Juan 8 - Chuya Qellqa 1992

Waqllikuruq warmimanta

¹ Jesusmi Olivos moqoman pasakurqa,

² paqarinnintin tutapaytañataqmi temploman kutimurqa. Chaymi llapa runakuna payman asuykuptinku tiyaykuspa yachachirqa.

³ Diospa leynin yachachiqkunawan fariseokunañataqmi, huk warmita waqllikuypi kachkaqta hapiramuspanku aparamurqaku, hinaspankum runakunapa chawpinpi sayaykachispanku,

⁴ Jesusta nirqaku: Yachachikuq, kay warmitam waqllikuypi kachkaqta tariramuniku.

⁵ Moisesmi kamachiwarqaku kayna warmikunataqa rumiwan chamqapaspa wañuchinaykupaq. ¿Qamqa imaninkitaq? nispanku.

⁶ Chaynataqa nirqaku Jesusta pantarachispa chaykunawan acusanankupaqmi. Jesusmi ichaqa kurkuykuspan dedonwan allpapi qellqarqa.

⁷ Llumpayta tapupayasqankuraykum sayariykuspan nirqa: Pipas mana huchayuq kaqyá rumiwan chamqayta qallarichun, nispa.

⁸ Chaynata niruspanmi kasqallan kurkuykuspan pampapi qellqarqa.

⁹ Paykunañataqmi Jesuspa nisqanta uyarispanku, sonqonku acusaptin, machukunamanta qallaykuspa warmankunakama chulla-chullamanta asurikurqaku, hinaptinmi Jesuswan warmillaña qeparurqaku.

¹⁰ Chaymi Jesusñataq hatarispan warmita nirqa: ¿Maytaq chay acusasuqnikikuna? ¿Manachu pipas condenasunki? nispan.

¹¹ Warmiñataqmi nirqa: Manam pipas Señor, nispan. Hinaptinmi Jesusñataq nirqa: Ñoqapas manam condenaykichu, ripukuspayá amaña huchallikuyñachu, nispa.

Jesusqa runakunapa achkiynin kasqanmanta

¹² Huktawanmi runakunata Jesús nirqa: Ñoqam kani runakunapaq achkiy, pipas qatiwaqniyqa manam tutayaypiqa purinqachu, payqa kanqa kawsay qokuq achkiyniyuqmi, nispa.

¹³ Chaymi fariseokuna nirqaku: Qamqa kikikipa allinllaykitam rimachkanki, chay nisqaykikunaqa manam cheqapchu, nispanku.

¹⁴ Jesusñataqmi nirqa: Kikiypa allinllayta rimaptiypas nisqaykunaqa cheqapmi, ñoqaqa yachanim maymantam hamusqaytapas chaynataq maymanmi risqaytapas; qamkunam ichaqa maymantam hamusqaytapas nitaq maymanmi risqaytapas mana yachankichikchu.

¹⁵ Qamkunaqa aychaman hinallam juzgankichik. Ñoqaqa manam pitapas juzganichu.

¹⁶ Juzgaspayqa cheqapman hinam juzgani, ñoqaqa manam sapallaychu juzgani aswanqa kachamuwaqniy Taytaypiwanmi.

¹⁷ Leynikichikpim qellqasqa kachkan, iskay testigokunapa nisqanmi cheqapqa, nispa.

¹⁸ Chaynaqa, kikiypa allinllayta rimasqaymantaqa ñoqam testigo kani, kachamuwaqniy Taytaypas allinniypitaqmi riman, nispa.

¹⁹ Hinaptinmi fariseokuna nirqaku: ¿Maypitaq kachkan taytaykiqa? nispanku. Chaymi Jesusñataq nirqa: Qamkunaqa manam reqsiwankichikchu, nitaqmi Taytaytapas reqsinkichikchu; ñoqata reqsiwaspaykichikqa Taytaytapas reqsiwaqchikmi, nispa.

²⁰ Jesusmi tukuy kaykunata rimarirqa templopi ofrenda churanankupa waqtanpi yachachispan; ichaqa manam pipas presocharqachu manaraq tiempon chayamusqanrayku.

