Juan 9 - Chuya Qellqa 1992

Ñawsa runata Jesús sanoyachisqanmanta

¹ Jesusmi richkaspan rikururqa nacekusqanmantapuni ñawsa runata.

² Hinaptinmi discipulonkuna tapurqaku: Yachachikuq ¿imanasqataq wak runaqa ñawsa nacerurqa? ¿Tayta-mamanpa huchanmantachu, icha kikinpa huchanmantachu? nispanku.

³ Jesusñataqmi nirqa: Manam kikinpa huchanmantachu nitaqmi tayta-mamanpa huchanmantachu, aswanqa Diospa ruwasqankuna paypi qawachikunanpaqmi.

⁴ Punchawraq kachkaptinqa kachamuwaqniypa ruwayninkunapim llamkanay, tutayaramuptinmi ichaqa manaña pipas llamkayta atinmanñachu.

⁵ Kay pachapiraq kanaykamaqa runakuna achkiqmi kasaq, nispa.

⁶ Chaynata nispanmi allpaman toqaykuspan mituta ruwarurqa, hinaspam ñawsapa ñawinta llusiykuspan

⁷ nirqa: Siloé estanqueman rispayki mayllakaramuy, nispa. (Siloeqa “kachasqa” ninanmi). Rispanmi mayllakaramurqa, hinaspam qawakustinña kutiramurqa.

⁸ Vecinonkunawan hinaspa limosna mañakuq kasqanta rikuqkunañataqmi nirqaku: ¿Kayqa tiyaykuspa limosna mañakuqchús? nispanku.

⁹ Chaymi wakiqñataq nirqaku: Arí, paypunim, nispanku. Wakiqninñataqmi nirqaku: Manam paychu, paymanmi rikchakun, nispanku. Hinaptinmi kikinñataq nirqa: Arí, ñoqam kani, nispa.

¹⁰ Chaymi tapurqaku: ¿Imaynatataq ñawikiqa qawarikururqa? nispanku.

¹¹ Payñataqmi willakurqa: Jesús sutiyuq runam mituta ruwaykuspan ñawiyman llusiykuwarqa hinaspam niwarqa: “Siloé estanqueman rispayki mayllakaramuy” nispan. Chaymi rispay mayllakamurqani, hinaspam qawarikururqani, nispa.

¹² Paykunañataqmi nirqaku: ¿Maypitaq kachkan chay runaqa? nispanku. Hinaptinmi ñawsamanta sanoyaruqñataq nirqa: Manam yachanichu, nispan.

Qawarikuruq runata tapupayasqankumanta

¹³ Chay qawarikuruq runatam fariseokunaman pusarqaku.

¹⁴ Chay ñawsa runata mituta ruwaykuspan Jesús sanoyarachisqan punchawqa, samana punchawmi karqa.

¹⁵ Chaymi fariseokuna chay runata huktawan tapurqaku imaynam qawarikurusqanmanta. Payñataqmi willakurqa: Mituta ruwaykuspam ñawiyta llusiykuwarqa, hinaptinmi mayllakuruspay qawarikururqani, nispa.

¹⁶ Chaymi wakiqnin fariseokuna nirqaku: Chay sanoyachisuqniki runaqa manam Diosmanta hamuqchu, payqa samana punchawtapas manam respetanchu, nispanku. Wakinñataqmi nirqaku: ¿Imaynataq huchasapa runaqa kayna milagrokunataqa ruwanman? nispanku. Chaynapim kikinkupura atipanakuspanku mana acuerdochu karqaku.

¹⁷ Chayraykum chay sanoyaruq ñawsata musoqmanta tapurqaku: ¿Qamqa imaninkitaq ñawiki qawarichisuqniki runamantaqa? nispanku. Hinaptinmi payñataq nirqa: Payqa profetam, nispa.

¹⁸ Judiokunañataqmi mana creerqakuchu, ñawsa kachkaspa kunanñataq qawarikurusqantaqa hinaspam tayta-mamanta qayachimuspa kaynata

¹⁹ tapurqaku: ¿Kay runapa tayta-mamanchum kankichik, paychum “nacesqanmantapuni ñawsam” nisqaykichik? ¿Imaynataq kunanqa qawakuchkanña? nispanku.

²⁰ Paykunañataqmi nirqaku: Arí, ñoqaykum tayta-maman kaniku, yachanikum ñawsa nacesqantaqa.

