Josué 9 - Chuya Qellqa 1992

Gabaón llaqtayuqkunawan contrato ruwasqankumanta

¹ Jordán mayupa kaylaw chimpan orqokunapi, pampakunapi chaynallataq hatun lamar qochapa patanmanta qallaykuspa Líbano law orqokunapi yachaq reykunam tukuy chaykunata uyarirurqaku. Paykunam heteokuna, amorreokuna, cananeokuna, ferezeokuna, heveokuna hinaspa jebuseokuna karqaku.

² Hinaspam huk runa hinalla, Josueypa chaynataq Israelpa contranpi peleanankupaq huñunakururqaku.

³ Gabaón llaqtapi yachaqkunam ichaqa, Jericó llaqtatawan Hai llaqtata Josueypa imam ruwarusqanta uyariruspanku,

⁴ sakrillawan sumaqta tanteanakuruspanku, karumantaraq hamuq tukuspanku, mawka costalkunata hinaspa llikipasqa chaynataq remiendasqa mawka odrekunata asnonkuman cargakuykuspanku,

⁵ mawka usutakunawan, mawka pachawan churakuykuspanku, ñanninkupaqpas qoqarasqa chaki tantakunata aparikuspanku pasarqaku.

⁶ Hinaspam Josueypa kasqanman chayarurqaku, Gilgalpi campamentonta sayarachispa kachkaptin. Chayaruspankum Josueytawan Israelpa mirayninkunata nirqaku: Ñoqaykuqa karumantaraqmi hamuchkaniku. Qamkunawanmi contrato ruwayta munaniku, nispanku.

⁷ Israelpa mirayninkunam ichaqa chay heveokunata nirqaku: Ichapas qamkunaqa hichpallaykupi yachaqkunapas kachkankichik, ¿imaynataq qamkunawan contratota ruwaymanku? nispanku.

⁸ Hinaptinmi Josueyta paykuna nirqaku: Ñoqaykuqa serviqnikikunam kaniku, nispanku. Chaymi paykunata Josué nirqa: ¿Pikunataq kankichik? ¿Maymantataq hamuchkankichik? nispa.

⁹ Paykunañataqmi nirqaku: Kay serviqnikikunaqa karu llaqtamantaraqmi hamuchkaniku, Diosnikichikpa tukuy ima ruwasqantam yacharurqaniku. Uyarirqanikum Egipto nacionpi tukuy ima ruwasqankunatawan,

¹⁰ Jordán mayupa waklaw chimpanpi kaq amorreokunapa iskaynin reyninkunata, Hesbonpa reynin Sehontapas chaynataq Basanpa reynin Astarot lawpi yachaq Ogta imatam ruwasqantapas.

¹¹ Chayraykum llaqtaykupi ancianokunawan llapallan runakuna niwarqaku: “Ñannikichikpaq necesitasqaykichikta apaspayá paykunapa kasqanman riychik hinaspa nimuychik: Ñoqaykuqa serviqnikikunam kaniku, kunanyá ñoqaykuwan contratota ruwaychik”, nispaykichik.

¹² Wasiykumanta lloqsimuspaykuqa kay tantaykutapas qonichkaqllatam apamurqaniku, kayqaya kunanqa chakiruspan qoqarachkanña.

¹³ Kay odreykumanpas musoqllamanmi vinota hillpukamurqaniku, kayqaya kunanqa llikipasqaña. Pachaykupas, usutaykupas karu-karumantaraq hamusqaykurayku pasaypaq mawkayasqaña, nispanku.

¹⁴ Chaymi Israelpa mirayninkuna, Gabaón llaqtayuq runakunapa apamusqanta chaskiykurqaku. Ichaqa manam Tayta Diosta tapurqakuchu.

¹⁵ Hinaptinmi paykunawan hawkalla kaspanku mana wañuchinankupaq contratota Josué ruwarqa. Israelpa kamachiqninkunapas, chaynata ruwanankupaqmi jurarqaku.

¹⁶ Ichaqa paykunawan contrato ruwasqankumanta kimsa punchawllanmanmi yacharurqaku chay runakunaqa Gabaón llaqtamanta kaspa hichpallankupi yachaq kasqankuta.

¹⁷ Chayraykum Israelpa mirayninkuna lloqsiruspanku chay sakri runakunapa llaqtanku Gabaonman, Cafiraman, Beerotman hinaspa Quiriat-jearimman kimsa punchawpi chayarurqaku.

¹⁸ Ichaqa Israelpa mirayninkunam paykunata mana wañurachirqakuchu, paykunapa kamachiqninkuna Israelpa yupaychasqan Tayta Diospa sutinpi jurasqankurayku. Hinaptinmi Israelpa mirayninkuna llapa kamachiqninkupa contranpi rimarqaku.

¹⁹ Chaymi llapa kamachiqninkuna Israelpa mirayninkunata nirqaku: Ñoqaykuqa Israelpa yupaychasqan Tayta Diosraykum jurarqaniku. Chayraykum paykunataqa mana imanachwanchu.

²⁰ Aswanqa kaynatam ruwasunchik: Paykunataqa manam wañuchichwanchu, juramento ruwasqanchikraykum Tayta Diospa piñakuynin chayaramuwachwan, nispanku.

²¹ Israelpa kamachiqninkunaqa nirqakutaqmi: Ama wañuchisunchikchu, aswanqa paykuna kachunku llapallan runakunapaq yantaqkuna hinaspa yaku apamuqkuna, nispanku. Chaynatam llapa kamachikuqkunaqa imam nisqankuta cumplirqaku.

²² Josueymi Gabaón llaqtayuqkunata tapurqa: Hichpallaykupi yachachkaspaqa ¿imanasqataq “Llumpay karumantam hamuniku” nispa llullakuwarqankiku?

²³ Chayraykum ñakasqa kaspa wiñaypaq criado kankichik. Yantatawan yakutam Diosniypa wasinpaq astamunkichik, nispa.

²⁴ Chaymi Josueyta nirqaku: Yupaychasqayki Tayta Dios tukuy kay allpata qamkunaman qosunaykichikpaq hinaspa kay allpapi llapallan yachaqkunata wañuchinanpaq serviqnin Moisesman kamachisqanta yacharusqaykuraykum, wañuchiwanaykikumanta manchakuspa chaynataqa ruwarqaniku.

²⁵ Kunanqa makikipim kaniku. Tanteasqaykiman hinayá ñoqaykuwan ruway, nispanku.

²⁶ Chaynata ruwaspam, Gabaón llaqtapa runankunata Israelpa mirayninkuna wañurachinanmanta Josué librarqa.

²⁷ Chay punchawmantapunim paykunata Josué churarurqa Israelpa mirayninkunapaqwan Tayta Diospa altarninpaq, maymi akllasqan sitiopi altarninpaq yantatawan yakuta astamunankupaq. Gabaón castakunapaqqa hina chaymi ruwayninku kunankamapas.