Judiokunapa kamachiqninkunawan Jesuspa atipanakusqanmanta

²¹ Jesusmi huktawan nirqa: Ñoqa pasakuptiymi qamkuna maskawankichik, ichaqa huchaykichikpim wañunkichik. Ñoqapa risqaymanqa qamkunaqa manam riyta atiwaqchikchu, nispa.

²² Hinaptinmi judiokunañataq nirqaku: ¿Kikillan wañurachikuytachu piensachkan, chaychu nin: “Ñoqapa risqaymanqa manam qamkunaqa riyta atiwaqchikchu”, nispanqa? nispanku.

²³ Jesusñataqmi nirqa: Qamkunaqa kankichik kay pachallamantam, ñoqañataqmi kani hanaq pachamanta. Qamkunaqa kankichik kay pachapi kaqmi, ñoqam ichaqa mana kay pachapi kaqchu kani.

²⁴ Chaymi nirqaykichik “huchaykichikpim wañunkichik” nispay. Pim kasqayta mana creespaykichikqa huchaykichikpim wañunkichik.

²⁵ Hinaptinmi tapurqaku: Chaynaqa, ¿pitaq qamqa kanki? nispanku. Jesusñataqmi nirqa: Ñam puntamantaraq nirqaykichikña.

²⁶ Achkam qamkunamanta ninay kachkan chaynataq juzganaypas. Kachamuwaqniymi ichaqa cheqap, chaymi paymanta uyarisqayta runakunaman willani, nispa.

²⁷ Paykunaqa manam entienderqakuchu Taytanmanta nisqantaqa.

²⁸ Chaymi Jesús nirqa: Runapa Churinta chakataruspaykichikñam pim kasqayta yachankichik. Tukuy imatapas manam kikillaymantachu ruwani, Taytaypa yachachiwasqallantam ñoqaqa willaykichik.

²⁹ Kachamuwaqniyqa ñoqawanmi kachkan, Taytaqa manam sapallaytachu saqeruwan, ñoqaqa paypa munasqantam tukuy tiempo ruwani, nispa.

³⁰ Chaynata Jesús niptinmi achkallaña payman iñirqaku.

Cheqap librasqakunamanta

³¹ Jesusmi iñiqnin judiokunata nirqa: Sichum qamkuna palabraypi takyankichik hinaspaqa cheqap discipuloykunam kankichik,

³² hinaspam cheqap kaqta reqsinkichik, chay cheqapmi libreta ruwasunkichik, nispa.

³³ Judiokunañataqmi nirqaku: Ñoqaykuqa Abrahampa mirayninmi kaniku, manam haykapipas nitaq pipapas esclavonchu karqaniku. ¿Imaynanpitaq qamqa ninki: “Chay cheqapmi libreta ruwasunkichik”, nispaqa?

³⁴ Jesusñataqmi nirqa: Cheqaptapunim nikichik, huchakuna ruwaqqa huchapa esclavonmi.

³⁵ Esclavoqa manam wiñaypaqchu wasipiqa qepan, churim ichaqa wiñaypaq qepan.

³⁶ Chaynaqa, sichum Diospa Churin libreta ruwasuptikichikqa cheqaptapunim libre kankichik.

³⁷ Arí, Abrahampa mirayninkuna kasqaykichiktaqa yachanim, ichaqa palabraykunata mana chaskisqaykichikraykum wañurachiwayta munachkankichik.

³⁸ Ñoqaqa rimani Taytaypa kasqanpi rikusqaykunatam, qamkunapas ruwankichik taytaykichikpa nisusqaykichiktam, nispa.

³⁹ Chaymi paykunañataq nirqaku: Taytaykuqa Abrahamllam, nispanku. Jesusñataqmi nirqa: Abrahampa miraynin kaspaqa paypa ruwasqankunatachá ruwawaqchik.

⁴⁰ Qamkunam ichaqa, Diosmanta cheqap kaqta uyarispay willasqayrayku wañurachiwayta munachkankichik. Abrahamqa manam chaynatachu ruwarqa.

⁴¹ Qamkunaqa taytaykichikpa ruwasqallantam ruwankichik, nispa. Hinaptinmi paykunañataq nirqaku: Ñoqaykuqa manam churyapakuychu kaniku, ñoqaykupa taytaykuqa Diosllam, nispanku.

