Jeremías 8 - Chuya Qellqa 1992

¹ Tayta Diosmi kaynata nin: Chay tiempopim, Judá nacionpi reykunapa tullunkunata, kamachikuqkunapa tullunkunata, sacerdotekunapa tullunkunata, profetakunapa tullunkunata chaynataq Jerusalén llaqtapi yachaq runakunapa tullunkunata, sepulturankumanta hurqonqaku.

² Chay tullukunam machqepasqa kanqa intiman, killaman chaynataq chaskakunamanpas; chaykunatam paykunaqa kuyaspa servirqaku, qatirqaku, tapukurqaku hinaspa hatuncharqaku. Chay tullukunata pampanankupaq manaña pipas huñuptinmi wanu hinaña pampapi kanqa.

³ Kay mana allin runakunatam tukuy hinastinman cheqerachisaq, hinaptinmi puchuqkunañataq kawsayta munanankumantaqa wañuyllataña maskanqaku. Ñoqa Tayta Diosmi chaynata nini.

Huchankurayku castigasqa kanankumanta

⁴ Yaw, Jeremías, ñoqa Tayta Diospa nisqayta paykunaman kaynata nimuy: Pipas urmaruspanqa sayarirunpunim, pipas ñanmanta karuncharuspanqa kutirinpunim.

⁵ Chaynaqa, Israel runakuna, ¿imanasqataq ñoqamantaqa karunchakurunkichik? Jerusalenpi runakuna, ¿imanasqataq pasaypaqta qepancharuwankichik? Pantaynikichikman hapipakuruspam kutirikamuwayta mana munankichikchu.

⁶ Uyarisqayman hinaqa manam pipas cheqap rimaqqa kanchu, manam pipas huchanmantaqa wanakunchu, manam pipas huchanta reqsikuspa ninchu: ¿Imatataq kayta ruwaruni? nispaqa. Guerraman kallpaq caballo hinaraqmi llapallanku pantay ñanman kallpanku.

⁷ Alton pawaq cigüeñapas yachanmi haykapim kutimuyta, kullkupas, wayanakuypas, chiwakupas yachanmi huklawman astakuyta. Runaykunam ichaqa ñoqa Tayta Diospa kamachikuyniykunata mana yachankuchu.

⁸ ¿Imanasqataq ninkichik: Yachaysapam kaniku, Tayta Diospa yachachikuynintam hatalliniku, nispaqa? Qellqaqkunapas llullakunatam qellqachkanku, llullakuspankum yachachikuyniykunata qellqachkanku.

⁹ Yachaysapakunam penqayman churasqa kanqaku, toqllapa hapisqan animal hinam mancharikunqaku, Tayta Diospa Chuya siminta qepancharuptinkuqa, ¿maypitaq kachkan yachaysapa kayninkuqa?

¹⁰ Chayraykum warminkutapas hukmanña qoykusaq, chakrankutapas hukmanñam qoykusaq. Paykunaqa hatunpas taksapas apuyaruyllatam maskanku, profetawan sacerdotekunapas engañakuqllañam rikurirunku.

¹¹ Runaykunapa heridantapas hawanpi ukunpim hampiykunku, manaña hawkayay kachkaptinpas: “Hawkallam kakusunchik”, nispam ninku.

¹² Millakuypaq ruwasqankumanta penqakunanku kachkaptinpas manam penqakurqakuchu. Paykunaqa manam penqakuytapas yachankuchu, chayraykum ñoqa Tayta Dios kaynata nini: Paykunaqa castigasqay tiempopim wichinqaku, wañuchisqakunawan kuskam wañuchisqa kanqaku.

¹³ Tayta Diosmi nin: Pasaypaqtam paykunata chinkarachisaq, chulla uvaspas kallmanpiqa manam puchunqachu, higospas sachanpiqa manam puchunqachu, rapinkunatapas pasaypaqtam chakirachisaq. Paykunaman qosqaytapas lliwtam qechurusaq.

¹⁴ Hinaptinmi paykuna ninqaku: ¿Imatataq kaypi tiyaspa ruwachkanchik? hatarispa murallasqa llaqtakunaman yaykusunchik, llapallanchik chaypi wañumusunchik, Tayta Diosmi wañuchimuwasunchik, paypa contranpi huchallikusqanchikmantam venenasqa yakuta tomarachiwanchik.

¹⁵ Hawka kawsakuytam suyarqanchik ichaqa sasachakuyllam chayaramuwanchik; sanoyananchikpaq punchawtam suyarqanchik ichaqa muspaypi hinam rikurirunchik.

¹⁶ Caballonkunapa samatyasqanpas Danpa allpanmantaraqmi uyarikuchkan, caballokunapa weqeqeqeyninwanmi allpapas katkatatachkan, llaqtatawan tukuy imankunata tuñichiqmi hamuchkan, chaypi yachaqkunata wañuchiqmi hamuchkan, nispanku.

¹⁷ Tayta Diosmi kaynata nin: Contraykichikpim venenoyuq maqta urukunata kachamusaq, manam pipas chaykuna mansaytaqa atinqakuchu, chaykunam qamkunata kachusunkichik.

Llaqtanrayku Jeremiaspa waqasqanmanta

¹⁸ Nanaypa intusqan kaptiymi, soqoypas wañunayachkanña.

¹⁹ Llaqtaypa qaparisqanmi uyarikuchkan, tukuy hinastinmanta kaynata nispa waqasqankum uyarikuchkan: Tayta Diosmi Sión llaqtata saqerun, reyninpas manañam chaypiñachu, nispanku. Chaymi Tayta Diosñataq nin: ¿Imanasqataq yanqa mana valeq idolokunata yupaychaspaykichik piñachiwankichik? nispa.

²⁰ Cosecha tiempopas chiraw tiempopas pasarunñam ñoqanchikmi ichaqa manaraq salvakunchikraqchu.

²¹ Llaqtaypa ñakarisqanwanmi ñoqapas ñakarini, llakikuywan manchakuymi ñoqamanta munaychakurun.

²² ¿Manachu Galaad lawpi hampi kan? ¿Manachu chaypi pipas hampiq kan? ¿Imanasqataq onqoyninmanta llaqtay mana sanoyanchu?