Juan 4 - Chuya Qellqa 1992

Samaria llaqtayuq warmiwan Jesuspa rimasqanmanta

¹ Fariseokunam yacharurqaku Jesusqa Juanmantapas aswan achka discipulokunata hatarichisqanta hinaspa bautizasqanta. Chaytam Jesús yacharurqa.

² (Cheqaptaqa manam Jesuschu bautizarqaqa aswanqa discipulonkunam)

³ Chaymi Judea lawmanta lloqsiruspan Galileaman pasakurqa.

⁴ Hinaspanmi Samaria lawninta rispan,

⁵ Samaria law Sicar llaqtaman chayarurqa, chayqa kachkan churin Joseyman Jacobpa qosqan chakrapa waqtanpim.

⁶ Chaypim Jacobpa pozon karqa. Chaymi Jesusqa hamusqanpi pisiparamuspan chay pozopa patanpi tiyaykurqa. Yaqa chawpi punchawñam karqa.

⁷ Tiyachkaptinmi Samaria llaqtamanta huk warmi yaku hurqoq hamururqa, chaymi Jesusñataq nirqa: Yakullaykita qoykuway, nispan.

⁸ Discipulonkunañataqmi llaqtata rirqaku mikuy rantiq.

⁹ Samaria llaqtayuq warmiñataqmi nirqa: ¿Judío kachkaspaykichu yakuta tomanaykipaq Samaria llaqtayuq warmitaraq mañakuwanki? nispan. (Chaynataqa nirqa judiokunawan samaritanokuna mana allinpi apanakusqankuraykum)

¹⁰ Chaymi payta Jesús nirqa: Sichum yachawaq Diospa kuyakuyninta chaynataq yaku mañakusuqniki pim kasqanta, hinaspaqa paytachá mañakuwaq, hinaptinqa kawsachikuq yakutam qoykusunkiman, nispa.

¹¹ Hinaptinmi chay warmiñataq nirqa: Señor, manataq yaku hurqonaykipaqqa imaykipas kanchu, kay pozoqa ukusum kachkan. ¿Maymantataq chay kawsachikuq yakutaqa qowankiman?

¹² Ñawpaq taytayku Jacobmi kay pozotaqa saqewarqaku. Kay pozomantam kikinpas, churinkunapas chaynataq animalninkunapas tomarqaku. ¿Icha paymanta aswan maschu kanki? nispa.

¹³ Chaymi Jesusñataq contestarqa: Pipas kay yaku tomaqqa musoqmantam yakunayachikunqa.

¹⁴ Ñoqapa yaku qosqay tomaqmi ichaqa manaña haykapipas yakunayachikunqachu. Chay yaku qosqayqa runapim pukyu hina rikurirunqa, chay pukyum toqyamuspan wiñay kawsayta qonqa, nispa.

¹⁵ Chay warmiñataqmi nirqa: Señor, chay yakutayá qoykuway amaña yakunayawananpaq, chaynapi amaña yaku hurqoqpas hamunaypaq, nispa.

¹⁶ Hinaptinmi Jesusñataq nirqa: Rispayki qosaykita qayamuspa kuska hamuychik, nispa.

¹⁷ Chaymi warmiñataq nirqa: Manam qosayqa kanchu, nispa. Chaymi Jesusñataq nirqa: Arí, “manam qosayqa kanchu” nispaykiqa allintam nirunki.

¹⁸ Pichqa qosayuqñam karqanki, kunan kaqpas manam qosaykichu, chaytaqa cheqaptam nirunki, nispa.

¹⁹ Chaynata niptinmi chay warmiñataq nirqa: Señor, qamqa profetachusmi kasqanki.

²⁰ Ñawpaq taytaykum Diosta kay moqopi yupaycharqaku, llapa judiokunañataqmi ninkichik Jerusalenpim yupaychanaqa, nispaykichik, nispa.

²¹ Jesusñataqmi nirqa: Warmi, cheqaptam niki, hamuchkanmi punchaw, kay moqopipas nitaq Jerusalenpipas Diostaqa manaña yupaychanankupaq.

²² Qamkunaqa manam yachankichikchu pitam yupaychasqaykichiktapas, ñoqaykum ichaqa pitam yupaychasqaykuta yachaniku, salvacionqa judiokunamantam hamun.

²³ Ichaqa horam hamuchkanña, kunanmi ichaqa chayaramunña, cheqap yupaychaqkunaqa Taytatam Espiritupa yanapasqan hinaspa cheqappi yupaychanqaku. Taytaqa chayna yupaychaqninkunatam maskachkan yupaychanankupaq.

²⁴ Diosqa Espiritum, chaymi yupaychaqninkunapas Espiritupa yanapasqan yupaychananku, Dios Taytaqa chayna cheqap yupaychanatam munan.

²⁵ Chaymi warmiñataq nirqa: Yachanim Cristo nisqanku Mesías hamunanta, pay hamuspanmi lliwta willawanqaku, nispa.

²⁶ Hinaptinmi Jesusñataq nirqa: Kay rimapayaqnikim Mesiasqa kachkani, nispan.