⁴² Jesusñataqmi nirqa: Sichum Dios kanman taytaykichik hinaptinqa kuyawankichikmanchá. Ñoqaqa Diosmanta hamuspaymi kaypi kachkani, manam kikillaymantachu hamurqani aswanqa Diosmi kachamuwarqa.

⁴³ ¿Imanasqataq rimasqaykunataqa mana entiendenkichikchu? Palabraykunata mana uyariy munasqaykichikrayku.

⁴⁴ Qamkunapa taytaykichikqa diablom, chaymi paypa munasqallanta ruwankichik. Diabloqa qallariyninmantapuni runata wañuyman apaqmi karqa, paypi mana cheqap kasqanraykum cheqap kaqpipas mana takyanchu. Llullata rimaspanqa kikillanmanta kaqtam riman, chayna kasqanraykum haykam llullakuqkunapa taytan.

⁴⁵ Ñoqam ichaqa cheqapta nikichik aswanqa manam creewankichikchu.

⁴⁶ ¿Mayqannikichiktaq huchayuq kasqayta pruebawankichikman? Cheqapta nichkaptiyqa ¿imanasqamá manaqa creewankichikchu?

⁴⁷ Diospaq kaqkunaqa Diospa nisqankunatam uyarin, qamkunam ichaqa mana Diospa kasqaykichikrayku mana uyarinkichikchu, nispa.

Abrahammantapas ñawpaqmantaraq Jesucristoqa kasqanmanta

⁴⁸ Judiokunam Jesusta nirqaku: Imam kaqmantam nikiku “qamqa Samaria law” runa kasqaykimanta hinaspa demonioyuq kasqaykimanta, nispayku.

⁴⁹ Jesusñataqmi nirqa: Manam demonioyqa kanchu, ñoqaqa Taytaytam hatunchani, qamkunam ichaqa penqayman churawankichik.

⁵⁰ Ñoqaqa manam hatunchasqa kaytachu maskani, kanmi huk hatunchasqa kayta maskaqqa, paymi juzgaqqa.

⁵¹ Cheqaptapunim nikichik, pipas palabraykunata waqaychaqkunaqa manam haykapipas wañunqachu, nispa.

⁵² Judiokunañataqmi nirqaku: Kunanmi ichaqa yachaniku demonioyuq kasqaykita. Abrahampas chaynataq profetakunapas wañukunkuñam, qamñataqmi ninki: “Pipas palabraykunata waqaychaqkunaqa manam haykapipas wañunqachu” nispayki.

⁵³ ¿Icha qamqa ñawpaq taytayku Abrahampa mayorninraqchu kanki? Payqa ñam wañukunña, wañukunñataqmi profetakunapas. ¿Pim kasqaykipaqtaq qamqa hapikunki? nispanku.

⁵⁴ Jesusñataqmi nirqa: Kikillaypa alabakusqayqa manam valenchu. Alabawaqniyqa Taytaymi, paytam qamkuna ninkichik “Diosniykum” nispaykichik.

⁵⁵ Paytaqa manam reqsinkichikchu. Ñoqam ichaqa reqsini. “Manam reqsinichu” nispayqa qamkuna hina llullakuqchá kayman. Ñoqaqa reqsinim, chayraykum paypa palabrankunata kasukuni.

⁵⁶ Ñawpaq taytaykichik Abrahamqa hamunay punchawta qawaykuyta munaspanmi kusikurqa, rikuykuspanñataqmi aswanraq kusikurqa.

⁵⁷ Judiokunañataqmi nirqaku: Manaraqtaq pichqa chunka watayuqpasraqchu kanki, hinaspaykiqa ¿imaynataq Abrahamtaqa rikuwaq karqa? nispanku.

⁵⁸ Hinaptinmi Jesusñataq nirqa: Cheqaptapunim nikichik, manaraqpas Abraham kachkaptinqa ñoqaqa ñam karqaniña, nispa.

⁵⁹ Chaynata niptinmi rumiwan choqaparuyta munarqaku, Jesusñataqmi pakakuruspa templomanta lloqsikaramurqa.