Juan 5 - Chuya Qellqa 1992

Huk suchuta Betesdapi sanoyachisqanmanta

¹ Chaykunapa qepantam, judiokunapa fiestan karqa, chaymi Jerusalenman Jesús rirqa.

² Jerusalenpim, Oveja sutiyuq punkupa hichpanpi, pichqa punkuyuq estanque kachkan, hebreo rimaypi Betesda sutiyuq.

³ Chaypim rikchaqmana onqoyniyuqkunawan, ñawsakuna, wistukuna hinaspa suchukuna karqaku, [yakupa kuyuparikuyninta suyaspanku.

⁴ Huk angelmi qonqaymanta-qonqaymanta estanqueman uraykamuspan yakuta kuyurichiq, chaymi yaku kuyuriptin pipas puntata yaykuqqa ima onqoymantapas sanoyaruq]

⁵ Chaypim huk onqoq runa kachkarqa, payqa kimsa chunka pusaqniyuq watañam onqorqa.

⁶ Chaymi Jesusñataq qawarispan, unay watakunaña onqosqanta yachaspan, tapuykurqa: ¿Munankichu sanoyayta? nispan.

⁷ Chay suchuñataqmi nirqa: Señor, manam piniypas kanchu yaku kuyuriptin apaykuwananpaq, chaymi yaykuyta munaptiypas hukkuna puntata yaykurunku, nispa.

⁸ Chaymi Jesusñataq nirqa: Hatariy, chakanaykita hoqarispa puriy, nispa.

⁹ Chaynata niykuptinmi chay runa sanoyarurqa, hinaspanmi chakananta hoqarispan puriyta qallaykurqa. Chay punchawqa karqa samana punchawmi.

¹⁰ Chaymi llapa judiokuna chay sanoyaruq runata nirqaku: Kunanqa samana punchawmi, chakanaykita apaspa puriynikiqa leyman hinaqa manam allinchu, nispanku.

¹¹ Hinaptinmi payñataq nirqa: Sanoyarachiqniymi niwarqa: Chakanaykita hoqarispa puriy, nispan.

¹² Chaymi paykuna nirqaku: ¿Pitaq nisurqanki: “Chakanaykita hoqarispa puriy”, nispa?

¹³ Chay sanoyaruqñataqmi mana yacharqachu pim sanoyachisqantapas, Jesusqa achkallaña runapi chinkarusqanrayku.

¹⁴ Jesusmi tumpa unaymanta chay runawan templopi tuparurqa, hinaspam nirqa: Sanoyaruchkaspaykiqa amañam huchallikunkiñachu, yanqañataq imapas aswanraq hamusunkiman, nispa.

¹⁵ Hinaptinmi chay runaqa pasaspan llapa judiokunaman willaykamurqa, sanoyarachiqninqa Jesús kasqanta.

¹⁶ Chaymi llapa judiokuna Jesusta qatikachaspanku wañurachiyta munarqaku, samana punchawpi chaykunata ruwasqanmanta.

¹⁷ Jesusmi ichaqa nirqa: Taytayqa kunankamam llamkachkan, ñoqapas llamkachkanitaqmi, nispa.

¹⁸ Chaywanmi judiokunaqa aswanraq wañurachiypi rirqaku, samana punchawta mana kasukuchkaspapas, Diostapas “Taytaymi” nispa Diosman igualakusqanrayku.

Diospa Churinqa munayniyuq kasqanmanta

¹⁹ Jesusmi nirqa: Cheqaptapunim nikichik, Churiqa kikillanmantaqa manam ima ruwaytapas atinmanchu, aswanqa Taytapa ruwasqankuna rikusqallantam. Taytapa tukuy ima ruwasqantam Churipas ruwan.

²⁰ Taytaqa Churitam kuyan, hinaspam tukuy ima ruwasqanta qawachin; kaykunamantapas aswan hatun kaqkunataraqmi qawachinqa, chaynapi qamkuna admirakunaykichikpaq.

²¹ Imaynam wañuqkunata Dios Tayta kawsarichispa kawsayta qon, chaynam Churipas pim munasqanman kawsayta qon.

²² Taytaqa manam pitapas juzganchu, aswanqa Churinmanmi juzgananpaq tukuy atiyta qoykurqa,

²³ chaynapi Taytata yupaychasqankuta hina Churitapas yupaychanankupaq. Churita mana yupaychaqqa manam kachamuqnin Taytatapas yupaychanchu.