²⁷ Chaynata rimachkaptinkum discipulonkuna chayaramurqaku, hinaspam warmiwan rimaqta qawaykuspanku admirakurqaku, ichaqa manam mayqanninkupas nirqakutaqchu: “¿Imatataq tapuchkanki?” otaq “¿imatataq kay warmiwan rimachkanki?” nispankuqa.

²⁸ Chay warmiñataqmi puyñunta saqeruspan llaqtaman kallpaylla kutirirqa, hinaspam runakunaman kaynata willarqa:

²⁹ Rispa qawamuychik, huk runam tukuy ima ruwasqayta niykuwan, ichapas payqa Cristo kayman, nispa.

³⁰ Chaymi llaqtamanta runakuna Jesuspa kasqanman rirqaku.

³¹ Chaykamam discipulonkunañataq Jesusta ruegarqaku: Yachachikuq mikuykuy, nispanku.

³² Jesusñataqmi nirqa: Ñoqapa mikunayqa kachkanñam, qamkunapa mana yachasqaykichik, nispan.

³³ Discipulonkunañataqmi tapunakurqaku: ¿Pitaq mikuyta aparamunman karqa? nispanku.

³⁴ Jesusñataqmi nirqa: Ñoqapa mikunayqa pim kachamuwaqniypa munasqanta ruwaymi hinaspa llamkayninta tukuymi.

³⁵ Qamkunam ninkichik: “Cosechapaqqa tawa killaraqmi faltachkan”, nispaykichik, ichaqa nikichikmi, tarpuykunata qawariychik, cosechanapaq hina poqosqañam kachkan.

³⁶ Cosechapi llamkapakuqqa pagontam chaskin, cosecha huñusqanñataqmi wiñay kawsaypaq, chaynapi tarpuqpas hinaspa cosechaqpas kuskanku kusikunankupaq.

³⁷ Huk rimaymi kaynata nin: “Tarpuqqa hukmi, cosechaqpas huktaqmi”, nispa. Cheqapmi chayqa.

³⁸ Ñoqam mana tarpusqaykichikman cosechaq kacharqaykichik; hukkunapa tarpusqanmanmi qamkuna yaykurunkichik, nispa.

³⁹ Samaria llaqtayuqkunamantam achkallaña runakuna Jesusman iñikururqaku, “tukuy ima ruwasqaytam niykuwan”, nispa chay warmipa nisqanwan.

⁴⁰ Chayraykum Samaria llaqtayuq runakunaqa Jesuspa kasqanman hamuruspanku paykunawan qepananpaq ruegarqaku, chaymi Jesusqa paykunawan iskay punchaw qeparqa.

⁴¹ Hinaptinmi Jesuspa rimasqanta uyariykuspanku aswan achkaraq iñikurqaku.

⁴² Hinaspankum chay warmita nirqaku: Manam qampa nisqallaykiwanñachu creenikuqa, aswanqa kikiykupunim uyariykuniku, hinaspam payqa cheqaptapuni kay pachapi runakuna salvaq kasqanta yachaykuniku, nispanku.

Reyta serviqpa churinta Jesús sanoyachisqanmanta

⁴³ Jesusmi Samaria lawpi iskay punchaw karuspan Galilea lawman rirqa.

⁴⁴ Kikin Jesusmi nirqa: Profetaqa manam llaqtanpiqa allin chaskisqachu, nispan.

⁴⁵ Galilea lawman chayaruptinmi chaypi runakuna kusikuywan chaskirqaku, Pascua fiestaman Jerusalenta rispanku Jesuspa tukuy imakunapas ruwasqanta rikusqankurayku.

⁴⁶ Jesusmi Galilea lawpi Caná llaqtaman huktawan kutirqa, chaypim yakuta vinoman tikrarurqa. Capernaúm llaqtapim karqa reyta serviq runa, paypa churinmi onqochkarqa.

⁴⁷ Chaymi Judea lawmanta Galileaman Jesuspa chayaramusqanta yacharuspan, wañuypa patanpiña tarikuq churinta sanoyachinanpaq ruegakuq rirqa.

⁴⁸ Jesusñataqmi nirqa: Milagrokunatawan señalkunata mana rikuspaykichikqa, qamkunaqa manam creenkichikchu, nispa.

⁴⁹ Hinaptinmi reypa serviqninñataq nirqa: Señor, ama hina kaspayá manaraq churillay wañuruchkaptin hakuchik, nispa.

⁵⁰ Chaymi Jesusñataq nirqa: Ripukuyña, churikiqa sanoyarunñam, nispa. Hinaptinmi Jesuspa nisqanta creeruspan chay runa ripukurqa.

⁵¹ Wasinman kutichkaptinmi, serviqninkuna taripaykamuspan nirqaku: Churikiqa sanoyarunñam, nispanku.

⁵² Chaymi payñataq tapurqa: ¿Imay horatataq sanoyarurqa? nispa. Paykunañataqmi nirqaku: Qayna punchaw yaqa doce waqtaytam calenturan chinkarurqa, nispanku.

⁵³ Hinaptinmi chay warmapa taytan yuyarirurqa, chay horatapuni Jesuspa: “Churikiqa sanoyarunñam”, nisqanta. Chaymi llapallan ayllunkunapiwan Jesusman iñikururqaku.

⁵⁴ Kay iskay kaq milagrotam Jesús ruwarqa Judeamanta Galileaman kutiruspan.