Juan 20 - Chuya Qellqa 1992

Jesuspa kawsarimusqanmanta

¹ Domingo punchawtam tuta-tuta manaraq runa reqsiy horata sepulturaman rirqa Magdala llaqtayuq María, paymi rikururqa sepultura tapasqanku rumiqa suchurachisqaña kasqanta.

² Chaymi kallparqa Simón Pedropa kasqanman hinaspa Jesuspa kuyasqan discipulonpa kasqanman, paykunatam nirqa: Señortam sepulturanmanta aparusqaku, manam yachanikuchu mayman churasqankutapas, nispa.

³ Pedrowan huknin discipulom sepultura qawaq rirqaku.

⁴ Iskayninkum rirqaku kallpaylla, hukninmi Pedromantapas apurawman kallpaspan puntata sepulturaman chayarurqa.

⁵ Kurkuykuspa qawaykuptinmi sabanaskunallaña kachkasqa, ichaqa manam yaykurqachu.

⁶ Simón Pedroñataqmi qepataña chayaramuspan sepulturaman yaykururqa, paypas rikuykurqam sabanaskuna churarayaqta.

⁷ Rikurqataqmi Jesuspa umanman watasqanku telatapas, chaymi sabanaskunapa waklawninpi patarasqa kachkasqa.

⁸ Sepulturaman punta chayaq discipulopas yaykururqam, chaymi tukuy chaykunata qawaykuspan cheqapaq kasqanpaq hapirqa.

⁹ Paykunaqa manaraqmi entienderqakuchu Jesuspa kawsarimunanmanta Qellqapa nisqantaqa.

¹⁰ Chaymantam discipulokunaqa wasinkuman kutikurqaku.

Magdala llaqtayuq Mariaman Jesuspa rikuriykusqanmanta

¹¹ Mariañataqmi waqastin qeparurqa sepulturapa waqtanpi. Waqaspanmi kurkuykuspa qawaykurqa sepulturapa ukunta.

¹² Chaynapim rikurqaku yuraq pachayuq iskay angelkunata. Paykunam tiyachkasqaku Jesuspa cuerpon churasqankupi, hukninmi kachkasqa sawnan lawpi hukninñataqmi haytan lawpi.

¹³ Mariatam tapurqaku: Warmi ¿imanasqataq waqachkanki? nispanku. Payñataqmi nirqa: Señorniytam aparusqaku chaymi mana yachanichu mayman churasqankutapas, nispa.

¹⁴ Chaynata nispanmi muyuriykuspan rikururqa Jesusta chaypi sayachkaqta. Mariaqa manam yacharqachu Jesús kasqanta.

¹⁵ Jesusmi tapurqa: Warmi ¿imanasqataq waqachkanki? ¿Pitataq maskachkanki? nispan. Mariañataqmi piensarqa huerta nanachikuq kasqanta, chaymi nirqa: Señor, qam aparuspaykiqa willaykuwayá maypim churaramusqaykitapas chaynapi rispay apakunaypaq, nispa.

¹⁶ Jesusñataqmi nirqa: ¡María! nispa. Payñataqmi muyuriykuspan hebreo rimaypi nirqa: ¡Raboni! nispa. Chayqa “yachachikuq” ninanmi.

¹⁷ Jesusmi nirqa: Amaraq hapiwaychu, manaraqmi Taytaymanqa riniraqchu. Willamuyá wawqeykunaman, richkanim Taytaypata, qamkunapapas Taytaykichikpata, ñoqapa Diosniyman, qamkunapapas Diosnikichikman.

¹⁸ Chaymi Magdala llaqtayuq Mariañataq, Señorta rikusqanmanta discipulonkunaman willamurqa, willamurqataqmi kikin Señorpa imakunam kunasqantapas.

Discipulonkunaman Jesuspa rikuriykusqanmanta

¹⁹ Hina chay punchawllam, domingo tutaykuyta, discipulonkuna huñunakuruspanku punkuta wichqakururqaku, chaynataqa ruwarqaku judiokunata manchakusqankuraykum. Jesusmi yaykuruspa discipulonkunapa chawpinpi sayaykuspa nirqa: ¡Hawkayay qamkunawan kachun! nispa.

²⁰ Chaynata niykuspanmi makinkunatawan waqtanta qawachikurqa, paykunañataqmi Señorta qawaykuspanku kusikurqaku.

²¹ Huktawanmi Jesús nirqa: ¡Hawkayay qamkunawan kachun! Imaynam Taytay kachamuwarqa, chaynam qamkunatapas kachaykichik, nispa.

²² Chaynata niykuspanmi paykunaman pukuykuspan nirqa: Chuya Espirituta chaskiychik, nispan.

²³ Huchakuna pampachasqaykichikqa pampachasqam kanqa, mana pampachasqaykichikqa manataqmi pampachasqachu kanqa, nispa.

Tomasman Jesuspa rikuriykusqanmanta

²⁴ Mellizowan sutichasqa Tomasmi chunka iskayniyuqmanta huknin karqa. Jesús paykunaman rikuriykuptinqa payqa manam chaypichu karqa.

²⁵ Wakin discipulokunam willarqaku: Señortam rikuramuniku, nispanku. Tomasñataqmi nirqa: Sichum mana rikusaqchu makinpi clavospa yaykusqanta chaynataq clavospa yaykusqanman dedoyta mana hinasaqchu chaynataq makiywan mana waqtan tuksisqa kasqanta llapchasaqchu, hinaspayqa manam creesaqchu, nispa.

²⁶ Pusaq punchawmantam discipulonkuna musoqmanta huk wasipi huñunakurqaku, Tomaspas paykunawanmi kachkarqa. Punku wichqarayachkaptinmi Jesusqa paykunapa chawpinkupi rikuriykuspan nirqa: ¡Hawkayay qamkunawan kachun! nispa.

²⁷ Hinaspam Tomasta nirqa: Dedoykita kayman hinay hinaspa makiyta qaway chaynataq waqtaymanpas makikita hinay. Amayá mana iñiyniyuqqa kaychu aswanqa iñiyniyuqyá kay, nispa.

²⁸ Tomasñataqmi nirqa: ¡Señorlláy, Diosnilláy! nispa.

²⁹ Jesusmi nirqa: Tomás ¿rikuykuwaspaykiñachu creerunki? ¡Mayna kusisqam kanqa mana rikuwachkaspan creeqkunaqa!

Kay libroqa imapaqmi qellqasqa kasqanmanta

³⁰ Jesusqa achkaq milagrokunataraqmi ruwarqa discipulonkunapa qawasqanta. Kay libropiqa chaykunaqa manam qellqasqachu kachkan.

³¹ Kaykunaqa qellqasqa karqa Jesusqa Diospa Churin Cristo kasqanta creenaykichikpaqmi, creespaykichikñataq payrayku wiñay kawsayniyuq kanaykichikpaq, nispa.