Josué 12 - Chuya Qellqa 1992

Moisespa vencesqan reykunamanta

¹ Kaykunam Israelpa mirayninkunapa vencesqan reykuna, paykunapa allpantam Jordán mayupa chimpan intipa qespimunan lawpi hapikuykurqaku, Arnón mayumanta qallaykuspa Hermón orqokama hinaspa Jordán mayupa intipa qespimunan law qechwakama. Chay reykunam kaykuna:

² Hesbón llaqtapi yachaq amorreokunapa reynin Sehón. Paymi Arnón wayqopa patanpi Aroer llaqtamanta qallarispa Amón castakunapa allpanpa linderonpi Jaboc wayqokama hinaspa Galaadpa chawpinkama munaychakurqa.

³ Munaychakurqataqmi Jordán mayupa intipa qespimunan law qechwakunapipas, Cineret qochamanta qallarispa Puchqo lamar qochakama, sur lawmanñataq Bet-jesimot lawmanta qallarispa Pisga orqopa waqtankama.

⁴ Basanpa reynin Refaimpa miraynin Og. Payqa Astarot llaqtapi hinaspa Edrei llaqtapim yacharqa.

⁵ Paymi munaychakurqa Hermón orqopi, Salca llaqtapi chaynataq Basán lawkunapipas Gesur lawkama hinaspa Maaca lawkama. Galaad allpapipas partenpim munaychakurqa, Hesbón llaqtapa reynin Sehonpa allpankama.

⁶ Chay reykunatam Tayta Diospa serviqnin Moiseswan Israelpa mirayninkuna vencerurqaku. Chay allpakunatam Rubén aylluman, Gad aylluman chaynataq Manasespa wakin aylluman Moisés qorqa.

Josueypa vencesqan reykunamanta

⁷ Kaykunam Josueywan Israelpa mirayninkunapa vencesqan reykuna. Allpankum karqa Jordán mayupa intipa seqaykunan lawpi, Líbano orqopa patanpi kaq Baal-gad llaqtamanta Seir orqoman rinapi Halac orqokama. Chay allpakunatam tupasqanman hina Israelpa mirayninkunaman Josué qorqa.

⁸ Chay allpapim tarikurqa orqokuna, moqokuna, Jordán mayupa patanpi qechwakuna, waqtakuna, chunniqkuna chaynataq Neguev law allpakunapas. Chaykunapim heteokuna, amorreokuna, cananeokuna, ferezeokuna, heveokuna hinaspa jebuseokuna yacharqaku.

⁹ Vencesqanku reykunam kaykuna: Jericopa reynin, Bet-elpa hichpanpi kaq Haipa reynin,

¹⁰ Jerusalenpa reynin, Hebronpa reynin,

¹¹ Jarmutpa reynin, Laquispa reynin,

¹² Eglonpa reynin, Gezerpa reynin,

¹³ Debirpa reynin, Gederpa reynin,

¹⁴ Hormapa reynin, Aradpa reynin,

¹⁵ Libnapa reynin, Adulampa reynin,

¹⁶ Macedapa reynin, Bet-elpa reynin,

¹⁷ Tapuapa reynin, Heferpa reynin,

¹⁸ Afecpa reynin, Saronpa reynin,

¹⁹ Madonpa reynin, Hazorpa reynin,

²⁰ Simron-meronpa reynin, Acsafpa reynin,

²¹ Taanacpa reynin, Meguidopa reynin,

²² Cedespa reynin, Carmelo lawpi Jocneampa reynin,

²³ Dor lawpi Dorpa reynin, Gilgal lawpi Goimpa reynin,

²⁴ hinaspa Tirsapa reynin. Llapallankum karqaku kimsa chunka hukniyuq reykuna.