Josué 7 - Chuya Qellqa 1992

Israel sasachakuypi tarikusqanmanta

¹ Judá ayllumanta kaq Serapa mirayninmantam karqa Zabdipa willkan hinaspa Carmipa churin Acán sutiyuq runa. Paymi chinkachinankupaq sapaqchasqa kaqkunata hapikuykuspan Tayta Diospa qayllanpi Israelpa mirayninkunata huchallirachirqa. Chayraykum paykunapa contranpi Tayta Dios piñakururqa.

Acán castigasqa kasqanmanta

² Josueymi Jericó llaqtamanta runakunata kacharqa Hai llaqtata wateqamunankupaq. Hai llaqtaqa tarikurqa Bet-avén llaqtapa hichpanpim hinaspa Bet-el llaqtapa intipa qespimunan lawninpim. Chay runakunam pasaspanku Hai llaqtata wateqamurqaku.

³ Kutiramuspankum Josueyman willarqaku: Amaña llapallan tropakunaqa richunkuchu, iskay otaq kimsa waranqallam Hai llaqtataqa venceramunqaku. Amaña llapallan soldadokunataqa pisipachiychu. Chay llaqtapi runakunaqa asllam kasqaku, nispanku.

⁴ Chaynapim kimsa waranqa soldadokunalla Hai llaqtata atacanankupaq rirqaku. Ichaqa Hai llaqtayuq soldadokunam venceramuspa qatiramurqaku.

⁵ Hai llaqtayuqkunam urayninpaman qatimuspa Israel tropakunata venceruspa yaqa kimsa chunka soqtayuqta wañurachimurqaku, hinaspam llaqtapa punkunmanta Sebarim lawkama qatiramurqaku. Chayraykum llapa runakuna pasaypaqta hukmanyarurqaku.

⁶ Hinaptinmi Josueywan Israelpa ancianonkuna, pachankuta llikipakuspanku, umankumanpas allpata machqekuspanku Tayta Diospa Arcanpa ñawpaqninpi tardeykuykama qonqoranpa kumuykurqaku.

⁷ Chaymi Josué nirqa: ¡Dios Taytalláy! ¿Imapaqtaq kay llaqtata Jordán mayuta chimpachimurqanki amorreokunaman qoykuwaptikiku chinkarachiwanankupaq? ¡Ima allinchá kanman karqa Jordán mayupa waklaw chimpanpi qepakamuyniykuqa!

⁸ ¡Señorlláy! ¿Ima nisaqtaq Israelpa mirayninkuna enemigonkumanta kunan ayqechkaptinqa?

⁹ Canaán castakunawan kay allpapi yachaqkunachiki uyariruspanku muyuruwanqaku, hinaspachiki sutiykutapas kay pachamanta chinkarachinqaku. Hinaptinqa ¿imatataq ruwanki ancha reqsisqa sutiki mana penqaypi kananpaq? nispa.

¹⁰ Chaymi Josueyta Tayta Dios nirqa: ¿Imanasqataq pampapi qonqoraspa kachkanki? Hatariy.

¹¹ Israelpa mirayninkunam huchallikurunku, paykunawan pacto ruwasqaytam pakirunku. Chinkachisqa kananpaq ñakasqa kaqkunata suwakuruspam llullakurunku, hinaspam tukuy imankutawan kuskata pakarunku.

¹² Chayraykum Israelpa mirayninkunaqa enemigonkuna venceyta manaña atinqakuchu, aswanqa enemigonkupa ñawpaqninmantam ayqenqaku, paykunapas chinkachisqa kanankupaq ñakasqaña kasqankurayku. Sichum qamkuna chay ñakasqa kaqkunata mana chinkachiptikichikqa manam yanapasqaykichikñachu.

¹³ Hatarispayki runakunata chuyanchay hinaspa paqarinpaq chuyanchakamunankupaq kamachiy. Ñoqa Tayta Diosmi, Israelpa Diosninmi kaynata nini: Chinkachisqa kananpaq ñakasqa kaqkunam Israel ukupi kachkan. Chaykuna chawpikichikmanta chinkachisqa kanankamam enemigoykichikta mana venceyta atinkichikchu.

