Josué 6 - Chuya Qellqa 1992

Jericó llaqtata vencesqankumanta

¹ Jericó llaqtapa punkunkunatam Israelpa mirayninkuna mana yaykunankupaq suma-sumaqta wichqarurqaku. Manam pipas lloqsirqachu nitaq yaykurqachu.

² Ichaqa Josueytam Tayta Dios nirqa: Kunanmi Jericó llaqtata, reyninta chaynataq soldadonkunatapas makikiman churani.

³ Chaynaqa, qanmi tropaykikunapiwan kay llaqtata sapa punchaw huk kutita muyunkichik. Soqta punchawmi chaynata ruwankichik.

⁴ Arcapa ñawpaqnintam qanchis sacerdotekuna rinqaku, sapakama carneropa waqranmanta cornetayuqkama. Qanchis kaq punchawpim kay llaqtata qanchis kutitakama muyunkichik, sacerdotekunañataqmi cornetankuta tocanqaku.

⁵ Cornetata unay waqaqta uyariykuspaykichikmi, llapallaykichik tukuy kallpaykichikwan qaparinkichik, hinaptinmi llaqtapa muyuriqninpi perqakuna tuñiykunqa. Chayñam llaqtaman sapakama mana imata manchakuspa yaykunkichik, nispa.

⁶ Chaymi sacerdotekunata qayaykuspan Nunpa churin Josué nirqa: Diospa Arcanta apaychik, qanchis sacerdotekunañataqyá carnerokunapa waqranmanta cornetayuqkama, Tayta Diospa Arcanpa ñawpaqninta richunku, nispa.

⁷ Llaqtatapas kaynatam nirqa: Riychik hinaspa kay llaqtata muyumuychik. Guerrapaq tropakunañataqyá Diospa Arcanpa ñawpaqninta richunku, nispa.

⁸ Josué rimayta tukuruptinmi, qanchisnintin sacerdotekuna carneropa waqranmanta cornetayuqkama, Tayta Diospa Arcanpa ñawpaqninta cornetankuta tocastin rirqaku. Tayta Diospa Arcanñataqmi paykunapa qepanta rirqa.

⁹ Guerrapaq tropakunam, corneta tocaq sacerdotekunapa ñawpaqninta rirqaku. Llapa runakunapas Diospa Arcanpa qepantam rirqaku, sacerdotekunañataqmi cornetata manaña tukuyta tocarqaku.

¹⁰ Runakunatam Josué kamachirqa: Qamkunaqa amam qaparinkichikchu, nitaqmi imatapas rimarinkichikchu, aswanqa upallallam rinkichik. ¡Qapariychik! niptiyñam llapallan kallpaykichikwan lliw qaparinkichik, nispa.

Jericó llaqtata vencesqankumanta

¹¹ Josué kamachiptinmi llaqtapa muyuriqninta, Tayta Diospa Arcanta huk kutita muyuchirqaku. Hinaspam campamentoman kutimuspanku tuta samarqaku.

¹² Paqarinnintin tutapaytam Josué hatarirurqa, sacerdotekunañataqmi Tayta Diospa Arcanta hombrorqaku.

¹³ Diospa Arcanpa ñawpaqnintam qanchis sacerdotekuna carneropa waqranmanta cornetayuqkama, cornetata manaña tukuyta tocastin rirqaku. Guerrapaq tropakunañataqmi paykunapa ñawpaqninta rirqaku. Llapa runakunapas Tayta Diospa Arcanpa qepantam rirqaku. Sacerdotekunapas mana tukuytam cornetata tocarqaku.

¹⁴ Chaynatam iskay kaq punchawpipas llaqtata huk kutitawan muyuramuspanku campamentoman kutimurqaku. Soqtantin punchawmi chaynallata ruwarqaku.

¹⁵ Qanchis kaq punchawpiñataqmi tutapayta hatariruspanku llaqtata muyumurqaku wakin punchawpi muyumusqankuta hina. Ichaqa chay punchawpim qanchis kutikama llaqtata muyumurqaku.

¹⁶ Qanchis kaq kuti muyumuyninkupim sacerdotekuna cornetankuta tocaykuptinku, llapa runakunata Josué kamachirqa: ¡Qapariychik! Llaqtatam Tayta Dios qoykusunkichik.

¹⁷ Tayta Diospa ñakasqan kasqanraykum kay llaqtaqa tukuy ima kaqninkunawan kuska chinkachisqa kanqa. Rahabllañam wasinpi kaqkunapiwan kawsanqa, wateqanankupaq kachamusqanchikkunata pakaykusqanrayku.

¹⁸ Tayta Diospa ñakasqan llaqtapa kaqtaqa amam imantapas munapayankichikchu nitaqmi llapchankichikpaschu, yanqañataq chaykunata ruwaspaykichik Israelpa campamentonman ima ñakaytapas chayachimuwaqchik chaynataq ima sasachakuytapas aparamuwaqchik.

¹⁹ Qorimanta, qollqemanta, broncemanta, fierromanta ruwasqa kaqkunam ichaqa Tayta Diospaq sapaqchasqa kanqa, hinaspam Tayta Diospa kaqninkunawan kuska churasqa kanqa, nispa.

²⁰ Chaymi runakuna qaparirqaku, sacerdotekunapas cornetatam tocarqaku. Cornetapa waqasqanta uyarispanku llapa runakuna tukuy kallpankuwan qapariptinkum llaqtapa muyuriqninpi perqakuna tuñiykamurqa, hinaptinmi llaqtaman yaykuruspanku lliwta puchukarachirqaku.

²¹ Llaqtapi kaqtaqa lliwtam espadawan wañuchirqaku, qaritapas, warmitapas, warmatapas machutapas hinaspa payatapas; wañuchirqakutaqmi vacakunatapas, ovejakunatapas, asnokunatapas.

²² Josueyñataqmi llaqtata wateqanankupaq kachasqan iskay runakunata kamachirqa: Prometesqaykichikman hina, chay chuchumika warmipa wasinman yaykuspa hurqomuychik payta chaynataq llapallan paywan kuska wasinpi kaqkunatapas, nispa.

²³ Hinaptinmi chay runakuna yaykuspa Rahabta, tayta-mamanta, turinkunata ñañankunata chaynataq llapa ayllunkunatapas hurqomurqaku. Hinaspam Israelpa campamentopa hawa lawninman paykunata pusarqaku.

²⁴ Chaymantam llaqtata kañaykurqaku chaypi tukuy ima kaqkunatawan kuskata. Qorita, qollqeta hinaspa broncemanta chaynataq fierromanta ruwasqa kaqkunatam ichaqa apaspanku Tayta Diospa kapuqninkunawan kuskata churarqaku.

²⁵ Rahabtapas wasinpi kaqkunatawan kuskatam Josué salvarqa, chaynapim paykunaqa Israel castakunawanña kunankama yachachkanku. Rahabtaqa salvarqa Jericó llaqta wateqamuqkunata pakaykusqanraykum.

²⁶ Chay tiempopim juraspan Josué kaynata nirqa: Pipas kay Jericó llaqtata musoqmanta hatarichiqqa Tayta Diospa ñakasqanyá kachun. Piwi churinpa hawanpiyá cimientonkunatapas hatarichichun, sullka churinpa hawanpiyá punkunkunatapas churachun, nispa.

²⁷ Tayta Dios yanapasqanraykum Josueyqa tukuy hinastinpi ancha reqsisqa karqa.