Jonás 2 - Chuya Qellqa 1992

Jonaspa mañakusqanmanta

¹ Hinaspam challwapa wiksanpi kachkaspan Jonasqa Tayta Diosta mañakuspan

² nirqa: Dios Taytalláy, sasachakuypi kaspay qayakamuptiymi uyariykullawarqanki, wañuypa patanmanta qayakamuptiymi uyariykullawarqanki.

³ Lamar qochapa ukunmanmi wischuykuwarqanki, yakukunam ñoqata pampaykuwarqa, orqochakuq olaykikunam hawayta pasarqa.

⁴ Hinaptinmi qayllaykimanta wischuruwasqaykitaña piensarqani, chaywanpas huktawanmi temploykita qawaykusaq.

⁵ Yakukunapas pasaypaqtam intuykuwarqa, lamar qochapa uku-uku yakunkunam pampaykuwarqa, lamar qochapi qorakunam umayta wankuykuwarqa.

⁶ Orqokunapa sapinkamam uraykurqani, allpapas wiñaypaqmi presochaykuwarqa, chaywanpas Dios Taytalláy wañuypa makinmantam salvaykuwanki.

⁷ Dios Taytalláy, wañuypa patanpiña kachkaspam yuyarirqayki, mañakuyniymi temploykipi qayllaykiman chayaykamurqa.

⁸ Idolokunata yupaychaqkunaqa kuyakuynikimantam karunchakurunku.

⁹ Ñoqam ichaqa qanman graciasta qospay sacrificiokunata qosqayki, prometekusqaytaqa ruwasaqpunim. Dios Taytalláy, qamllam salvakuqqa kanki, nispa.

¹⁰ Hinaptinmi challwata Tayta Dios kamachirqa lamar qochapa patanpi Jonasta atqorunanpaq.