²⁴ Cheqaptapunim nikichik, pipas palabraykunata uyarispa kachamuwaqniyta creeqqa wiñay kawsayniyuqmi, payqa manam condenasqañachu kanqa, aswanqa wañuymantam kawsaymanña pasarun.

²⁵ Cheqaptapunim nikichik, hamuchkanmi punchaw, ñam chayaramunña, wañuqkunam Diospa Churinpa qayakuyninta uyarinqaku, hinaspam uyariqninkunaqa kawsarimunqaku.

²⁶ Imaynam Dios Taytapas kikillanmanta kawsayniyuq, chaynam Churimanpas kikillanmanta kawsayniyuq kayta qorqa.

²⁷ Qorqataqmi juzgananpaq atiytapas, qorqaqa runapa Churin kasqanraykum.

²⁸ Amayá kaywanqa admirakuychikchu, chayamunqam punchaw panteonpi wañusqakuna paypa qayakuyninta uyarinankupaq.

²⁹ Hinaspa allin ruwaqkuna wiñay kawsakuymanña kawsarimunqaku, mana allin ruwaqkunañataq condenasqa kanankupaq.

Jesusqa munayniyuq kasqanmanta

³⁰ Manam imatapas kikillaymantaqa ruwaymanchu. Ñoqaqa Taytapa kamachiwasqanman hinam juzgani, juzganiqa mana pimanpas sayapakuspaymi, ñoqaqa manam kikiypa munasqaytachu ruwani, aswanqa kachamuwaqniy Taytaypa munasqantam.

³¹ Sichum kikillaymanta willakuptiyqa manachá willakuyniypas cheqapchu kanman.

³² Ñoqamantaqa hukmi willakun, yachanim paypa willakuyninqa cheqap kasqanta.

³³ Qamkunam Juanta tapuchimurqankichik, chaymi payqa cheqap kaqmanta willakurqa.

³⁴ Chaywanpas ñoqaqa manam runakuna ñoqapa allinniypi rimanantaraqchu munani, kaykunataqa nikichik salvacionta qamkuna haypanaykichikpaqmi.

³⁵ Juanqa achkiq mechero hinam karqa, chaymi chay achkiywan pisi tiempollapas kusikuyta munarqankichik.

³⁶ Ichaqa Juanpa willakusqanmantapas aswan valorniyuq testigoyqa, ruwanaypaq Taytapa kamachimuwasqan kaqkuna ruwasqaymi, chaykunam Taytapa kachamuwasqanmantaqa willakunku.

³⁷ Chaynataqmi kachamuwaqniy Dios Taytapas ñoqamanta willakun. Qamkunaqa manam haykapipas paytaqa uyarirqankichikchu, nitaqmi rikchaynintapas rikurqankichikchu.

³⁸ Manataqmi palabrantapas qamkunapiqa takyachinkichikchu, pim kamachimusqanpi mana creesqaykichikrayku.

³⁹ Qellqatayá allinta qatipaychik chaypim wiñay kawsayta tarinkichik, paytaqmi ñoqamanta willakun

⁴⁰ Chaywanpas wiñay kawsayniyuq kanaykichikpaqqa manam ñoqaman hamuyta munankichikchu.

⁴¹ Runakunapa hatunchasqan kaytaqa manam munanichu.

⁴² Qamkunataqa reqsikichikmi, chaymi yachani Diosta mana kuyasqaykichikta.

⁴³ Ñoqaqa Taytaypa sutinpim hamurqani, qamkunam ichaqa mana chaskiwarqankichikchu, sichum pipas kikinpa sutinpi hamuptinmi ichaqa chaskiwaqchik.

⁴⁴ Qamkunaqa kikikichikpurallam hatunchanakunkichik, Diospa hatunchasqan kaytam ichaqa mana munankichikchu, chaynaqa, ¿imaynataq ñoqapiqa creewaqchik?

⁴⁵ Qamkunaqa amayá piensaychikchu Taytapa qayllanpi acusanaytaqa, aswanqa hapipakusqaykichik Moisesmi acusasunkichikqa.

⁴⁶ Sichum Moisespa nisqankunata creespaykichikqa ñoqatapas creewankichikmanmi, Moisesqa ñoqamantam qellqarqa.

⁴⁷ Sichum paypa qellqasqanpi mana creespaykichikqa ¿imaynataq ñoqapa nisqaykunataqa creewaqchik? nispa.