²¹ Ichaqa manam yachanikuchu imaynam qawarikusqantapas chaynataq pim qawarirachisqantapas, chaynaqa kikintayá tapuychik, yuyayniyuqñam, kikinmi willasunkichik, nispanku.

²² Tayta-mamanqa chaynata nirqaku judiokunata manchakuspankum. Llapa judiokunam tanteanakururqaku, sichum pipas “Jesusqa Cristom” niqtaqa sinagogamanta wischurunankupaq.

²³ Chayraykum taytanwan mamanñataq nirqaku: “Kikintayá tapuychik, payqa yuyayniyuqñam”, nispanku.

²⁴ Judiokunam musoqmanta qayachimurqaku ñawsamanta sanoyaruq runata, hinaspam nirqaku: Diostayá yupaychay, ñoqaykuqa yachanikum chay runaqa huchasapa kasqanta, nispanku.

²⁵ Payñataqmi nirqa: Huchasapa kasqantaqa manam yachanichu, ichaqa kaytam yachakuni: Ñawpaqtaqa ñawsam karqani, kunanmi ichaqa qawakuchkaniña, nispa.

²⁶ Chaymi musoqmanta tapurqaku: ¿Imanaykusurqankitaq? ¿Imaynatataq ñawikita kichaykurqa? nispanku.

²⁷ Hinaptinmi payñataq nirqa: Ñam nikichikña, ichaqa manam uyariwankichikchu, ¿imapaqtaq huktawan ninayta munankichik? ¿Icha qamkunapas discipulon kaytachu munankichik? nispa.

²⁸ Chaynata niptinmi insultaspanku nirqaku: Qanmi discipulonqa kanki, ñoqaykuqa Moisespa discipulonkunam kaniku.

²⁹ Ñoqaykuqa yachanikum Moisesta Dios rimapayasqanta. Kay runamantam ichaqa maymantam lloqsimusqantapas mana yachanikuchu, nispanku.

³⁰ Chay runañataqmi nirqa: ¡Admirakuypaqmi kayqa! Maymantam lloqsimusqanta mana yachachkaptikichikpas ñoqatam ichaqa ñawiyta kichaykuwan.

³¹ Yachasqanchikman hinapas Diosqa manam huchasapakunataqa uyarinchu, aswanqa kasukuspa munasqanta ruwaqkunallatam uyarin.

³² Kunankamaqa manam uyarikurqachu nacesqanmantapuni ñawsata pipas qawarirachisqantaqa.

³³ Sichum kay runa, Diosmanta mana hamuspanqa manachá kaykunataqa ruwanmanchu, nispa.

³⁴ Chaymi judiokunañataq nirqaku: Qamqa huchapa huntasqan nacechkaspachu, ¿ñoqaykutaraq yachachiwaykuta munachkanki? nispanku. Chaynata niruspankum sinagogamanta qarqorurqaku.

Qawakuq ñawsakunamanta

³⁵ Jesusmi yacharurqa chay runata sinagogamanta qarqorusqankuta, chaymi paywan tuparuspan tapurqa: ¿Creenkichu Diospa churinpi? nispa.

³⁶ Hinaptinmi chay runa nirqa: Señor ¿pitaq payqa, payman iñinaypaqqa? nispa.

³⁷ Chaymi Jesusñataq nirqa: Ñam rikuykunkiña, ñoqam kani, paywanmi rimachkanki, nispa.

³⁸ Hinaptinmi chay runa nirqa: Iñinim Señor, nispa. Chaynata niykuspanmi qonqorakuykuspa yupaycharqa.

³⁹ Jesusñataqmi nirqa: Ñoqam kay pachaman juzganaypaq hamurqani, chaynapi ñawsakuna qawakunankupaq, qawakuqkunañataq ñawsayanankupaq, nispa.

⁴⁰ Chaymi paywan kaq fariseokunañataq chay nisqanta uyariruspanku nirqaku: ¿Chaynaqa, ñoqaykupas ñawsachu kaniku? nispanku.

⁴¹ Hinaptinmi Jesusñataq nirqa: Ñawsa kaspaykichikqa mana huchayuqchá kawaqchik, ichaqa “qawakunikum” ninkichikmi, chayraykum huchayuqa kankichik, nispa.