqa mamanpa wiksanmantapunim wañukunan punchawkama Diospaq sapaqchasqa kanqa”, nispa.

⁸ Chaymi Tayta Diosta mañakuspan Manoa nirqa: Señorlláy, mañakuykim, chay qampa kachamusqayki runayá ñoqaykuman kutimuspa chay nacemuq wawawan imam ruwanaykuta yachachiwachunku, nispa.

⁹ Manoapa mañakusqanta Tayta Dios uyariruptinmi, chay warmi campopi kachkaptin Diospa angelnin huktawan kutimurqa. Manoam ichaqa mana chaypichu tarikurqa.

¹⁰ Warmiñataqmi utqayllamanña kallpaspan qosanman kaynata willamurqa: ¡Qayninpa rikuriwaqniy runam huktawan rikuriykuwan! nispan.

¹¹ Chaymi Manoaqa warminwan rispan, chay runapa kasqanman chayaruspan nirqa: ¿Qamchu warmiywan rimaq runa kachkanki? nispa. Payñataqmi nirqa: Arí ñoqam kachkani, nispa.

¹² Hinaptinmi Manoa nirqa: Nisqaykikuna cumplikuptinqa ¿imaynatataq chay wawata uywasaqku? ¿Imatataq chay wawa ruwanqa? nispa.

¹³ Chaymi Manoata Diospa angelnin nirqa: Warmikim ñoqapa imam nisqaykunata ruwanan.

¹⁴ Uvasmanta kaqtaqa amam imatapas upyanqachu, nitaqmi vinomanta kaq ima sinkachikuqtapas upyanqachu. Amataqmi mana mikuna kaqkunatapas mikunqachu, lliw kamachisqaytayá kasukuchun, nispa.

¹⁵ Hinaptinmi Tayta Diospa angelninta Manoa nirqa: Ama hina kaspaykiyá huk cabrachata yanurapunaykukama suyaykuwayku, nispa.

¹⁶ Tayta Diospa angelninñataqmi nirqa: Harkawaptikipas mikuynikitaqa manam mikusaqchu, animal ofreceyta munaspaqa Tayta Diosman ofrecey, nispa. Manoaqa manam yacharqachu, chay runaqa Tayta Diospa angelnin kasqantaqa.

¹⁷ Chayraykum Tayta Diospa angelninta tapurqa: Sutikitayá willaykuwayku niwasqaykiku cumplikuptin qamta reqsikunaykupaq, nispa.

¹⁸ Chaymi Tayta Diospa angelnin nirqa: ¿Imanasqataq sutiyta tapuwanki? Sutiyqa admirakuypaqmi, nispa.

¹⁹ Hinaptinmi Manoaqa huk cabrachatawan kawsaykunamanta ofrendata apaspan rumipa hawanpi Tayta Diospaq kañapurqa. Chaymi warmi-qari qawachkaptinku Tayta Diospa angelnin huk milagrota ruwarqa.

²⁰ Altarmanta nina altoman lenwaptinmi, chay lenwachkaq ninapi Tayta Diospa angelnin wicharirqa. Chayta rikuruspankum Manoaqa warminpiwan pampakama qonqoranpa kumuykurqaku.

²¹ Chaymi Manoa yacharurqa chay runaqa Tayta Diospa angelnin kasqanta. Chaymanta qepamanqa manañam Tayta Diospa angelninqa paymanpas nitaq warminmanpas huktawanqa rikurirqañachu.

²² Hinaptinmi warminta Manoa nirqa: Diostam rikurunchik, kunanqa cheqaptapunim wañurusun, nispa.

²³ Hinaptinmi warmin nirqa: Sichum Tayta Dios wañunanchikta munaspanqa manachá ofrenda kañasqanchiktapas nitaq kawsaykunamanta ofrendatapas chaskiwachwanchu karqa, manataqchá tukuy kaykunatapas qawachiwachwanchu karqa, nitaqcha kaykunatapas willawachwanchu karqa, nispa.

²⁴ Chay warmim wachakuruspan wawanta Sansonwan suticharqa. Wiñaptinmi chay wawata Tayta Dios bendecirqa.

²⁵ Zora llaqtamanta Estaol llaqtaman rinapi, Dan ayllupa campamentonkunapi Sansón kachkaptinmi Tayta Diospa Espiritun paypi llamkayta qallaykurqa.