¹⁴ Chaynaqa, paqarinmi castan-castan asuykamuwankichik. Ñoqapa akllasqay kaqñataqmi ayllun-ayllun asuykamuwanqaku. Akllasqay ayllumantañataqmi familian-familian asuykamuwanqaku. Akllasqay familiamantañataqmi qarikuna sapakama asuykamuwanqaku.

¹⁵ Chinkachisqa kananpaq kaqkunata aparuqñataqmi aylluntin chaynataq tukuy ima hatallisqanwan kuska kañasqa kanqaku, pacto ruwasqayta mana kasukuspan Israel ukupi millakuypaq huchata ruwasqanrayku, nispa.

¹⁶ Chaymi tutapayta Josué hatarispan Israelpa mirayninkunata ayllun-ayllun asuykachirqa. Hinaptinmi Tayta Dios Judá aylluta akllaykurqa.

¹⁷ Judá ayllu asuykuptinmi Zerapa mirayninkunata Dios akllaykurqa. Zerapa mirayninkuna asuykuptinkum Zabdita Dios akllaykurqa.

¹⁸ Zabdipa churinkunamanta qarikuna asuykuptinkum, Carmipa churin Acán akllasqa karqa. Carmiqa karqa Zabdipa churinmi hinaspa Judá ayllumanta kaq Zerapa willkanmi.

¹⁹ Hinaptinmi Josué nirqa: Churilláy Acán, Tayta Diostayá, Israelpa Diosnintayá hatunchaspayki yupaychay, hinaspayá ama imatapas pakaykuspa imam ruwasqaykita willaykuway, nispa.

²⁰ Chaymi Acán nirqa: Cheqaptapunim Tayta Diospa contranpi, Israelpa Diosninpa contranpi, kayta ruwaruspay huchallikuruni:

²¹ Jericó llaqtamanta apamusqanchik kaqkunamantam, Babiloniamanta kaq kuyayllapaq capata, iskay chunka kimsayuq kilo qollqeta hinaspa medio kilo pesaq qorita rikururqani. Chaykunatam kuyaruspay hapikurqani, hinaspaymi carpaypa chawpinpi allpa ukupi pamparurqani, qollqepas chaykunapa ukunpim pakasqa kachkan, nispa.

²² Hinaptinmi runakunata Josué kacharqa, chaymi paykuna kallpaylla rispanku, Acanpa tukuy ima pakasqankunata chay carpapi tariramurqaku, tariramurqakutaqmi qollqetapas chaykunapa ukunpi pakasqata.

²³ Carpamanta hurqoramuspankum Josueyman chaynallataq Israelpa mirayninkunapa qayllanman apamurqaku, hinaspam Tayta Diospa ñawpaqninpi churaykurqaku.

²⁴ Chaymi Josueywan Israelpa mirayninkuna, Zerapa churin Acanta, churinkunatawan, vacankunatawan, asnonkunatawan, ovejankunatawan kuskata, Acor sutiyuq qechwaman pusarqaku. Aparqakutaqmi suwakusqan qollqeta, capata, qorita, carpanta hinaspa tukuy ima kapuqninkunatapas.

²⁵ Chaypim Josué nirqa: ¿Imanasqataq kay sasachakuyta aparamuwarqankiku? Kunanyá chay sasachakuy apamuwasqaykikuta qanman Tayta Dios chayachisunki, nispa. Hinaptinmi Israelpa mirayninkuna rumiwan chamqaparuspanku kañaykurqaku.

²⁶ Chaymantam hawanman rumikunata montorurqaku. Chay monton rumikunaqa hinallam kunankamapas kachkan. Chayraykum chay sitioqa Acor qechwawan sutichasqa kunankamapas kachkan. Chayñam Tayta Diospa piñakuynin tanirurqa.