Joel 3 - Chuya Qellqa 1992

Nacionkunata Dios juzgasqanmanta

¹ Tayta Diosmi kaynata nin: Chay punchawkunapim, Judá nacionpi yachaqkunatawan Jerusalén llaqtapi yachaqkunata preso risqankumanta kutichimusaq.

² Llapallan nacionkunatam Josafat qechwaman huñurusaq. Chaypim paykunata juzgasaq llaqtayta tukuy ima ruwasqankumanta. Paykunam Israel llaqtayta huklaw nacionkunaman cheqerachirqaku, hinaspankum allpaytapas partenakururqaku.

³ Paykunaqa churiykunatapas sorteaspam rakinakurqaku qari warmakunatapas huk chuchumikapaqmi cambiarurqaku; warmi warmakunatañataqmi vinowan sinkanankupaq rantikururqaku.

⁴ ¿Tiro llaqta, Sidón llaqta, filisteokuna, imatataq qamkuna ñoqamanta munankichik? ¿Ñoqamanta vengakuruytachu munankichik? Chayna kaptinqa merecesqaykichiktam apurawman pagaykapusqaykichik.

⁵ Qamkunaqa qori-qollqeytapas, munayllapaqña sumaq kapuqniykunatapas suwaruwaspaykichikmi temploykichikman apakurqankichik.

⁶ Judá nacionpi yachaqkunatapas, Jerusalenpi yachaqkunatapas, allpankumanta qarqospam Grecia nacionniyuq runakunaman rantikurqankichik.

⁷ Ichaqa maymi rantikusqaykichik nacionkunamantam paykunata hurqomusaq, hinaspaymi qamkunamanñataq merecesqaykichikta pagapusqaykichik.

⁸ Churikichikkunatam qaritapas warmitapas Judá nacionman rantikusaq, paykunañataqmi Sabá llaqtayuq runakunamanwan mana reqsisqa nacionkunaman rantikunqaku. Tayta Diosmi chaynata nin.

⁹ Nacionkunaman kayta willakamuychik: ¡Guerra! nispa qapariychik, allinnin qari-qari soldadokunata qayamuychik, Guerrapi peleanankupaq asuykamuchunku.

¹⁰ Rejaykichiktapas espadamanña tikraychik, rutunaykichiktapas lanzamanña tikraychik, umpu runapas kallpayuqpaqña hapikuchun.

¹¹ Muyuriqpi nacionkuna huñunakuspa hamuychik. Dios Taytalláy, qampas allinnin qari-qari soldadoykikunata chayman pusamuy.

¹² Nacionkuna rikchariychik, Josafat qechwaman riychik. Tayta Diosmi chaypi tiyaykuspan muyuriqninpi llapa nacionkunata juzganqa.

¹³ Chaynaqa, rutunaykichikta hapispa rutuychik, rutuy tiempom chayaramun; uraykamuychik, uvas saruna uchkukunam huntarun, vino chaskina baldekunam huntarun; llumpaymi llapa mana allin ruwayninkuqa.

¹⁴ Nacionkunata Diospa juzganan qechwapim nana-nanaq runakuna tarikun, Diospa castiganan punchawmi hichpaykamuchkanña.

¹⁵ Intipas killapas tutayarunqam, chaskakunapa kanchayninpas chinkarunqam.

¹⁶ Tayta Diosmi Sión moqomanta qaparimunqa, Jerusalenmantam rimasqan uyarikunqa, cielokunapas kay pachapas katkatatanqam; chaywanpas Tayta Diosmi churinkunataqa waqaychanqa, paytaqmi Israel castakunapa kallpanpas kanqa.

Judá nación bendecisqa kananmanta

¹⁷ Chaynapim yachankichik Dios Taytaykichik kasqayta, hinaspa sapaqchakusqay Sión moqopi yachasqayta. Jerusalenpas chuya llaqtam kanqa, manañam haykapipas huklaw llaqtayuq runakunaqa munaychakunqakuñachu.

¹⁸ Chay tiempokunapiqa orqokunapas vinotam pullpurimunqa, moqokunamantapas lechem lloqllarimunqa, Judá nacionpa llapa yarqankunatapas achkallaña yakukunam kallpanqa; Tayta Diospa templonmantapas yaku lloqsispanmi Sitim llaqtapa qechwankunata parqonqa.

¹⁹ Egipto nacionpas purmachisqam kanqa, Edom nacionpas mana imapa kanan chunniqñam kanqa; Judá runakunata ñakarichispanku allpanpipas inocente runakunapa yawarninta chaqchusqankurayku.

²⁰ Judá nacionwan Jerusalenmi ichaqa runakunapa wiñaypaq yachanan kanqa.

²¹ Ñoqa Tayta Diosmi manaraq mayllasqaykunapa yawarninta mayllaykusaq, hinaspaymi Sión moqopi yachakusaq.