Juan 10 - Chuya Qellqa 1992

Allin michiqmanta

¹ Cheqaptapunim nikichik: Pipas ovejapa corralninman mana punkunta yaykuspa huklawnin yaykuqqa suwam hinaspa salteaqmi.

² Punkun yaykuqmi ichaqa ovejakunapa michiqnin.

³ Punku nanachikuqpas yaykunanpaqmi punkuta kichaykun, ovejakunapas qayakuynintam uyarinku; payqa ovejakunatapas sutinmantakama qayaspanmi corralninmanta hawaman hurqon.

⁴ Ovejakunata kanchanmanta hurqoruspanmi puntata rin, ovejakunañataqmi qayasqanta uyarispa qatinku.

⁵ Mana reqsisqantaqa manam qatinkuchu, aswanqa qayakuyninta mana reqsisqanraykum ayqekunku, nispa.

⁶ Chay rikchanachiyta niptinpas, manam paykunaqa imamantam nisqantapas entienderqakuchu.

Allin michiqqa Jesuslla kasqanmanta

⁷ Jesusmi huktawan nirqa: Cheqaptapunim nikichik, ñoqam ovejakunapa yaykunan punku kani.

⁸ Ñoqamanta ñawpaqta hamuqkunaqa suwakunawan salteaqkunam karqaku, chaymi ovejakunaqa mana kasurqachu.

⁹ Ñoqam punku kani, pipas ñoqantakama yaykuqqa salvasqam kanqa. Yaykunqam, hinaspam lloqsinqa, pastokunatapas tarinqataqmi.

¹⁰ Suwaqa hamun suwakuqmi, wañuchiqmi hinaspa purmachiqmi. Ñoqam ichaqa hamurqani kawsanaykichikpaq hinaspa kawsaypa huntasqan kanaykichikpaq.

¹¹ Ñoqaqa allin michiqmi kani. Allin michiqqa ovejankunaraykum vidanta qon.

¹² Pagollapaq michiqmi ichaqa, atoq hamuptinpas ovejakunata saqeruspan ayqekun; payqa mana michiqninku kasqanrayku, nitaqmi ovejakunapas paypachu. Chaymi ovejakunatapas atoq hapiruspan cheqerachin.

¹³ Chay runaqa pagollapaq michisqanraykum ayqekun, ovejakunamantaqa manam imapas qokunchu.

^14-15 Ñoqaqa allin michiqmi kani. Imaynam Taytay ñoqata reqsiwan chaynam ñoqapas Taytayta reqsini, chaynam ñoqapas ovejaykunata reqsini, paykunapas reqsiwantaqmi. Ñoqaqa ovejakunaraykum vidayta qoni.

¹⁶ Kachkantaqmi kay corralpi kaqkunamanta sapaq ovejaykunapas. Paykunatapas pusamuptiymi qayakuyniyta uyarinqaku, chaynapim huk kanchallaña kanqaku, michiqninkupas hukllañam kanqa.

¹⁷ Vidayta qospay kaqmanta kawsarimusqayraykum Taytay kuyawan.

¹⁸ Manam pipas vidaytaqa qechuwanmanchu, kikiymantam qosaq. Makillaypim kachkan qonaypaqpas chaynataq kawsarimunaypaqpas. Chaynatam Taytay kamachiwarqa.

¹⁹ Chaykuna rimasqanta uyarispankum llapa judiokuna rakinakuyman chayarurqaku.

²⁰ Achkaqmi nirqaku: Imapaqmi uyarinkichik, payqa demonioyuq locom, nispanku.

²¹ Wakiqninñataqmi nirqaku: Demoniopa huntasqanqa manam kaynataqa rimanmanchu. Demonioqa manataqmi ñawsataqa qawarichinmanchu, nispanku.

Jesusta judiokuna wischupakusqankumanta

²² Jerusalén llaqtapim para tiempopi templo Dedicación fiesta karqa.

²³ Jesusmi Salomonpa portalninpi purichkarqa.

²⁴ Chaymi judiokuna muyuruspanku nirqaku: ¿Haykapikamataq iskayrayachiwankiku? Qam Cristo kaspaykiqa cheqaptayá willawayku, nispanku.

²⁵ Jesusñataqmi nirqa: Ñam nirqaykichikña ichaqa manam creerqankichikchu, Taytaypa atiy qowasqanwanmi tukuy imata ruwani, chaykunam ñoqamanta willakun.

²⁶ Qamkunaqa manam ovejaykunachu kankichik chaymi mana creenkichikchu.

²⁷ Ovejaykunaqa vozniytam uyarin, ñoqapas paykunataqa reqsinim, chaymi paykunaqa qatiwanku.

²⁸ Ñoqam paykunaman wiñay kawsayta qoni chaymi paykunaqa mana haykapipas chinkanqakuchu, manataqmi pipas makiymantaqa qechuwanqachu.

²⁹ Tukuy ima qoqniy Taytayqa llapanmantapas atiyniyuqmi, chaymi mana pipas atinmanchu Taytaypa makinmanta qechuytaqa.

³⁰ Taytaywanqa hukllam kaniku.

³¹ Judiokunañataqmi huktawan hatarirqaku rumiwan chamqaparunankupaq.

³² Jesusñataqmi nirqa: Achkatam ruwarqani allin ruwaykunata Taytaypa atiy qowasqanwan, chaynaqa ¿mayqanninmantataq rumiwan chamqawayta munankichik? nispa.

³³ Judiokunañataqmi nirqaku: Chamqapaytaqa munaykiku manam allin ruwasqaykimantachu, aswanqa rimaspayki Diosta piñachisqaykimantam chaynataq runa kachkaspayki Dios tukusqaykimantam, nispanku.

³⁴ Jesusñataqmi nirqa: Qamkunapa leynikichikpim qellqasqa kachkan: “Ñoqam nirqaykichik qamkunaqa dioskuna kasqaykichikta nispa” niq.

³⁵ Manam negachwanchu Qellqapa nisqantaqa. Diosqa suticharqa dioskunawanqa willakusqankuna chaskiqkunatam.

³⁶ Taytam sapaqchawaspan ñoqata kay pachaman kachamuwarqa, chaynaqa ¿imaynataq ninkichik qamkunaqa: “Diostam kamichkan” nispaykichikqa, “Diospa Churinmi kani” nisqayraykuqa?

³⁷ Taytapa ruwanankunata mana ruwaptiyqa amayá creewaychikchu,

³⁸ sichum ruwaptiyqa manaña ñoqapi creespaykichikpas ruwasqaykunapiyá creeychik, chaynapim Taytawanqa huklla kasqayta yachankichik.

³⁹ Huktawanmi Jesusta presochayta munarqaku ichaqa paykunamantam lluptirurqa.

⁴⁰ Jesusmi huktawan Jordán mayupa waklawninman kutirqa, ñawpaqta Juanpa bautizasqan lawman. Hinaspam chaypi qeparqa.

⁴¹ Chaymanmi achkallaña runakuna rispanku ninakurqaku: Juanqa manam ima milagrotapas ruwarqachu, Jesusmanta nisqanmi ichaqa cheqap, nispanku.

⁴² Chaypim Jesusman achkaq iñirqaku.