Jeremías 7 - Chuya Qellqa 1992

Templopi Jeremías willakusqanmanta

¹ Tayta Diosmi rimapayawaspan niwarqa:

² Temploypa punkunpi sayaykuspa kaynata willakamuy: Judá nacionpi runakuna, Tayta Diosta yupaychanaykichikpaq kay punkunta yaykuqkuna, kay willakuyta uyariychik.

³ Israelpa yupaychasqan Tukuy Atiyniyuq Tayta Diosmi kaynata nin: Kawsaynikichikta allichaspa allinta ruwaptikichikqa kay allpapim kawsachisqaykichik.

⁴ Kaqmanta-kaqmanta kaymi Tayta Diospa templonqa nispa nisuqnikichikkunamanqa amayá hapipakuychikchu.

⁵ Sichum kawsaynikichiktawan ruwaynikichikta allichaspa runakunapa quejanakuyninta allinta arreglaptikichikqa,

⁶ huklaw llaqtayuqkunatapas, mana tayta-mamayuqkunata, viudakunatapas mana ñakarichiptikichikqa, inocente runakunata kay sitiopi mana wañuchiptikichikqa, idolokunata manaña yupaychaptikichikqa,

⁷ ñawpaq taytaykichikkunaman qosqay allpapim wiñaypaq kawsachisqaykichik.

⁸ Qamkunam ichaqa llulla rimaykunapi, mana valeq rimaykunapi hapipakunkichik.

⁹ Suwakuchkaspa, runata wañuchichkaspa, waqllikuchkaspa, llullakuywan jurachkaspa, Baal idolokunapaq inciensota kañapuchkaspa, mana reqsisqaykichik dioskunata yupaychachkaspaqa,

¹⁰ ¿hamuwaqchikraqchu sapaqchakusqay wasiyman qayllaypi kanaykichikpaq? ¿Niwaqchikraqchu: Libreñam kaniku, nispaykichik? ¿Creenkichikchu chay millakuypaq kaqkuna ruwanaykichikpaq libre kasqaykichikta?

¹¹ ¿Suwakunapa machayninpaqchu kay sapaqchakusqay wasita hapinkichik? Ñoqaqa tukuy ima ruwasqaykichiktam qawachkani. Ñoqa Tayta Diosmi chaynata nini.

¹² Ñawpaq watakunapi yachasqay Silo llaqtaman riychik, Israel runaykunata mana allin ruwasqankumanta imam ruwasqayta qawamuychik.

¹³ Mana allin kawsasqaykichikmanta achka kutita rimapayachkaptiypas manam uyariwarqankichikchu, nitaqmi kasukurqankichikchu; Ñoqa Tayta Diosmi chaynata nini.

¹⁴ Chayraykum kay hapipakunaykichik templotapas, qamkunamanwan ñawpaq taytaykichikkunaman qosqay templotapas, Silo llaqtapi santuariota hina purmachisaq.

¹⁵ Castaykichik Efrainpa mirayninkuna qarqosqayta hinam, qamkunatapas qayllaymanta qarqosqaykichik.

Israelpa mirayninkuna mana kasukusqankumanta

¹⁶ Yaw, Jeremías, amañayá kay runakunapaqqa mañakuwayñachu nitaq qaparispa qayakamuwayñachu amaña hikutawaychu. Manam uyarisqaykichu.

¹⁷ Qaway Judá nación llaqtakunapi chaynataq Jerusalén llaqtapa callenkunapi imam ruwasqankuta.

¹⁸ Warmakunam yantata pallamunku, taytankum ninata ratachinku, warmikunam masata chapunku, cielopi Reina nisqankupaqmi tortakunata ruwapunku, idolokunapaqmi vinota tallipunku. Chaykunata ruwaspankum ñoqata piñachiwanku.

¹⁹ Chaykunata ruwaspaqa manam ñoqatachu piñachiwachkanku, aswanqa kikinku penqaypi kanankupaqmi. Ñoqa Tayta Diosmi chaynata nini.

²⁰ Chayraykum Tukuy Atiyniyuq Tayta Dios kaynata nin: Sinchi piñakuyniytam chayachimusaq, kay allpapa, runakunapa, animalkunapa, sachakunapa, lliw kawsaypa contranpi. Piñakuyniyqa mana amachay atina nina hinam kanqa.

²¹ Israelpi Tukuy Atiyniyuq Tayta Diosmi kaynata nin: Lliw kañana sacrificiokunatawan wakin sacrificiokunata huñuspa ofrecemuwaychik hinaspa aychantañataq mikuychik.

²² Egiptomanta ñawpaq taytaykichikkunata hurqomuspayqa, manam kamachirqanichu lliw kañana sacrificiokunatawan wakin ofrendakunata ofrecewanankupaqqa.

²³ Paykunataqa kaynatam nirqani: Nisqaykunata kasukuptikichikqa ñoqam Diosnikichik kasaq qamkunañataqmi llaqtay kankichik, nisqaykunaman hinayá kawsaychik, chaynapi ima ruwasqaykichikpas allin kananpaq.

²⁴ Ichaqa mana kasukuspankum mana kaqpaqpas hapirqakuchu, aswanraqmi sonqonkupa munasqanta ruwaspa tukuy mana allinkunata ruwarqaku. Ñoqaman kutirikamunanku kachkaptinpas aswanraqmi karunchakururqaku.

²⁵ Egiptomanta taytaykichikkunata hurqomusqay punchawmanta kunankamam mana samaykuspay profetaykunata kachamurqaykichik.

²⁶ Qamkunam ichaqa mana uyariwarqankichikchu, nitaqmi kasuwarqankichikchu. Aswanqa sonqoykichikta rumiyarachispam taytaykichikkunamantapas astawanraq tukuy mana allinkunata ruwarqankichik.

²⁷ Yaw, Jeremías, mana kasusunayki kaptinpas, tukuy kaykunata paykunaman willamuy. Paykunam ichaqa qapariptikipas mana uyarisunkichu.

²⁸ Chaynaqa, kaynatayá nimuy: Kay nacionpi runakunaqa Diosninkupa nisqanta mana kasukuq runakunam, mana corregikuy munaq runakunam. Cheqap rimaymi siminkumanta chinkarun.

Jerusalén llaqtapa idolokunataña yupaychasqankumanta

²⁹ ¡Jerusalén llaqta, chukchaykita rutukuspa wischuy, chunniq orqokunapi waqamuy! Tayta Diosmi runaykikunapaq piñasqa kachkan, miraynikikunatam qepancharuspa saqerun.

³⁰ Tayta Diosmi kaynata nin: Judapa mirayninkunam mana munasqay kaqkunata ruwarunku. Ñoqapa temploypim millakuypaq idolokunata churarunku, chaykunawanmi qachacharunku.

³¹ Ben-hinom qechwapim Tofet sutiyuq altarta hatarichinku wawa-churinkuta kañanankupaq. Chaykuna ruwanankupaqqa manam kamachirqanichu nitaqmi piensarqanipaschu.

³² Chayraykum ñoqa Tayta Dios kaynata nini: Hamuchkanmi punchawkuna chay sitiota manaña “Tofet” nispa sutichanankupaq nitaq “Ben-hinom qechwa” nispa sutichanankupaq, aswanqa “Runa nakana” qechwawanñam sutichanqaku, hinaspam chaypiqa wañuqkunataña pampanqaku, pampanankupaq sitio manaña kasqanrayku.

³³ Kay runakunapa ayantam alton pawaq animalkunawan purun animalkunaña mikunqaku, manam pipas amachaq kanqachu.

³⁴ Judá llaqtakunapi chaynataq Jerusalén llaqtapa callenkunapim, asikuyta, kusikuyta casarakuy fiestata chinkarachisaq. Kay nacionqa pasaypaqtañam chunninqa.